މި ސަރަހައްދުގައި ވޮލީ ކުރިވެރުވުމަށް އެންމެ ބޮޑު ހޭދައެއް ކުރަނީ ރާއްޖެއިން: ލަތީބެ

މި ސަރަހައްދުގައި ވެސް ވޯލީބޯޅަ ކުރިއެރުވުމަށް އެންމެ ބޮޑު ހޭދައެއް ކުރަމުންދަނީ ރާއްޖެއިން ކަމަށް ވޮލީބޯލް އެސޯސިއޭޝަން އޮފް މޯލްޑިވްސްގެ ރައީސް މުހައްމަދު ލަތީފް (ލަތީބެ) ވިދާޅުވެއްޖެއެވެ.

ލަތީބެ މިހެން ވިދާޅުވީ އާލާ 19 ވަނަ އިންޓަރ ރިސޯޓް ވޮލީބޯޅަ މުބާރާތް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

އެ ރަސްމިއްޔާތުގައި ވާހަކަ ދައްކަވަމުން ލަތީބެ ވިދާޅުވީ މި ސަރުކާރުން ވޮލީ ކުރިއެރުވުމަށް ވަރަށް ގިނަ މަސައްކަތްތަކެއް ކުރާ ކަމަށާއި އެގޮތުން ވޮލީ ތަރައްގީ ކުރުމަށް އެންމެ ބޮޑު ހޭދައެއްކޮށް އެންމެ ބޮޑު މަސައްކަތްތަކެއް ކުރަމުންދަނީ ރާއްޖެއިން ކަމަށެވެ. އެގޮތުން ގައުމީ ޓީމުގެ ކުޅުންތެރިންނަށް މުސާރަ ކަނޑައަޅައި، ބައިނަލްއަގްވާމީ ގިނަ މުބާރާތްތަކާއި ތަމްރީން ދަތުރުތައް ބޭއްވެމުންދާ ކަމަށް ލަތީބެ ފާހަގަކުރެއްވިއެވެ.

އިންޓަރ ރިސޯޓް މުބާރާތާއި ގުޅޭ ގޮތުން ވާހަކަ ދައްކަމުން ލަތީބެ ވިދާޅުވީ އެމުބާރާތަކީ އެ އެސޯސިއޭޝަނުން ނުހަނު އިސްކަމެއް ދީގެން ކުރިޔަށް ގެންދާ މުބާރާތެއް ކަމަށާއި މި މުބާރާތް ކުރިޔަށް ގެންދިޔުމަށް ލިބޭ އެންމެ ބޮޑު ސަބަބަކީ މުބާރާތް ބޭއްވުމަށް ރިސޯޓްތަކުން ދެއްވާ އެހީތެރިކަމާއި އެއްބާރުލުން ކަމަށެވެ. ހަމައެހެންމެ މިއީ ފޯރިގަދަ އަދި ރަނގަޅު އިންތިޒާމްތަކާ އެކު ބޭއްވޭ މުބާރާތަކަށް ހެދުމަށް މަސައްކަތްކުރައްވާ ކަމަށް ވެސް ލަތީބެ ވިދާޅުވިއެވެ.

މި ރަސްމިއްޔާތު ޝަރަފުވެރި ކޮށްދެއްވީ ޓުއަރިޒަމް މިނިސްޓަރު މޫސާ ޒަމީރެވެ.