ޗައިނާގެ މަޝްހޫރު ކުލަބެއް ކަމުގައިވާ ގުއްންޒޯ އެވަގްރޭޑްއަށް ކުޅެމުން އަންނަ ބްރެޒިލްގެ ތަޖުރިބާކާރު މިޑްފިލްޑަރު ޕައުލީނިއޯ ބާސެލޯނާ އަށް ސޮއިކޮށްފި އެވެ.

އުމުރުން 29 އަހަރުގެ މިޑްފިލްޑަރު ބާސާ އަށް ބަދަލުވެފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުން 40 މިލިއަން ޕައުންޑަށެވެ.

މި ސީޒަނަށް ތައްޔާރުވުމުގެ ގޮތުން ބާސާ އިން މާ ގިނަ ކުޅުންތެރިންނެއް އެ ކްލަބަށް ގެނެސްފައެއް ނުވެއެވެ. އެހެންނަމަވެސް އެ ކްލަބުން އަންނަނީ ޓްރާންސްފާ ވިންޑޯ ބަންދުވުމުގެ ކުރިން ގިނަ ކުޅުންތެރިންތަކެއް ހޯދުމުގެ މަސައްކަތް އަދިވެސް ކުރަމުންނެވެ.

ޕައުލީނިއޯ ހޯދުމަށް ބާސާގެ އިތުރުން އެހެން ކްލަބްތަކުންވެސް ވަނީ މަސައްކަތްކޮށްފައެވެ. އޭގެ ތެރޭގައި އޭނާ ކުރިން ކުޅުނު ޓޮޓެންހަމް ހޮޓްސްޕާ އަދި މެންޗެސްޓާ ސިޓީ ހިމެނެއެވެ.

ޕައުލީނިއޯ އަކީ މީގެކުރިން ބްރެޒިލްގެ ކޮރިންތިއަންސް އަދި އިނގިރޭސި ކްލަބު ޓޮޓެންހަމްއަށްވެސް ކުޅެފައިވާ ކުޅުންތެރިއެކެވެ. ބްރެޒިލްގެ ގައުމީ ޓީމުގައިވެސް މުހިންމު ދައުރެއް އަދާކުރަމުން އަންނަ ޕައުލީނިއޯ ޗައިނާއަށް ބަދަލުވީ 2015 ވަނަ އަހަރުގެ އޭޕްރީލް މަހުގެތޭގައެވެ. އޭނާ އެ ޓީމަށް ބަދަލުވެފައިވަނީ 14 މިލިޔަން ޔޫރޯއަށެވެ.

ބާސާއިން ވަނީ ލިވަޕޫލް އަދި ބްރެޒިލްގެ އެޓޭކިމް މިޑްފިލްޑަރު ފިލިޕް ކުޓީނީއޯ ހޯދުމުގެ މަސަތްކަތް ވެސް ފަށާފަ އެވެ. އެގޮތުން ބާސާއިން ކުޓީނިޔޯ ހޯދުމަށް މިހާތަނަށް ދެ ބިޑެއް ކޮށްފައިވާއިރު، ލިވަޕޫލުން ވަނީ އެ ދެ ބިޑަށްވެސް ފުރަގަސްދީފައެވެ. ރިޕޯޓްތައް ބުނާގޮތުން ލިވަޕޫލުން ކުޓީނިއޯ ވިއްކާލާނީ 145 މިލިއަން ޕައުންޑަށެވެ.