ދިވެހި މުސްކުޅި ބަހެއްގައި އޮވެއެވެ. ވަގުންގެ ފޮށި ބާރަށް ބަންނާނެއެވެ.
މާނައަކީ ވައްކަން ކުރާ މީހުން އެމީހުންގެ މުދަލަށް ޚާއްސަ ސަމާލުކަމެއް ދޭނެއެވެ. އެމީހުންގެ ފޮށި ބާރަށް ބަންނާނެއެވެ. ރަނގަޅަށް ތަޅުލާނެއެވެ. ވަގުންނަށް ސަމާލުވާނެއެވެ.
ޚުދު އޭނާއަކީވެސް ވައްކަންކުރާ މީހަކަށްވާތީ، އޭނާއަށް ވައްކަމުގެ އާޖުފާޖު އެނގޭނެއެވެ. ސަމާލުވާންވީ ކަންކަންވެސް އެނގޭނެއެވެ.
ވީމާ، މިއީ ވައްކަންކުރާ މީހުން އޭނާ ގެންގުޅޭ ތަކެތި އެހެން މީހުންނަށްވުރެ މާ ބޮޑަށް ރައްކާކޮށްގެން ގެންގުޅޭތީ ބުނެއުޅޭ ބަހެކެވެ.
އަދިވެސް އިތުރު ބަހަކަށް ބަލައިލާނަމެވެ. ފުޅަށްބުޑުން ދަންޏާ ދޮން ހަސަނަށް ހީވާނީ ކެޔޮގަނޑު ކަނޑާލަފާނެހެންނެވެ.
މާނައަކީ ނުބައި ކަންކަން ކުރާ މީހާއަށް އެހެން މީހަކުވެސް، އެފަދަ ކަމެއް ކުރާނެއޭ ހީވާނެއެވެ.
މިސާލަކަށް، ގައުމުގެ ވެރިކަމުގައި ހުރެ އަމިއްލަ ބާލީހަށް ބަންޑާރަ ކަފަ ލައި، ދައުލަތުގެ ފައިސާއަށް ޚިޔާނާތްތެރިވާ މީހެއްނަމަ، އެމީހަކަށް ހީވާނީ ދެން އަންނަ ހުރިހާ ވެރިކަމެއްގައިވެސް އޮންނާނީ ބައިތުލްމާލުން ވައްކަން ކުރުން ކަމަށެވެ.
ވެރިކަމުގައި ހުންނައިރު، އާރާއި ބާރުގެ ބޭނުންކޮށްގެން ތިމާ ފިޔަވައި ދެން ތިބި ހުރިހާ އެންމެންގެ ވަރަ ކޮށާލައިގެން ހުންނަ މީހަކަށް ހީވާނީ، ދެން ތިބި އެންމެންވެސް ވެރިކަަމަށް އައުމަށްފަހު ދެން ތިބި ސިޔާސީ ވެރިންގެ "ބޮނދު ބުޑަށް ސައި" ކިޔައި، ހަތަރެސްކަން ހަމަކޮށްލާނެ ކަމަށެވެ.
ހަގީގަތަކީ އާރާއި ބާރު ލިބިފައި އޮންނައިރު، ތިމާ ބޭނުން ގޮތަކަށް ކަންކަން ކޮށްލަނީ މާދަމާ ހާލަތު ބަދަލުވެދާނެކަންވެސް ހިތަށް ނާރުވައެވެ. ތިމާގެ މުށުތެރޭގައި ހުރިހާ ބާރެއް އޮންނަ ދުވަހު "ވިހަލަގޮނޑިއަކަށް" ވުރެވެސް ވިހަކަން ގަދަވެފައި ތިމާ ހުންނަނީ މާދަމާއަކީވެސް އަންނާނެ ދުވަހެއްކަން ވިސްނާނުލައެވެ.
އެ އަވާމެންދުރުގައި ތިމާ ހުއްޓައި ނިދިން ހޭލެވޭއިރު، ހާލަތު މި އޮންނަނީ ބަދަލުވެފައެވެ. ދެން ހުންނަންޖެހެނީ ޒާތެއްގެ ބިރުވެރިކަމެއްގައެވެ. ތިމާ އަތުގައި ބާރު އޮތްއިރު ތިމާގެ އަތުން ވިހަދެވިފައިވާ މީހުން ތިމާއަށްވެސް އެ ވިހަ ދީފާނެތީ ޖެހިލުންވަނީއެވެ.
ނަމަވެސް ކަން ހިނގަނީ އަބަދު އެހެނެއް ނޫނެވެ. ވައްކަންކުރާ މީހާ އެމީހާގެ ފޮށި ކިތަންމެ ބާރަށް ބަނދެގެން ހުރިކަމުގައިވީނަމަވެސް، ނުވަތަ ކިތަންމެ ދޫކޮށް ބަނދެގެން ހުރިކަމުގައިވީނަމަވެސް، ވައްކަން ކުރާނީ ވަގުން އުޅޭ ތަނެއްގައެވެ.
ވައްކަން ކުރާނީ ވަގެއްގެ އަތުގައި އެ ފޮށި ޖެހިގެންނެވެ. އެނޫންނަމަ، ހާމަ ތަނެއްގައި އެ ފޮށި ކިތަންމެ އިރަކު ބާއްވާފައި އޮތަސް އެއަށް ކަޅި އަޅާނެ މީހަކު ނުވާނެއެވެ.
