ކ. މާލެ
|
6 ސެޕްޓެންބަރ 2017 | ބުދަ 10:42
ބްރެޒިލްއާ ވެނެޒުއޭލާ ބައްދަލުކުރި މެޗުގެ ތެރެއިން
ބްރެޒިލްއާ ވެނެޒުއޭލާ ބައްދަލުކުރި މެޗުގެ ތެރެއިން
ގެޓީ އިމޭޖަސް
ވޯލްޑްކަޕް ކޮލިފައިން
ވޯލްޑްކަޕް ކޮލިފައިން: ބްރެޒިލް އެއްވަރުވިއިރު އުރުގުއޭ މޮޅުވެއްޖެ
 
އުރުގުއޭއިން ވަނީ 2-1 ޕެރަގުއޭ ބަލިކޮށްފަ
 
ކޮލޮމްބިއާއާ ބްރެޒިލް ބައްދަލުކުރި މެޗު ނިމުނީ 1-1 އެއްވަރުވެގެން

ފީފާ ވޯލްޑްކަޕް ކޮލިފައިންގައި ބްރެޒިލް ކުޅުނު މެޗުން އެ ޓީމު އެއްވަރުވިއިރު އުރުގުއޭ މޮޅުވެއްޖެއެވެ.

ކޮލޮމްބިއާގައި ކުޅުނު މި މެޗަށް ބްރެޒިލްއިން ނުކުތީ ވޯލްޑްކަޕް ކޮލިފައިންގައި އެ ޓީމުން ކުޅުނު މެޗުތަކުގެ ތެރެއިން ޖެހިޖެހިގެން 10 ވަނަ މެޗު ކާމިޔާބު ކުރުމަށެވެ. އެހެނަސް ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔަ މި މެޗުގައި ކޮލޮމްބިއާއިން ވަނީ ބްރެޒިލްއިން ކުރަމުންއައި މި އުއްމީދު ފުނޑާލާފައެވެ. މި މެޗު އެއްވަރުވެފައި ވަނީ 1-1 ގެ ނަތީޖާއަކުންނެވެ.  

މެޗުގެ ފުރަތަމަ ހާފުގެ ކުރީކޮޅު ބްރެޒިލްގެ ފަރާތުން މޮޅު ކުޅުމެއް ފެނިގެން ދިޔަ ނަމަވެސް އެ ޓީމުން އުފެއްދި ހަމަލާތައް ކޮލޮމްބިއާގެ ކީޕަރުވަނީ ހުށިޔާރު ކަމާއެކު ދިފާއު ކޮށްފައެވެ. އެގޮތުން މެޗުގެ 29 ވަނަ މިނެޓުގައި ނޭމާ ތަނަވަސް ކޮށްދިން ފުރުސަތަކުން ފިރްމީނޯ ފޮނުވާލި ބާރު ހަމަލާގެ ވެސް ހުރަހަކަށްވީ ކޮލޮމްބިއާގެ ތަޖުރިބާކާރު ކީޕަރު ޑޭވިޑް އޮސްޕީނާއެވެ.

އެހެން ނަމަވެސް ފުރަތަމަ ހާފުގެ އިތުރު ވަގުތުގެ ތެރޭގައި ނޭމާ ތަނަވަސް ކޮށްދިން ފުރުސަތެއްގައި ވިލިއަން ފޮނުވާލި ހަމަލާ އޭނާއަށް ހުއްޓުވޭގޮތެއް ނުވިއެވެ. މި ލަނޑާއެކު ފުރަތަމަ ހާފު ނިމިގެން ދިޔައީ 1-0 އަކުން ކޮލޮމްބިއާގެ މައްޗަށް ބްރެޒިލް ކުރީގައި އޮވެގެންނެވެ.

ދެވަނަ ހާފުގައި ކޮލޮމްބިއާއިން އެ ޓީމުގެ ކުޅުން ރަނގަޅުކޮށް ބްރެޒިލްގެ ހާފަށް ބާރުބޮޑު ކުރުމުގެ ނަތީޖާއަކަށް ވެގެން ދިޔައީ މެޗުގެ 56 ވަނަ މިނެޓުގައި ކޮލޮމްބިއާގެ ސެންޓިއާގޯ އެރިއާސް ނަގައިދިން ހުރަހަކުން އިތުބާރު ފޯވާޑް ރަޑަމައެލް ފަލްކާއޯ ބޮލުން ލަނޑެއް ކާމިޔާބު ކޮށްދީ މެޗުގެ ނަތީޖާ ހަމަހަމަކޮށްދިނެވެ.

އުރުގުއޭއާ ޕެރަގުއޭ ވާދަކުރި މެޗު އުރުގުއޭއިން ކާމިޔާބު ކޮށްފައިވަނީ 2-1 ގެ ނަތީޖާއަކުންނެވެ. މި މެޗުގައި ފެނިގެންދިޔަ ހުރިހާ ލަނޑެއްވެސް ފެނިގެން ގޮސަފައިވަނީ މެޗުގެ ފަހު 15 މިނެޓުގެ ތެރޭގައެވެ. އެގޮތުން އުރުގުއޭގެ ފުރަތަމަ ލަނޑު މެޗުގެ 76 ވަނަ މިނެޓުގައި ކާމިޔާބު ކޮށްދިނީ އެ ޓީމުގެ މިޑްފީލްޑާ ފެޑެރީކޯ ވަލްވާޑޭއެވެ. އަދި އެ ޓީމުގެ ދެވަނަ ލަނޑަކީ ޕެރަގުއޭގެ ގުސްޓާވޯ ގޯމޭޒްގެ އަތުން ބައިކޮޅަށް ވަން ލަނޑެކެވެ. ޕެރަގުއޭގެ ހަމައެކަނި ލަނޑު މެޗުގެ 88 ވަނަ މިނެޓުގައި އެ ޓީމަށް ކާމިޔާބު ކޮށްދިނީ އެ ޓީމުގެ ފޯވާޑް އެންހެލް ރޮމޭރޯއެވެ.

ބްރެޒިލްއިން ވޯލްޑްކަޕްގެ ޖާގައެއް ކަށަވަރު ކޮށްފައިވާއިރު ކޮލޮމްބިއާ އޮތީ ކުޅުނު 15 މެޗުން ލިބުނު 25 ޕޮއިންޓާއެކު ތާވަލުގެ ދެވަނައިގައެވެ. އަދި ޕެރަގުއޭއާ ދެކޮޅަށް ކުޅުނު މެޗުން މޮޅުވުމާއެކު އުރުގުއޭ އޮތީ ކުޅުނު 15 މެޗުން ލިބުނު 24 ޕޮއިންޓާއެކު ތާވަލުގެ ތިންވަނައިގައެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
0%
0%
100%
0%
0%
0%
ކޮމެންޓް