ކެރިއަރުގެ ފަަހު ދުވަސްތައް ހޭދަ ކުރަން މިއަށްވުރެ ރަނގަޅު ކުލަބެއް ނެތް: ކަވާނީ

ކެރިއަރުގެ އެންމެ ފަހު ދުވަސްތައް ހޭދަކުރަން އާޖެންޓީނާގެ ބޮކާ ޖޫނިއާސް އަށް ވުރެ ރަނގަޅު އެހެން ކުލަބެއް ނެތް ކަމަށް އުރުގުއޭގެ ފޯވާޑް އެޑިންސަން ކަވާނީ ބުނެފި އެވެ.

ކަވާނީ މިހެން ބުނީ ބޮކާ ޖޫނިއާސްގެ ކުޅުންތެރިޔެއްގެ ގޮތުގަައި ރަސްމީކޮށް އޭނާ ދައްކާލުމަށް ބޭއްވި އިވެންޓުގަ އެވެ. ކަވާނީ ބުނީ، ކެރިއަރުގެ އެންމެ ފަހު ދުވަސްތައް ހޭދަކުރަން ބޭނުންވީ އަމިއްލަ ޤައުމާ ކައިރީގައި ކަމަށެވެ. އެހެންކަމުން އާޖެންޓީނާ އަކީ އެކަމަށް އެންމެ ރަނގަޅު ޤައުމު ކަމަށް އޭނާ ވަނީ ބުނެފަ އެވެ. ވަކިން ޚާއްސަކޮށް ކެރިއަރުގެ ފަހު ދުވަސްތައް ހޭދަ ކުރުމަށް ބޮކާ ޖޫނިއާސް އަށްވުރެ ރަނގަޅު އެހެން ކުލަބެއް ނެތް ކަމަށް ވެސް އޭނާ ބުންޏެވެ. އިތުރަށް ކަވާނީ ބުނީ ބޮކާ ޖޫނިއާސް އަށް އޭނާ ބަދަލުވީ ޓާގެޓުތަކެއް އޮވެގެން ކަމަށެވެ. އެގޮތުން އެންމެ އިސްކަމެއް ދޭނީ އެ ކުލަބަށް އޭނާގެ ފުރިހަމަ އެއްބާރުލުން ދިނުމަށް ކަމަށް ވެސް ކަވާނީ ވަނީ ބުނެފަ އެވެ. އެ ކުލަބާއެކު ކާމިޔާބީ ހޯދަން ބޭނުންވާކަން ފާހަގަކޮށް ކަވާނީ ވަނީ ކުލަބުގެ އިސްވެރިންނާއި، ސަޕޯޓަރުންނަށް ޝުކުރު އަދާ ކޮށްފަ އެވެ.

އުމުރުން 36 އަހަރުގެ ކުޅުންތެރިޔާ ބޮކާ ޖޫނިއާސް އަށް ބަދަލުވީ 18 މަސް ދުވަހުގެ އެއްބަސްވުމެއްގެ ދަށުންނެވެ. އެ ކުލަބުގެ ކުޅުންތެރިޔެއްގެ ގޮތުގައި ކަވާނީ ދައްކާލުމަށް ބޭއްވި އިވެންޓަށް ވަނީ 30،000 (ތިރީސް ހާސް) އަށްވުރެ ގިނަ ސަޕޯޓަރުން ޖަމާވެފަ އެވެ. އުރުގުއޭގެ ޑަނުބިއޯ އިން ސީނިއާ ކެރިއަރު ފެށި ކަވާނީ ވަނީ ޔޫރަޕުގެ ގިނަ ކުލަބުތަކަށް ކުޅެފަ އެވެ. އޭގެ ތެރޭގައި އޭނާ އެންމެ ފަހުން ކުޅުނު ވެލެންސިއާގެ އިތުރުން ދެން ހިމެނެނީ، ނަޕޯލީ، މެންޗެސްޓަރ ޔުނައިޓެޑު އަދި ޕެރިސް ސެއިންޓް ޖާމަން (ޕީއެސްޖީ) އެވެ. ކަވާނީ އަންނަނީ 2008 ވަނަ އަހަރުން ފެށިގެން އުރުގުއޭ ޤައުމީ ޓީމަށް ވެސް ކުޅެމުންނެވެ. އުރުގުއޭ އާއެކު އޭނާ ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕްގައި ވެސް ވާދަކޮށްފަ އެވެ.