ފަނޑިޔާރުކަމަށް ކުރިމަތިލާ މީހުން އިމްތިހާނެއް ހަދަން ޖެހޭ ގޮތަށް އުސޫލެއް
އުސޫލަށް އަމަލުކުރަން ފަށާނީ އަންނަ އަހަރުގެ ޖެނުއަރީ އެކަކުން ފެށިގެންް
ފަނޑިޔާރުންގެ މަހާސިންތާ 2022 އިފްތިތާހުކުރުމަށް ބޭއްވި ރަސްމިއްޔާތު
ފަނޑިޔާރުކަމަށް ކުރިމަތިލާ މީހުންގެ ފެންވަރު ވަޒަން ކުރަން އިމްތިހާނެއް ފުރިހަމަ ކުރަން ޖެހޭ ގޮތަށް, ޖުޑީޝަލް ސަރވިސް ކޮމިޝަން (ޖޭއެސްސީ)ން އުސޫލެއް އެކުލަވާލައިފިއެވެ.
ޖޭއެސްސީން ބުރާސްފަތި ދުވަހު ނެރުނު ބަޔާނެއްގައި ވަނީ، ފަނޑިޔާރު ކަމަށް ކުރިމަތިލުމުގެ އެޕްލިކޭޝަން މަރުހަލާގެ ތެރެއިން އިމްތިހާނެއް ފުރިހަމަ ކުރަން ޖެހޭ ގޮތަށް ފަނޑިޔާރުން އައްޔަން ކުރުުމުގެ ސިޔާސަތަށް ބަދަލު ގެނެސްފައިވާ ކަމަށެވެ.
އަންނަ އަހަރުގެ ޖެނުއަރީ އެކަކުން ފެށިގެންް އަމަލު ކުރަން ފަށާ މި އުސޫލުގެ ދަށުން، އެ ކޮމިޝަނުން ތައްޔާރުކުރާ އިމްތިހާނުން، ފަނޑިޔާރު ކަމަށް ކުރިމަތިލާ މީހުންގެ ގާނޫނީ އިލްމު ހުރި ވަރާއި ފެންވަރު ވަޒަންކުރެވޭނެ ކަމަށް ޖޭއެސްސީން ބުނެއެވެ.
ފަނޑިޔާރުކަމަށް ކުރިމަތިލާ މީހުންގެ ތެރެއިން އެންމެ ރަނގަޅަށް ގާނޫނުތަކާއި އިޖުރާއަތުތައް ތަތުބީގުކުރާ މީހުންނާއި، ސުލޫކީގޮތުން ވެސް އަމަލުތައް ބަހައްޓަންޖެހޭ ގޮތް އެންމެ ރަނގަޅަށް އެނގޭ މީހުން ވަޒަން ކުރެވޭނެ ކަމަށްވެސް ކޮމިޝަނުން ބުންޏެވެ.
މި އުސޫލު އެކުލަވާލީ ކޯޓުތަކަށް އައްޔަންކުރާ ފަނޑިޔާރުންނަކީ ގާބިލު ބައެއްކަން ކަށަވަރުކުރުމުގެ ގޮތުން ކަމަށް ޖޭއެސްސީން ބުންޏެވެ.
