ކުނި ނުއުފެދޭނެ ފަދަ ގޮތަކަށް ދިރިއުޅެން ދަސްކުރާކަށް ނުވޭތަ؟

އެކި ކަހަލަ ގޮންޖެހުންތަކާއި ކާރިޘާތަކާ ސިލްސިލާ ގޮތެއްގައި ކުރިމަތިލާން ޖެހިފައި ވާ އަދުގެ ދުނިޔޭގައި، ކުނީގެ މަސައްލައަކީ އެންމެ ގިނަ ބަޔަކަށް ކުރިމަތިލާން ޖެހިފައި ވާ އެންމެ ބޮޑު، އެއް މައްސަލައެވެ. ތަރައްޤީ ވެފައި ވާ، ތަހުޒީބު ޤައުމުތަކުން ފެށިގެން ބައެއްގެ މުށު ތެރޭގައި ފިތެމުންދާ އާބާދުތަކުގައިވެސް ކުނީގެ މައްސަލައަކީ ބޮޑު މައްސަލައެކެވެ. ކުންޏަކީ ހަމައެކަނި އިސްރާފުގެ ސަބަބުން ކުރިމަތިވާ ކަމެއް ނޫންކަން، މިކަމުންވެސް އަންގައިދެއެވެ. ކިތަންމެ ނިކަމެތި ހާލެއްގައި އުޅެން މަޖުބޫރުވި ކަމުގައި ވީ ނަމަވެސް، ކޮންޓްރޯލް ކުރަން ދަތި ވާ މިންވަރަށް ކުނިބުނި ގިނަވެގެން ދާ ފަހަރު އާދެއެވެ. މިކަމަށް އޮތް އެންމެ ރަނގަޅު އެއް ހައްލަކީ، ކުނި ނުއުފެދޭނެ ގޮތަކަށް ދިރިއުޅުމުގެ އާދަތައް ބައްޓަން ކުރަން ދަސް ކުރުމެވެ.

ކުނި ނުއުފެދޭ ގޮތަށް ދިރިއުޅުމުގެ އާދަތައް ބަހައްޓަން ދަސްކޮށްދިނުމުގައި ސާބިތުކަމާއެކު ތެދުވެ ހުރި އެކަކީ ފަލަސްޠީނުގެ ޒުވާން އަންހެނެއް ކަމަށްވާ ނަޖްލާ ޢަބްދުލަޠީފުއެވެ. ޢުމުރުން 28 އަހަރުގެ ނަޖްލާގެ މަސައްކަތަކީ، ތަންތަން ސާފު ކުރުމުގައި ވެއްޓާ ރައްޓެހި މާއްދާތައް ބޭނުން ކުރަން ދަސްކޮށްދިނުމުން ފެށިގެން ގޮސް، ގަސްކާނާ ތައްޔާރު ކުރާނެ ގޮތްތައް، އެހެން މީހުންނަށް އުނގަންނައިދިނުމެވެ. އޭނާ މި މަސައްކަތް ކުރިއަށް ގެންދަނީ ހޫނު މޫސުމުގެ ދުވަސްވަރާ ދިމާކޮށް، ހުޅަނގު އައްސޭރީގައި ހިންގާ ސްކޫލެއްގައެވެ.

ދިރިއުޅުމުގެ މައިދާނުގައި އުފެދޭ ކުނިބުނީގެ މިންވަރު މަދު ކުރުމަށް ނަޖްލާގެ ހިތުން ހާއްސަ ޖާގައެއް ދެވި، އެ ރޫޙު އާލާ ވާން ފެށީ، ވިލާތުގައި އޭނާ ދަތުރުކުރި ދުވަސްވަރުގައެވެ. އުފަން ވަޒަނަށް އެނބުރި ގޮސް، ނަޖްލާ މިއަދު ކުރާ މަސައްކަތަކަކީ، ތިމާވެއްޓާ މެދު ވިސްނާ ޒުވާނުންތަކެއް ފަލަސްޠީނުގައި ބިނާ ކުރުމުގެ މަސައްކަތެވެ. ނަޖްލާ ހިންގާ މަޝްރޫޢު އަމާޒު ކޮށްފައި ވަނީ ޢުމުރުން 18 އަހަރާއި 25 އަހަރާ ދެމެދުގެ ޒުވާނުންނަށެވެ.

ޒުވާނުންނަށް އަމާޒުކޮށްގެން ނަޖްލާ ހިންގާ މަޝްރުޢޫގެ މައިގަނޑު އަމާޒަކީ، ދިރިއުޅުމުގެ މައިދާނުގައި އުފެދޭ ކުނިބުނީގެ މިންވަރު، ސުން-ރޭޓަށް ދަށް ކުރުމެވެ.

ޔާރާ ދުވާނީއަކީ ހުޅަނގު އައްސޭރީގެ އަވަށެއް ކަމަށް ވާ ބިލިންގައި، ދަނޑު ބެލެހެއްޓުމުގައި އެންމެ އިސްކޮށް ހަރަކާތްތެރިވާ އެކަކެވެ. ޔާރާ މިއަދު އެ ދަނީ، ތަމްރީނު ޕްރޮގްރާމްގެ ބައިވެރިންނަށް އޯގޭނިކް ތަރުކާރީގެ ދަނޑުވެރިކަން ކުރާނެ ގޮތުގެ  މައުލޫމާތު ހިއްސާ ކުރަމުންނެވެ.

ހޫނު މޫސުމަށް ހާއްސަކޮށްގެން ހުޅަނގު އައްސޭރީގައި ހިންގާ ސްކޫލުން ދަނީ، ތިމާވެށީގެ ޙައްޤުގައި މަސައްކަތް ކުރާ ގިނަ ޖަމިއްޔާތަކަކާ ގުޅިގެން މަސައްކަތްތަކެއް ކުރަމުންނެވެ. އަމާޒަކީ، ފަލަސްޠީނުގެ ބިންތަކުގައި ކުނި އުފެދޭ މިންވަރު މަދު ކުރާނެ ގޮތްތައް، މީހުންނަށް ކިޔައިދިނުމެވެ. މިކަމަށް ހިނގާ ޚަރަދުތައް ބަލަހައްޓަނީ ބޭންކް އޮފް ޕަލަސްޓައިންއާއި ޕަލަސްޓައިން އިންވެސްޓްމަންޓް ފަންޑުންނެވެ.

ދިރިއުޅުމުގެ ކަންކަމައިގެން ކުރިއަށް ދާ އިރު، އެމީހެއްގެ ސަބަބުން އުފެދޭ ކާބަންގެ މިންވަރު މަދު ކުރުމަށް ކޮންމެ މީހަކުވެސް ގަދަ އަޅާ މަސައްކަތް ކުރާތަން ފެނުމަކީ ނަޖްލާ ކުރަމުން ދާ ފޮނި ޢުއްމީދެކެވެ.