ހުޅުމީދޫ މިފްކޯ ބަނދަރުގެ އެއްގަމުތޮށިލައި ނިންމައިފި

އައްޑޫ ސިޓީ ހުޅުމީދޫ މިފްކޯ ބަނދަރު ތަރައްޤީ ކުރުމުގެ މަޝްރޫޢު (ފުރަތަމަ ފިޔަވަހި) ގެ މަސައްކަތުގެ 83 ޕަސެންޓް ނިމިފައިވާކަމަށް އެމަސައްކަތް ކުރަމުން އަންނަ އެމްޓީސީސީން ބުނެފިއެވެ.

އެމްޓީސީސީން ބުނީ ބަނދަރުގެ އެއްގަމުތޮށި ލުމުގެ މަސައްކަތް ނިމިފައިވާކަމަށެވެ. މި މަޝްރޫޢުގެ ދަށުން، 471,380 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 60 މީޓަރުގެ ރިވެޓްމެންޓް ޕްރޮފައިލިންގ މަސައްކަތާއި، 110 މީޓަރުގެ ސަރަޙައްދެއްގައި އެއްގަމުތޮށި ލުމާއި، ބޮލާރޑް އަދި ވީ-ފެންޑަރ ހަރުކުރުމުގެ މަސައްކަތް ހިމެނެއެވެ.

މި މަޝްރޫއަކީ 68.8 މިލިއަން ރުފިޔާގެ މަޝްރޫއެކެވެ.

މިމަސައްކަތް އެމްޓީސީސީ އާ ހަވާލު ކުރީ 30 އޮކްޓޯބަރު 2019ގައެވެ. މިއީ ޑިޒައިން އެންޑް ބިލްޑުގެ އުސޫލުން އެ ކުންފުންޏާ ހަވާލު ކުރި މަޝްރޫއެކެވެ.