ނޭމާ ޖޫނިއާސް ފައިވް: ޖަޕާން އަތުން ބަލިވެ ގަދަ 16 އަށް ނުގޮސް ރާއްޖެ ކަޓައިފި

ނޭމާ ޖޫނިއާސް ފައިވް މުބާރާތުގައި ޖަޕާން އަތުން ބަލިވެ، ގަދަ 16 އަށް ނުގޮސް ރާއްޖޭގެ ކްލަބް ޓީންއޭޖް ކަޓައިފި އެވެ.

މުބާރާތުގެ ދެވަނަ ބުރުގައި ހޮނިހިރު ދުވަހުގެ ރޭ ޖަޕާނާ ދެކޮޅަށް ރާއްޖެ ނިކުތް އިރު، އެޓީމު އަތުން ރާއްޖެ ބަލިވީ 0-5 ގެ ތަފާތުބޮޑު ނަތީޖާއަކުންނެވެ.

މި މުބާރާތުގައި ޓީނޭޖް މޮޅު ކުޅުމެއް ދައްކާފައިވާއިރު، އެޓީމަކީ މި މުބާރާތުގެ ދެވަނަ ބުރަށް ދަތުރުކުރި ރާއްޖޭގެ ފުރަތަމަ ޓީމެވެ.

މުބާރާތުގެ ގްރޫޕް ސްޓޭޖުގައި ޓީނޭޖް ބަލިވީ މެލޭޝިއާ އަދި ސްވިޑެން އަތުންނެވެ. މެލޭޝިއާ އަތުން 0-5 ގެ ނަތީޖާއަކުން ރާއްޖެ ބަލިވިއިރު، ސްވިޑެން އަތުން ރާއްޖެ ބަލިވީ ފަހުވަގުތު 2-3 ގެ ނަތީޖާއަކުންނެވެ.

އެހެންނަމަވެސް ވަރުގަދަ ސްޕެއިން އަދި އިންޑިއާ އަތުން ޓީނޭޖް ވަނީ މޮޅުވެފައެވެ. އިންޑިއާ އަތުން 1-5 ގެ ނަތީޖާއިން ރާއްޖެ މޮޅުވިއިރު، ސްޕެއިން އަތުން ރާއްޖެ މޮޅުވީ 2-5 ގެ ނަތީޖާއަކުންނެވެ.

ޖުމްލަ 53 ގައުމަކުން 104،228 ކުޅުންތެރިން ބައިވެރިވާ މި މުބާރާތުގައި ޓީނޭޖް މުބާރާތާ އަލްވަދާއުކީ ނަމަވެސް އެޓީމު ވަނީ ރާއްޖެއަށް ހިނިތުންވުން ގެނެސްދީފައެވެ.

ޓީނޭޖުގައި ހިމެނޭ ކުޅުންތެރިންނަކީ އިސްމާއިލް ފާތިހް، ޔޫސުފް އުމަރު، މުހައްމަދު ރިއްފަތު (ރިއްޕެ)، އަހްމަދު އަޔާޒް (އަޔާ)، ރިހާމް އަބްދުލް ގާނީ (ބޮބީ)، ހުސެން ޝަރީފް (އޮންލީ) އަދި އިސްމާއިލް މުބީން (މުއްކި) އެވެ.

ވޭތުވެދިޔަ އަހަރު މިމުބާރާތުގެ ޗެމްޕިއަން ޓީމު ވަނީ ވީއައިޕީ ޓިކެޓުގައި ބާސެލޯނާ އަށް ގޮސް ބާސާގެ ޓުރެއިނިން ގުރައުންޑުގައި ނޭމާ އާ ބައްދަލުކޮށްފައެވެ. ނޭމާ ބުނެފައި ވަނީ މިއަހަރު ވެސް ފައިނަލުން މޮޅުވެ ގަދަ ފަހެއްގައި ހިމެނޭނެ ކުޅުންތެރިންނާ ބައްދަލު ކުރުމަށް ކެތް މަދުވެފައިވާ ކަމަށެވެ.