ރަނިންމޭޓަކަށް ޖަމީލް ހަމަޖެއްސުން، އިމްރާން ސިފަކުރެއްވީ ފިދާއެއްގެ ގޮތުގައި ކަތިލާ ކަންބަޅިއެއްގެ ގޮތުގައި
31 ޖުލައި 2023 | ހޯމަ 18:52ރަނިންމޭޓުކަން ގަބޫލުކުރެއްވީ ކެންޑިޑޭޓު ޖަލުގައި އޮންނެވުމުން، ކެންޑިޑެސީ ލިބިވަޑައިގެންފާނެ ކަމުގެ އުއްމީދުގައި
އަދާލަތު ޕާޓީގެ ރައީސް އިމްރާން އަބްދުﷲ
ކުރިއަށް އޮތް ރިޔާސީ އިންތިޚާބުގައި ކުރީގެ ރައީސް އަބްދުﷲ ޔާމީންގެ ރަނިންމޭޓަކަށް، ކުރީގެ ނައިބުރައީސް އަދި ޔާމީނުގެ ގާނޫނީ ވަކީލުންގެ ޓީމުގައިވެސް ހިމެނިވަޑައިގަންނަވާ ޑރ. މުހައްމަދު ޖަމީލު އަހުމަދު ހަމަޖެއްސެވުމުން, އެއީ ފިދާއެެއްގެގޮތުގައި ކަތިލާ ކަންބަޅިއެއްގެ ގޮތުގައި، އަދާލަތު ޕާޓީގެ ރައީސް ސިފަކުރައްވައިފިއެވެ.
ށ. މިލަންދޫގައި ހޯމަ ދުވަހުގެ ރޭ ކުރިއަށްދިޔަ ޖަލްސާގައި ވާހަކަފުޅުދައްކަވަމުން އިމްރާން ވިދާޅުވީ، އިދިކޮޅު ފަރާތްތަކަށް އުޅެނީ އިންތިޚާބު ކާމިޔާބުކުރެވޭނެ ފޯމިއުލާއެއް ނުހޯދިގެން ކަމަށެވެ. އަދި ނަން ހާމަނުކުރައްވައި އެމަނިކުފާނު ވިދާޅުވީ, ޖަލުގައި ހުންނެވި ބޭފުޅަކު ކެންޑިޑޭޓެއްގެ ގޮތުގައި ދައްކާފައިވާކަމަށާއި، ރަނިންމޭޓަކަށް ބޭފުޅަކު ނެންގެވީ ޖަލުގައި ހުންނެވި ބޭފުޅަކާއެކު އިންތިޚާބުގައި ވާދަކުރައްވަން ބޭނުންފުޅުވާ ބޭފުޅަކު ނެތުމުން ކަމަށެވެ.
ރަނިންމޭޓުގެ ގޮތުގައި ކަނޑައެޅި ބޭފުޅާ އެ މަގާމު ގަބޫލުކުރެއްވީ ކެންޑިޑޭޓު ޖަލުގައި އޮންނެވުމުން، ކެންޑިޑެސީ ލިބިދާނެ ކަމުގެ އުއްމީދުގައި ކަމަށާއި، ނަމަވެސް އެބޭފުޅާ ރަނިންމޭޓަކަށް ހަމަޖެއްސެވީ ފިދާއެއްގެ ގޮތުގައި ކަތިލާ ކަންބަޅިއެއްގެ ގޮތުގައި ކަމަށް އިމްރާން ވިދާޅުވިއެވެ. އެކަން އެނގިގެންދަނީ ރަނިންމޭޓާ އެއްވެސް މަޝްވަރާއެއް ކުރުމެއް ނެތި އިތުރު ކެންޑިޑޭޓެއް ނެރުމަށް މަސައްކަތްކުރަމުން ދާތީ ކަމަށްވެސް އެމަނިކުފާނު ވިދާޅުވިއެވެ.
އިމްރާން މިފަދައިން ވިދާޅުވެފައިވާއިރު، ޖަލުގައި ހުންނަވައިގެން ރިޔާސީ އިންތިޚާބުގައި ވާދަކުރައްވަން ނިންމަވާފައިވަނީ ކުރީގެ ރައީސް ޔާމީނެވެ. އަދި އެމަނިކުފާނު ވަނީ ރަނިންމޭޓަކަށް ޖަމީލް އައްޔަން ކުރައްވާފައެވެ. މިކަން ރަސްމީކޮށް ޕީޕީއެމުންވެސް ވަނީ ބުނެފައެވެ. އަދި ޕީޕީއެމް ޕީއެންސީ ކޯލިޝަނުގައި ހިމެނޭ ޕީއެންސީންވެސް ރިޔާސީ އިންތިޚާބަށް ކެންޑިޑޭޓެއް ނެރުމަށް ޔާމީން އަންގަވާފައިވާކަމުގެ ވާހަކަތައް ވެސް ދަނީ ފެތުރެމުންނެވެ.
އިމްރާން ވިދާޅުވީ ކުރީގެ ރިޔާސީ އިންތިޚާބުތައް ވެސް ކާމިޔާބު ކުރެވުނީ ކޯލިޝަނާއެކުގައި ކަމަށާއި، ރައީސް ސާލިހު ނުކުންނަވަނީ އެންމެ ބޮޑު ކޯލިޝަނާއެކުގައި ކަމަށެވެ. އެމަނިކުފާނު އުޅުއްވަނީ ރިޔާސީ ރޭހުގައި ވަރަށް ކުރީގައި ކަމަށާއި، ރައީސް ސާލިހަކީ ކޯލިޝަން ދަމަހައްޓަވަން ދެނެވަޑައިގަންނަވާ ވެރިއެއް ކަމަށްވެސް އިމްރާން ވިދާޅުވިއެވެ. މިސާލެއްގެ ގޮތުގައި ވިދާޅުވީ، އެމަނިކުފާނު މިހާރުވެސް ދެކޮޅަށް މަސައްކަތް ކުރައްވާ ބޭފުޅުން ކެބިނެޓުގައި ތިއްބެވިއިރު އެ ބޭފުޅުންނާއެކު ރައީސް މަސައްކަތްކުރެއްވުން ކަމަށެވެ.
