މާޒިޔާ ސްޕޯޓްސް އެންޑް ރެކްރިއޭޝަނުން ބިދޭސީ އިތުރު ކުޅުންތެރިއެއް ސޮއިކުރުވައިފިއެވެ.

ބުރާސްފަތި ދުވަހު މާޒިޔާއަށް ސޮއިކޮށްފައިވަނީ ކްރޮއޭޝިއާގެ ޑިފެންޑަރެއް ކަމަށްވާ ސެބެސްޓިއަން އަންޓިޗް އެވެ. އުމުރުން 31 އަހަރުގެ ސެބެސްޓިއަން އަކީ އިރާގުގެ އެއާފޯސް ކުލަބާއެކު ދެފަހަރު އޭއެފްސީ ކަޕު ކާމިޔާބުކޮށްފައިވާ ކުޅުންތެރިއެކެވެ. އޭނާގެ ކުލަބު ކެރިއަރުގައި ކްރޮއޭޝިއާ، ޤަތަރު، އިރާގް، ޖޯޑަން، ސްލޮވޭނިއާ އަދި ކަޒަކަސްތާނުގެ ކުލަބުތަކަށް ކުޅެފައިވެއެވެ.

ސެބަސްޓިއަން އަކީ މި ފަހުން މާޒިޔާއިން ސޮއިކުރުވި ބިދޭސީ ތިންވަނަ ކުޅުންތެރިޔާއެވެ. މީގެ ކުރިން އެ ޓީމުން ވަނީ ސާބިއާގެ ފޯވާޑް ވޮޖްސްލޭވް ބަލަބަނޮވިޗް އާއި ގާނާގެ މިޑްފީލްޑަރު ރެގަން އޮބެންގް ސޮއިކޮށްފައެވެ. މި ތިން ކުޅުންތެރިންގެ އިތުރުން މާޒިޔާގައި ހިމެނޭ ބިދޭސީ ކުޅުންތެރިންނަކީ މިސްރުގެ މިޑްފީލްޑަރު ޚަލީލް ޖަމާލާއި ލިތުއޭނިއާގެ ޑިފެންޑަރު އެޑްގަރަސް ޒާސްކިސްއެވެ. ޓީމުގެ ކޯޗަކީ ބޮސްނިއާގެ މިލޮމީރް ސެސްލިޖާ (މިލޯ) އެވެ.

މާޒިޔާއިން މަސައްކަތް ކުރަމުންދަނީ ކުރިޔަށް އޮތް އޭއެފްސީ ކަޕަށް ޓީމު ވަރުގަދަ ކުރުމަށެވެ.