ޑޯޓްމަންޑާއި ޗެލްސީގެ ކުރިމަތިލުން ނިމުނީ ހަމަހަމަވެގެން

އައު ސީޒަނަށް ތައްޔާރުވަމުން އަންނަ ޗެލްސީން ކުޅުނު ރަހުމަތްތެރިކަމުގެ މެޗުގައި ޖަރުމަނުގެ ބޮރޫޝިއާ ޑޯޓްމަންޑާ ވާދަކޮށް އެއްވަރުވެއްޖެ އެވެ.

ދެ ޓީމު ބައްދަލު ކުރި މެޗު ނިމުނީ 1-1 އިން އެއްވަރުވެގެންނެވެ. މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ރަނގަޅު ފުރުސަތު ލިބި، ބޭކާރުވެފަ އެވެ. ދެ ޓީމުން ވެސް މެޗުގައި ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފަށް ނުކުމެ މެޗުގައި އެންމެ ފުރަތަަމަ ލަނޑު ޖަހައި ކުރި ހޯދީ ޑޯޓްމަންޑުންނެވެ. މެޗުގެ 80 ވަނަ މިނެޓުގައި ޑޯޓްމަންޑަށް ލީޑު ނަގައިދިނީ މާރިއުސް ވޮލްފް އެވެ. ނަމަވެސް އޭގެ ނުވަ މިނެޓު ފަހުން ޗެލްސީން ވަނީ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަަމަ ކޮށްދިނީ މޭސަން ބާސްޓޯ އެވެ.

މެޗަށްފަހު ޑޯޓްމަންޑުގެ ކޯޗު ބުނީ އައު ސީޒަނަށް ޓީމު ތައްޔާރުވުމުން އަންނައިރު ބައިވަރު ގޮންޖެހުންތައް ހުރި ކަމަށެވެ. ނަމަވެސް އެކަން އުޒުރެއްގެ ގޮތުގައި ދައްކަން ބޭނުންނުވާ ކަމަށާއި، ބޭނުން ވަނީ އެންމެ ފުރިހަމަ އަށް ޓީމު ތައްޔާރު ކުރުން ކަމަށް ވެސް އޭނާ ބުންޏެވެ. މިދިޔަ ސީޒަނުގައި ކަންތައް ދިމާވި ހިތްދަތި ގޮތުގެ ހަނދާން ނެތޭހާ ދުވަސް ނުވާ ކަމަށާއި، ކުރިއަށް އޮތް ސީޒަނުގައި އެކަމަށް ވަރަށް ބޮޑަށް ސަމާލުކަން ދޭން ޖެހޭނެ ކަމަށް އޭނާ ދެކެ އެވެ.

ސީޒަން ފެށުމުގެ ކުރިން ޑޯޓްމަންޑުން ރަހުމަތްތެރިކަމުގެ އެއް މެޗު ކުޅޭނެ އެވެ. އެއީ އަޔެކްސްއާ ދެކޮޅަށް މި މަހުގެ ހަ ވަނަ ދުވަހު އެވެ.