އީގަލްސްއާއި އެއްވަރުކޮށް މާޒިޔާއިން އެއްވަނަ މަގާމު ދަމަހައްޓައިފި

އެމްޑަބްލިޔުއެސްސީ ދިވެހި ޕްރިމިއަރ ލީގުގައި ހުކުރު ދުވަހުގެ ރޭ ކްލަބް އީގަލްސް އާ ދެކޮޅަށް ކުޅުނު މެޗު އެއްވަރުކޮށް، މާޒިޔާ ސްޕޯޓްސް އެންޑް ރެކްރިއޭޝަނުން އެއްވަނަ މަގާމު ދަމަހައްޓައިފިއެވެ.

ދެ ޓީމުގެ ދެމެދުގައި ދެ ޕޮއިންޓުގެ ފަރަގެއް އޮތްއިރު، އީގަލްސް އިން ނިކުތީ މާޒިޔާ ބަލިކޮށް، އެއްވަނަ ހޯދުމަށެވެ. އަދި މާޒިޔާ ނިކުތީ ދެ ޕޮއިންޓުގެ ފަރަގު ފަސް ޕޮއިންޓަށް ބަދަލުކޮށް، އެއްވަނައިގައި ހަމަޖެހިލުމަށެވެ. ލީގުގެ އެއްވަނަ އަދި ދެވަނައިގައިވާ ދެ ޓީމުގެ ކުރިމަތިލުން ނިމުނީ 2-2 ގެ ނަތީޖާއަކުން އެއްވަރުވެގެންނެވެ.

މާޒިޔާއަށް ދާދި ފަހުން ގެނައި ބިދޭސީ ދެ ކުޅުންތެރިން ކަމަށްވާ ކްރޮއޭޝިއާގެ ޑިފެންޑަރު ސެބެސްޓިއަން އަންޓިޗް އާއި ސާބިއާގެ ފޯވާޑް ވޮޖްސްލޭވް ބަލަބަނޮވިޗް ވަނީ އެ ޓީމުގެ ފުރަތަމަ 11 ގައި ހިމަނާފައެވެ.

މެޗުގެ ނުވަ ވަނަ މިނެޓުގައި އަހުމަދު ރިޒްވާން (ރިޒޭ) ބޮލުން ދިން ޕާހަކުން އިވާން ވަނީ ލަނޑެއް ޖަހައި، އީގަލްސްއަށް ކުރިހޯދަދީފައެވެ. މެޗުގެ ކުރީކޮޅު އީގަލްސްއިން ލީޑު ނެގުމުން މާޒިޔާއަށް ޕްރެޝަރު ބޮޑުވިއެވެ. ނަމަވެސް މާޒިޔާއިން ވެސް ވަނީ ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން 28 ވަނަ މިނެޓުގައި އޭރިޔާ ތެރެއަށް ނަގައިދިން ހުރަހެއް، ބަލަބަނޮވިޗަށް ހުސްކޮށް ލިބުނެވެ. ނަމަވެސް އޭނާ ބޮލުން ފޮނުވާލި ބޯޅަ ދިޔައީ ގޯލުގެ މަތިންނެވެ. އޭގެ ފަސް މިނެޓު ފަހުންވެސް އޭނާ އަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފައެވެ. އީގަލްސް އިން ވަނީ ފުރަތަމަ ހާފު ނިމުމުގެ ކުރިން އިތުރު ލަނޑެއް ޖަހައި، ލީޑު ފުޅާކޮށްފައެވެ. 43 ވަނަ މިނެޓުގައި އެ ލަނޑު ޖަހައިދިނީ ރިޒޭ އެވެ.

މާޒިޔާ އިން ދެވަނަ ހާފަށް ނިކުތީ ދެ ބަދަލަކާއެކުއެވެ. ހައިޝަމް އާއި ޝިފާޒްގެ ބަދަލު ނިކުތީ ހުސައިން ޝިފާއު ޔޫސުފް (ކުރޯ) އާއި ދާދި ފަހުން ގެނައި ގާނާގެ ރޭގަން އޮބެންގް އެވެ. ދެވަނަ ހާފު ފެށުނީއްސުރެ މާޒިޔާ އިން ވަނީ ކުޅުން ރަނގަޅުކޮށްފައެވެ. އީގަލްސް އިން ދެވަނަ ހާފުގައި ފޮނުވާލި އެންމެ ނުރައްކާ ހަމަލާއަކީ 54 ވަނަ މިނެޓުގައި ރިޒޭ ޖެހި ހިލޭ ޖެހުމެކެވެ. އެ ހިލޭ ޖެހުމުގައި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މާޒިޔާ އިން ވަނީ 69 ވަނަ މިނެތުގައި ހުސައިން ނިހާން (ނިހާޓް) ގެ ބަދަލުގައި އަލީ ފާސިރު (ސެންޓޭ) ކުޅެން ނެރެފައެވެ. ސެންޓޭ ވަނީ ކުޅެން ނިކުތްތާ ދެ މިނެޓުގެ ތެރޭގައި މާޒިޔާގެ ފުރަތަމަ ލަނޑު ޖަހައިދީފައެވެ. އެ ޓީމުގެ ޚަލީލް ޖަމާލް ނަގައިދިން ހުރަހަކުން ސެންޓޭ ގޯލުގެ ތެރެއަށް ބޯޅަ ފޮނުވާލީ ބޮލުންނެވެ. އެ ލަނޑު ޖެހުމާއެކު އީގަލްސް ޓީމަށް ހަމަޖެހިނުލެވުނީސް މިނެޓެއް ފަހުން މާޒިޔާއިން ވަނީ އިތުރު ލަނޑެއް ޖަހައި، ނަތީޖާ ހަމަހަމަ ކޮށްފައެވެ. މާޒިޔާގެ ހުސައިން ރާއިފް އަހުމަދު (ހަންނަ) އޭރިޔާ ތެރެއަށް ވަދެ ފޮނުވާލި ބޯޅަ ދިމާވީ ގޯލުގެ މަތީ ކަނަށެވެ. މެޗުގެ މޮޅު ކުޅުންތެރިއަށް ހޮވުނީވެސް ހަންނަ އެވެ.

ލީގުގެ ފުރަތަމަ ބުރު ނިމުނުއިރު މާޒިޔާއަށް ހަތް މެޗުން ލިބުނީ 19 ޕޮއިންޓެވެ. އަދި ދެވަނައިގައި އީގަލްސްއަށް ލިބުނީ 17 ޕޮއިންޓެވެ. ލީގުގައި މިހާތަނަށް ބަލި ނުވާ ހަމައެކަނި ދެ ޓީމަކީވެސް މާޒިޔާ އާއި އީގަލްސްއެވެ.