ކޭން ގަތުމަށް 100 މިލިއަން ޔޫރޯ ހުށަހަޅައި، ފަހު ފުރުސަތު ދީފި

ޖަރުމަނުގެ ޗެމްޕިއަން ބަޔާން މިއުނިކުން، އިނގިރޭސި ކުލަބު ޓޮޓެންހަމުގެ ކެޕްޓަން ހެރީކޭން ގަތުމަށް 100 މިލިއަން ޔޫރޯ ހުށަހަޅައިފިއެވެ.

މި އަދަދަކީ ބަޔާންއިން ކުރިން ހުށަހެޅި އަގަށްވުރެ 20 މިލިއަން އިތުރު އަދަދެކެވެ. އަދި މިއީ އެކުލަބުގެ ރެކޯޑް ޓްރާންސްފަރ ފީއެއްވެސްމެއެވެ.

މި ހުށަހެޅުމާއެކު ބަޔާންއިންވަނީ ކޭން ވިއްކާނީތޯ ނުވަތަ ބަހައްޓާނީތޯ ނިންމަން، ޓޮޓެންހަމަށް މުހުލަތެއްވެސް ދީފައެވެ. މި މުއްދަތު ހަމަވާނީ ހުކުރު ދުވަހުގެ ރޭގެ ދަންވަރަށެވެ. މިއަށްވުރެ ލަސްކޮށްފިނަމަ ދެން ބަޔާނުން ކޭންގަތުމަށް ނޫޅޭނެފަދަ ގޮތަކަށް އެ ކުލަބުން ވަނީ ޒާތެއްގެ އިންޒާރެއްވެސް ދީފައެވެ.

އިނގިރޭސި ނޫސްތަކުން ބުނާގޮތުގައި ގައުމީ ކެޕްޓަން ކޭން ހުރީ ތަށިތަކެއް ހޯދޭނެ ކުލަބަކަށް ދާން ތައްޔާރަށެވެ. ނަމަވެސް ޓޮޓެންހަމުން އޭނާ ވިއްކާލުމާމެދު އަދިވެސް އޮތީ ދެ ފިކުރެއްގައެވެ. އެއް ގޮތަކީ އޭނާ ކޮންޓްރެކްޓް އާކުރަން ރުއްސުމަށް، ނުވިއްކައި ބެހެއްޓުމެވެ. ދެވަނަ ގޮތަކީ އަންނަ ހަފުތާގައި ފަށާ އާ ސީޒަނަށްފަހު މާލީ މަންފާއެއް ކުލަބަށް ނުލިބި، ކޭން ދާން ދޫކޮށްލުމެވެ. ނަމަވެސް ޓޮޓެންހަމަށް އޮތް ބިރަކީ، މިހެން ހަދައިފިނަމަ ކޭން ކޮންޓްރެކްޓް އާ ނުކޮށް، އަންނަ ސީޒަނުގައި އެ ކުލަބާ ވާދަވެރި އިނގިރޭސި ކުލަބަކަށް ހިނގައިދާނެ ކަމުގެ ބިރެވެ.

ޓޮޓެންހަމުގެ އައު ކޯޗު އެންޓޭ ޕޮސްޓެޗެގްލޫވެސް ވަނީ ކުލަބުގެ ކެޕްޓަނުގެ ކުރިމަގު އަވަހަށް ނިމުމަކީ ފައިދާހުރި ގޮތެއް ކަމަށް ކުލަބަށް ހުށަހަޅާފައެވެ.

ކޭންއަކީ އިނގިރޭސި ޕްރިމިއަރ ލީގުގެ ތާރީޚުގައި ދެވަނައަށް އެންމެ ގިނަ ގޯލު ޖެހި ކުޅުންތެރިޔާއެވެ. އެއީ 212 ގޯލެވެ. މިއީ އެއްވަނާގައި އޮތް އެލަން ޝިއަރާއަށްވުރެ 48 ގޯލު މަދު އަދަދެކެވެ.