ފްރޭންކްފާޓް ދޫކޮށް ޖިބްރީލް ސޯ ސެވިއްޔާ އަށް

ޖަރުމަނުގެ ފްރޭންކްފާޓަށް ކުޅެމުން އައި ސްވިޒަލެންޑުގެ ޖިބްރީލް ސޯ އެ ކުލަބު ދޫކޮށް ސްޕެއިންގެ ސެވިއްޔާ އަށް ބަދަލުވާން ނިންމައިފި އެވެ.

އުމުރުން 26 އަހަރުގެ ކުޅުންތެރިޔާ ފެރޭންކްފާޓަށް ބަދަލުވީ 2019 ވަނަ އަހަރު އެވެ. އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ އެއް އަހަރު އޮއްވާ، ސެވިއްޔާ އަށް ބަދަލުވުމަށް މިހާރު ސޯ ވަނީ ނިންމައިފަ އެވެ. ސޯ ހޯދުމަށް ސެވިއްޔާ އިން ހުށަހެޅި ހުށަހެޅުން ކުޅުންތެރިޔާ ވަނީ ޤަބޫލުކޮށްފަ އެވެ. ކުލަބުގައި ހުންނަން ސޯ ބޭނުންނުވާތީ، އޭނާ ދޫކޮށްލުމަށް ފްރޭންކްފާޓުން ހުރަސްއަޅަން ބޭނުންނުވާ ކަމަށް ރިޕޯޓުތައް ބުނެ އެވެ. އެ ކުލަބު ދޫކޮށް ސޯ ސެވިއްޔާ އަށް ބަދަލުވާނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން ސެވިއްޔާ އާއެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. އޭނާ ހޯދުމަށް ސެވިއްޔާ އިން 13 ނުވަތަ 14 މިލިއަން ޔޫރޯ ޚަރަދު ކުރާނެ އެވެ. ސެވިއްޔާ އަށް ބަދަލުވުމަށް ފުރިހަމަ ކުރަން ޖެހޭ މެޑިކަލްގެ ކަންކަން ބުދަ ދުވަހު ކުރިއަށް ގެންދިޔުމަށް ވަނީ ރޭވިފަ އެވެ.

ސްވިޒަލެންޑުގެ ޤައުމީ ޓީމުގައި ވެސް ހިމެނޭ ސޯ އޭނާގެ ސީނިއާ ކެރިއަރު ފެށީ 2014 ވަނަ އަހަރު ސްވިޒަލެންޑުގެ ކުލަބަކުންނެވެ. ފްރޭންކްފާޓަށް ބަދަލުވެ އޭނާ ވަނީ އެ ކުލަބަށް ކުޅެދިން 120 މެޗުގައި ހަތް ލަނޑު ޖަހައިފަ އެވެ. ސޯ ހޯދުމަށް އެންމެ ބޮޑަށް ބޭނުންވީ ސެވިއްޔާގެ ކޯޗު ޖޯޖް ލުއިސް މެންޑިލިބާ ކަމަށް މީޑިއާތަކުން ބުނެ އެވެ.