ޚިޔާލު ފާޅުކުރުމުގެ މިނިވަން ކަމަކީ އިންސާނަކަށް ވީތީ ކޮންމެ މީހަކަށް ވެސް ލިބިދީފައި އޮންނަ އަސާސީ ޙައްޤެކެވެ. ދަތި ހާލުގައި ދިރިއުޅެން މަޖުބޫރު ވާ ވަރަކަށް، އެ ޙައްޤުގެ ބޭނުން ކުރަން ޖެހޭ މިންވަރު އިތުރުވެއެވެ. ކިތަންމެ ފުރުޞަތު ހަނިވި ކަމުގައި ވީ ނަމަވެސް، ވީ ވަރަކުން އެމީހެއްގެ އަޑު އިއްވޭތޯ ކޮންމެ މީހަކުވެސް މަސައްކަތް ކުރެއެވެ.
ޖުލައި 30 ވަނަ ދުވަހު، ޣައްޒާއިންވެސް ފެނިގެން ދިޔައީ އެފަދަ މަންޒަރެކެވެ. ފަލަސްޠީނުގެ އެތައް ސަތޭކަ ރައްޔިތުންނެއް ޣައްޒާގެ މަގުތަކަށް ނުކުމެ މުޒާހަރާ ކުރިއެވެ. ގޮވަމުން ދިޔައީ މިދިޔަ 16 އަހަރަށް ދެމިގެން ދިޔަ ފަލަސްޠީނުގެ ދާޚިލީ ބައިބައިވުންތަކަށް ނިމުމެއް ގެނައުމަށާއި، ޣައްޒާއަށް ކުރިމަތިލާން ޖެހިފައިވާ ކަރަންޓު ނުލިބުމުގެ މައްސަލަ ހައްލު ކުރުމަށެވެ.
ފަލަސްޠީނުގެ ރައްޔިތުން، ޣައްޒާގެ މަގުތަކުގައި މުޒާހަރާ ކުރަމުން ދިޔައިރު، ފަލަސްޠީނުގެ ސިޔާސީ ފެކްޝަންތަކުން ދިޔައީ މިޞްރުގެ ވެރިރަށް ޤާޚިރާގައި މަޝްވަރާތަކެއް ކުރަމުންނެވެ. މަޝްވަރާތަކުގެ އިސްވެރިއެއްގެ ގޮތުގައި ހުންނެވީ ފަލަސްޠީނުގެ ރައީސް މަހަމޫދު އައްބާސްއެވެ. ޣައްޒާ ކޮންޓްރޯލް ކުރަމުންދާ ހަމާސް ޖަމާޢަތުގެ ލީޑަރު، އިސްމާޢީލު ހަނިއްޔާއާއާއި އެނޫންވެސް ސިޔާސީ ފެކްޝަންތަކުގެ މެންބަރުން، އެ މަޝްވަރާތަކުގައި ބައިވެރިވިއެވެ.
އައްބާސްއާއި ހަނިއްޔާއާ ދެމެދު އުފެދުނު ޚިޔާލު ތަފާތުވުންތަކަށް، 2007 ވަނަ އަހަރުން ފެށިގެން އަދާ ޖެހުނު އިރުވެސް އޮތީ ހައްލު ލިބޭ ގޮތް ނުވެއެވެ. ޔަހޫދީ އިޒްރޭލާއެކު ސުލްޙައިގެ އެއްވެސް އެއްބަސްވުމެއް އެކުލަވާލުމަށް ހަމާސް ޖަމާއަތުން ދެކޮޅު ހަދައެވެ. އެންމެ ފަހުން، މުޅި ޣައްޒާގެ ކޮންޓްރޯލް ހަމާސް ޖަމާޢަތުން ނެގިއެވެ. ހުޅަނގުގެ ޤައުމުތަކުގެ ތާޢީދު ލިބިފައި ވާ، އައްބާސްގެ ޕަލަސްޓީނިއަން އޮތޯރިޓީ (ޕީއޭ)ގެ ބާރު ހިނގަނީ، އިޒްރޭލުން ވެރިވެގެންފައިވާ ހުޅަނގު އައްސޭރީގެ ސަރަޙައްދަށެވެ.
ޤާޚިރާގައި ކުރިއަށް ގެންދިޔަ މަޝްވަރާތަކުގައި ފަލަސްޠީނުގެ 14 ފެކްޝަނަކުން މެންބަރުން ބައިވެރިވިއެވެ. އެ މަޝްވަރާތަކަކީ، ފަލަސްޠީނުގެ 'ޤައުމީ އެއްބައިވަންތަކަން ހާސިލުކޮށް، ބައިބައިވުންތަކަށް ނިމުން ގެނައުމަށް' އެޅި ފުރަތަމަ ފިޔަވަޅު ކަމަށް އައްބާސް ވަނީ ސިފަ ކުރައްވާފައެވެ.
މި ބައްދަލުވުމަކީ ފަލަސްޠީނުގެ ފެކްޝަންތަކުގެ މެދުގައި މަޝްވަރާތައް ކުރިއަށް ގެންދިއުމަށް އެޅުނު އެންމެ ފުރަތަމަ، އަދި އެހާމެ މުހިންމު ފިޔަވަޅެއް. ވީ އެންމެ އަވަހަކަށް އަމާޒުތައް ހާސިލު ކުރުން ޢުއްމީދަކީ. ފެކްޝަންތަކުގެ މެދުގައި ކޮމިޓީތައް ހަދައިގެން، ޚިޔާލު ތަފާތުވުންތަކަށް ރިޢާޔަތް ކުރަން ގޮވާލަން. ޤައުމީ އެއްބައިވަންތަކަން ލިބެން އޮތީ ބައިބައިވުންތަކަށް ނިމުން ގެނެސްގެން. ކޮމިޓީގެ މަސައްކަތްތައް މިހާރުން މިހާރަށް ފަށަން އަހަރެން ގޮވާލަން. އެއްބަސްވުންތަކާއި ރަނގަޅު ކުރަންވީ ކަންކަމާ ހިސާބަށް ދެވެން އޮތީ އޭރުން.މަހަމޫދު އައްބާސް؛ ފަލަސްޠީނުގެ ރައީސް
ޤާޚިރާގައި ކުރިއަށް ގެންދިޔަ މަޝްވަރާތަކުގެ ކުރިން، އައްބާސްއާއި ހަނިއްޔާ ވަނީ ތުރުކީވިލާތުގެ ވެރިރަށް، އަންކާރާގައިވެސް ބައްދަލު ކުރައްވާފައެވެ. ފެކްޝަންތައް ބައިވެރިކޮށްގެން ފުޅާ ދާއިރާއެއްގައި ސުލްޙައިގެ މަޝްވަރާތައް ކުރިއަށް ގެންދިއުމަށް އައްބާސްއާއި ހަނިއްޔާ އެއްބަސްވީ އަންކާރާގައި ކުރިއަށް ދިޔަ މަޝްވަރާތަކުގައެވެ.
ފަލަސްޠީނުގެ ބިންތަކަށް ވެރިވެގަނެ، މުސްލިމުންގެ ދިރިއުޅުމަށް އަތްގަދަ ކުރަމުންދާ ޔަހޫދީ އިޒްރޭލުގެ ބާރުތަކާ ދެކޮޅަށް ތެދުވުމުގައި ފަލަސްޠީނަށް ގޮންޖެހުންތަކާ ކުރިމަތިލާން ޖެހޭ އެންމެ ބޮޑު އެއް ސަބަބަކީވެސް ފަލަސްޠީނުގައި އުފެދިފައި ވާ ދާޚިލީ ބައިބައިވުންތަކެވެ.
