ދަރިފުޅު އެކަނި ޓެކްސީއެއްގައި ފޮނުވަން ބިރުގަނޭތަ؟

ދިރިއުޅުމުގެ ކަންކަން ހަމަޖެހިފައި އޮންނަ ގޮތުން، ބައެއް ތަންތަނަށް ގޮސް ހެދުމަށް ޓެކްސީގެ ޚިދުމަތް ހޯދަން ޖެހެއެވެ. މި ގޮތަށް ޓެކްސީގެ ޚިދުމަތް ހޯދާ އިރު، ޢުމުރު ދުވަހުވެސް ބައްދަލު ނުވާ މީހަކާއެކު، ކުޑަކުޑަ ކާރެއްގެ ތެރޭގައި އެތައް އިރެއް ހޭދަ ކުރަން ޖެހޭ ފަހަރު އާދެއެވެ. އެ ތަޖުރިބާއަކީ ބައެއް މީހުންނަށް ބަރުދާސްތު ކުރަން ދަތި ވޭނަކަށްވެސް ވެދެއެވެ. އެކި ގޮތް ގޮތުން ފުރައްސާރައާއި ކުރިމަތިވާ ފަހަރު އާދެއެވެ. ނޫނީ، އަޑު އަހަން ބޭނުން ނުވާ އެތައް ވާހަކައެއް އަޑުއަހަން ޖެހި، ދައްކަން ބޭނުންވާ އެތައް ވާހަކައެއް ދައްކަން ޖެހޭ ފަހަރުވެސް އާދެއެވެ. ނަމަވެސް، ކޮންމެ ކޮންމެ މީހަކީ އަމިއްލައަށް ކާރު ދުއްވޭ މީހަކަށް ނުވެދާނެއެވެ. އެކަހަލަ މީހުންނަށް އޮތް އެންމެ ރަނގަޅު އެއް ހައްލަކީ ޑްރައިވަރަކީ ނުލާ، އޭގެ އަމިއްލަ ޒާތުގައި ދުވާ ޓެކްސީއެކޭ ދަންނަވައިފިނަމަ، އެކަމަށް އެއްބަސްވެލައްވާނަންތޯއެވެ؟

ޑްރައިވަރަކާ ނުލާ، އޭގެ ޒާތުގައި އަމިއްލައަށް މަންޒިލްތަކަށް ދަތުރު ކުރާ ޓެކްސީގެ ޚިދުމަތް އެންމެ ފުޅާ ދާއިރާއެއްގައި ޕްރޮމޯޓް ކުރަމުން އަންނަ އެއް ޤައުމަކީ އެކުވެރި ޢަރަބި ޢިމާރާތް (ޔޫއޭއީ) އެވެ. ޑްރައިވަރަކާ ނުލާ ދުވާ ޓެކްސީގެ އާދައަށް، އަބޫދާބީގެ ރަށްވެހިން އަހުލުވެރި ކުރުވުމަށްޓަކާ، ސާދިޔާތާއި ޔަސް އައިލަންޑްގައި، ޓެކްސީ ޚިދުމަތް ދެމުން ދަނީ އެއްވެސް އަގެއް ނުނަގައެވެ. އެންމެ ޒަމާނީ ޓެކްނޮލޮޖީއާއެކު ފަރުމާކޮށްފައި ވާ، ޑްރައިވަރަކާ ނުލާ ދުވާ ޓެކްސީތައް ތަޖުރިބާ ކުރުމުގެ ފުރުޞަތުގެ ބޭނުން، ގިނަ ބަޔަކު މިހާރުވެސް ދަނީ ހިފަމުންނެވެ.

ޑްރައިވަރަކާ ނުލާ މިނިވަންކަމާއެކު ދަތުރު ކުރާ ޓެކްސީގެ މަޝްރޫޢަކީ، ޔޫއޭއީގެ އިންޓަގްރޭޓަޑް ޓްރާންސްޕޯރޓް ސެންޓަރ (އައިޓީސީ)އާއި އޭގެ ޒާތުގައި އަމިއްލައަށް ދުވާ ކާރުގެ ޓެކްނޮލޮޖީ އުފައްދާ ބައިނަލްއަޤުވާމީ ކުންފުނި، 'ވީރައިޑް' ގުޅިގެން ހިންގާ މަޝްރޫޢެކެވެ. ޔޫއޭއީގައި މި މަޝްރޫޢު ފުޅާ ކުރަމުން ދަނީ، ދަތުރުފަތުރުގެ ޤައުމީ ނެޓްވޯރކްގެ ތެރެއަށް މިފަދަ ކާރުތައް ވެއްދުމުގެ މަޤްޞަދުގައެވެ.

އެކުވެރި ޢަރަބި އިމާރާތުގެ މަގުތަކަށް، ޑްރައިވަރަކާ ނުލާ ދުވާ ޓެކްސީތައް އެންމެ ފުރަތަމަ ތަޢާރަފު ކުރީ 2021 ވަނަ އަހަރުގެ ތެރޭގައެވެ. އޭގެ ފަހުން، ޔޫއޭއީގެ މަގުތަކުގައި އެ ކާރުތައް ދުވާ، ނުދުވާ ގޮތް ބަލާ، އެކި ކަހަލަ ޓެސްޓުތައް ހެދުމަށް އަހަރަކަށް ވުރެ ގިނަ ދުވަސް ވަނީ ހޭދަ ކޮށްފައެވެ.

ޑްރައިވަރަކާ ނުލާ ދުވާ ޓެކްސީތައް ފަރުމާ ކޮށްފައި ވަނީ، އެކަމަށް ޚާއްޞަ ސެންސަރުތަކަކާ އެކީގައެވެ. މި ފަދަ ޓެކްސީއެއްގައި 10 ކެމެރާ ހަރުކޮށްފައި ހުރެއެވެ. އަދި ހުންގާނުގެ ފަހަތުގައި، ރައްކާތެރިކަން ކަށަވަރު ކުރާނެ ސޭފްޓީ އޮފިސަރަކުވެސް އިނދެއެވެ. މި ޓެކްސީތަކަކީ އެއްގަމު ދަތުރުތަކުގައި ބޭނުން ކުރަން ރައްކާތެރި އުޅަނދުތަކެއް ކަމުގެ ޔަޤީންކަން، ވީރައިޑްއިން ދެއެވެ.

ޑްރައިވަރަކާ ނުލާ ދަތުރުކުރާ ޓެކްސީތައް ބޭނުން ކުރުމަށް ވީރައިޑަށް ޔޫއޭއީގެ ކަމާ ބެހޭ ފަރާތްތަކުން ދިން ހުއްދައަކީ، މެދުއިރުމަތީގެ ޤައުމެއްގައި ދިން މިފަދަ ފުރަތަމަ ހުއްދައެވެ. މި މަޝްރޫޢު އަމާޒު ހިފާފައި ވަނީ 2030 ވަނަ އަހަރު އަންނައިރު، ޔޫއޭއީގައި ކުރާ ދަތުރުފަތުރުގެ، އެންމެ މަދުވެގެން 25 ޕަސެންޓް ހިއްސާ ކުރުމަށެވެ.