ކުށުގެ ރެކޯޑު ސާފު ކުރުމަށް 34 ފޯމު ހުށަހަޅައިފި

ރިޔާސީ އިންތިޚާބާ ގުޅިގެން މިހާތަނަށް ރެކޯޑު ސާފު ކުރުމަށް 34 ފަރާތަކުން ފޯމު ހުށަހަޅައިފައިވާ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ން ބުނެފިއެވެ.

އެ އިދާރާއިން އާދީއްތަ ދުވަހުގެ ރޭ ބުނީ 34 ފަރާތެއްގެ ފޯމު ލިބިފައިވާއިރު އާދީއްތަ ދުވަހުގެ ރޭ 6:00 އާ ހަމައަށް 32 ފަރާތެއްގެ ފޯމު، ރެކޯޑު ސާފު ކުުރުމަށްފަހު ހަވާލު ކޮށްފައިވާ ކަމަށެވެ. ނުނިމިއޮތް ދެ ފޯމު ވެސް ވީ އެންމެ އަވަހަށް ނިންމައި ހަވާލު ކުރުމުގެ މަސައްކަތް ކޯޓުތަކާ ގުޅިގެން ކުރަމުން އަންނަ ކަމަށް ޑީޖޭއޭއިން ބުނެފައިވެއެވެ.

ރެކޯޑް ސާފުކުރަނީ އޮޓަމޭޓެޑް ސެންޓަރަލް ޑާޓާ ބޭސްއަކުން ކަމުގައި ނުވާތީ ރާއްޖޭގެ ހުރިހާ ކޯޓަކުން ވަކިވަކިން ރެކޯޑްް ސާފުކުރުމަކީ ވަގުތު ހޭދަވާ ކަމެއްކަން ޑީޖޭއޭ އިން ފާހަގަކުރެއެވެ. އެހެންކަމުން ފޯމު ހުށަހަޅާ އެންމެން ވެސް އެކަމަށް ސަމާލުކަން ދިނުމަށް ޑީޖޭއޭ އިން ވަނީ އިލްތިމާސްކޮށްފައެވެ.

ޑީޖޭއޭއިން ބުނީ އާދީއްތަ ދުވަހުގެ ރޭ 9:00 ގެ ފަހުން ހުށަހަޅާ ފޯމުތައް އިލެކްޝަންސް ކޮމިޝަނުން ކެންޑިޑެސީ ފޯމު ބަލައިގަތުމަށް ކަނޑައަޅާފައިވާ ސުންގޑިއަށް ނުނިމުމުގެ ފުރުސަތު އެބައޮތް ކަމަށެވެ. އީސީން ކެންޑިޑެސީ ފޯމު ބަލައިގަންނާނީ ހޯމަ ދުވަހުގެ މެންދުރު 2:00 އާ ހަމައަށެވެ.

މީގެ ކުރިން ވެސް ޑީޖޭއޭއިން ވަނީ ރެކޯޑު ސާފު ކުރުމަށް މަދުވެގެން 48 ގަޑިއިރުގެ ވަގުތު ބޭނުންވާތީ ރިޔާސީ އިންތިޚާޞަށް ކުށުގެ ރެކޯޑު ސާފު ކުރަން ބޭނުންވާ ފަރާތްތަކުން އެކަމަށް ސަމާލުކަން ދިނުމަށް އިލްތިމާސްކޮށްފައެވެ.