އަންހެނުންގެ ވޯލްޑްކަޕުން ވެސް ބްރެޒިލް ކަޓައިފި

އަންހެނުންގެ ވޯލްޑްކަޕުގެ ދެވަނަ ބުރަށް ނުގޮސް, މަޝްހޫރު ބްރެޒިލް ކަޓައިފިއެވެ.

ދުނިޔޭގެ އެންމެ ކާމިޔާބު ފުޓްބޯޅަ ޓީމު ނިސްބަތްވާ ގައުމުގެ އަންހެން ޓީމު ވޯލްޑްކަޕުން ކެޓީ މިއަދު ކުޅުނު މެޗުގައި ޖެމެއިކާ އަތުން މޮޅުނުވެވުމުންނެވެ. ލަނޑެއް ނުޖެހި އެއްވަރުވި މެޗަށްފަހު ބްރެޒިލަށް ލިބުނީ ގްރޫޕުގެ ތިންވަނައެވެ. ހަތް ޕޮއިންޓާއެކު އެއްވަނަ ލިބުނީ ފްރާންސަށެވެ. ދެވަނަ ލިބުނީ ފަސް ޕޮއިންޓާއެކު ޖެމެއިކާއަށެވެ. ބްރެޒިލަށް ތިން މެޗުން ލިބުނީ އެންމެ ހަތަރު ޕޮއިންޓެވެ. ގްރޫޕުގެ ގަދަ ދެ ޓީމުގެ ތެރޭގައި ނުހިމެނުމުން ބްްރެޒިލާއެކު ދެން ކެޓީ ކުޅުނު ތިން މެޗުންވެސް ބަލިވި ޕެނަމާއެވެ. އެ ގައުމުގެ ފަހު މެޗުގައި މިއަދު ފްރާންސް އަތުން ބަލިވީ 6-3ންނެވެ.

ދެވަނަ ބުރަށް ދިއުމަށް ކޮންމެހެން މޮޅުވާން ޖެހިފައި އޮތް މެޗު ބްރެޒިލް ފެށީ އެ ގައުމުގެ ތަޖުރިބާކާރު ފޯވަޑް މާޓާވެސް ފުރަތަމަ 11ގައި ހިމަނައިގެންނެވެ. ނަމަވެސް އަންހެނުންގެ ވޯލްޑްކަޕުގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާއަށް މި މެޗުގައި އެއްކަމެއްވެސް ނުކުރެވުނެވެ.

ބްރެޒިލްގެ އަންހެން ޓީމު ވޯލްޑްކަޕުން ކެޓިއިރު، މިދިޔަ އަހަރުގެ ކުޅުނު ފިރިހެނުންގެ ވޯލްޑްކަޕުން އެގައުމު ކެޓީ ކުއާޓާ ފައިނަލުންނެވެ. ބްރެޒިލަށް އަންހެނުންގެ ވޯލްޑްކަޕުގެ ތައްޓެއް ނުލިބެއެވެ. ފިރިހެނުންގެ މުބާރާތުގެ ތަށި ފަސް ފަހަރު ކާމިޔާބުކުރިނަމަވެސް އެ ތަށި ނުލިބޭތާ މިހާރު 21 އަހަރު ވެއްޖެއެވެ. މިހެންވެ ބްރެޒިލްގެ ފުޓްބޯޅައިގެ ފެންވަރު ދަށްވެއްޖެކަމަށް ގިނަ ބަޔަކު މިހާރު ގަބޫލުކުރެއެވެ.