ހެޔޮކަމުގެ ތަޅުދަނޑިއަކަށް ވާން އެދޭ މީހާ މަތިވެރި އަޚުލާޤުގެ ވެރިއަކަށް ވާންޖެހޭ: ޚުތުބާ

ހެޔޮކަމުގެ ތަޅުދަނޑިއަކަށް ވާން އެދޭ މީހާ މަތިވެރި އަޚުލާޤުގެ ވެރިއަކަށް ވާންޖެހޭ ކަމަށް ހުކުރު ޚުތުބާގައި ބުނެފިއެވެ.

''ހެޔޮކަމުގެ ތަޅުދަނޑި'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ކައު ރަސޫލާمُحَمَّـد صـلّى الله علـيـه وسـلّمގެ މީސްތަކުން ބައްސަވާފައި ވަނީ ދެބަޔަކަށް ކަމަށެވެ. އެއް ބަޔަކީ ހެޔޮ ކަންކަމަށް ގޮވާލައި ނުބައި ކަންކަން މަނާކުރާ މީހުން ކަމަށާއި އަނެއް ބަޔަކީ ނުބައި ކަންކަމަށް ގޮވަލާ ހެޔޮ ކަންކަން މަނާކުރާ މީހުން ކަމަށެވެ.

ޚުތުބާގައި ބުނީ ކޮން ގިންތިއެއްގެ މީހެއްތޯ އަމިއްލަ ނަފްސާ ކޮންމެ މީހަކު ވެސް ސުވާލުކުރަންޖެހޭ ކަމަށެވެ. އެގޮތުން މިސުވާލަށް ކޮންމެ މީހަކަށް ވެސް ޖަވާބު ހޯދުމަށް ސުލޫކާއި އަޚުލާޤު، މީސްތަކުންނާ މުއާމަލާތު ކުރާ ގޮތަށް ބަލައިގެން އަދި އޭނާ ވަޒީފާ އަދާކުރާ ގޮތަށް ހިސާބު ކޮށްލައިގެން ޖަވާބު ހޯދޭނެ ކަމަށެވެ.

ޚުތުބާގައި ބުނީ ހެޔޮ ކަންކަމަށް ގޮވާލާ މީހަކަށްވުމަށް ކޮންމެ މުސްލިމަކު ވެސް އެދޭނެ ކަމަށާއި، އެފަދަ މީހަކަށްވުމަށް ކަންތައްތަކެއް ކުރަންޖެހޭ ކަމަށެވެ. އެގޮތުން ފުރަތަމަ ކަމަކަށް ތިމާގެ އަމަލުތަކާއި ބަސްތަކުގައި މާތް ﷲއަށް އިޙްލާސްތެރިވުމާއި، ތިމާކުރާ ކޮންމެ އަމަލެއް ބުނާ ކޮންމެ ބަހެއް މާތްﷲއަށް ޚާލިސް ކުރުމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ހެޔޮ ކަންތަކުގެ ތަޅުދަނޑިއަކަށް ވެވޭނީ މާތްﷲ ފަރުޟު ކުރައްވާފައިވާ ނަމާދުތަކާއި ދީނުގެ އެހެނިހެން ފަރްޟުތަކާއި ވާޖިބުތައް ބަރާބަރަށް އަދާކޮށް، މުންކަރާތްތަކާއި ފާހިޝް އަމަލުތަކާ ދުރުހެލިވެގެން ކަމަށެވެ.

ހެޔޮކަމުގެ ތަޅުދަނޑިއަކަށް ވާން އެދޭ މީހާ މަތިވެރި އަޚުލާޤުގެ ވެރިއަކަށް ވާންޖެހޭ ކަމަށާއި، މަތިވެރި އަޚުލާޤުގެ ވެރިޔާ އޭނާގެ ފަސްބައި ހަޑިހުތުރު އަމަލުތަކުން ކިލާކުރަން ބޭނުންނުވާނެ ކަމަށެވެ. އަދި ރިވެތި އަޚުލާޤުގެ ވެރިއަކަށް ވެވޭނީ ރަނގަޅު އެކުވެރީންނާއެކު އުޅެގެން ކަމަށާއި، ރަނގަޅު މަޖިލިސްތަކަށް ގޮސްގެން ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ މުސްލިމުން ނަމޫނާއަކަށް ވާން ޖެހޭނީ ހެޔޮކަންކަމުގައި ކަމަށެވެ. އެހެންކަމުން މުސްލިމުންގެ ހައިސިއްޔަތުން އާދަކާދަތަކާއި ބުނާ ބަސްތަކާއި ސުލޫކާއި އަޚުލާޤު، އިސްލާމް ދީނުގެ އުސޫލުތަކާއި އެއްގޮތަށް ބައްޓަން ކުރަންޖެހޭ ކަމަށެވެ. އަދި ދީނުގެ އުސޫލުތަކާއި އަސާސްތަކާ ޚިލާފު އެއްވެސް ކަމަކާ ގާތްނުވުމަށް ޚުތުބާގައި ވަނީ ގޮވާލާފައެވެ.