ޅައިމަގަށް ރައީސްގެ ވައުދުތައް - ސިއްހީ މަރުކަޒު 24 ގަޑިއިރަށް ބަދަލުކުރުމާއި، ކައުންސިލްގެ އާ އިމާރާތެއް އަދި އިތުރު ވައުދުތައް
ޅައިމަގަށް ކޮށްދޭންވީ ވައުދުތައް ފެށި، ނިމެމުންދާ ކަމަކީ އުފާކުރައްވާ ކަމެއް ކަަމަށް ވެސް ރައީސް ވަނީ ވިދާޅުވެފަ
ށ.ޅައިމަގުގައި ރައީސް ވާހަކަ ފުޅުދައްކަވަނީ
އިތުރު ދައުރަކަށް ހޮވިވަޑައިގެންފި ނަމަ ށ.ޅައިމަގަށް އިތުރު ގިނަ ކަންތައްތަކެއް ކޮށްދެއްވަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވައުދުވެވަޑައިގެންފި އެވެ.
ރައީސް މިފަދައިން ވައުދުވެވަޑައިގަތީ މިހާރު ށ.އަތޮޅަށް ކުރައްވާ ދަތުރުފުޅުގެ ތެރެއިން، ށ.ޅައިމަގުގައި ބޭއްވި ބަނދަރު ބައްދަލުވުމުގައި ވާހަކަދައްކަވަމުންނެވެ. ކުރިއަށް އޮތް ދައުރުގައި ވެރިކަމަށް ވަޑައިގެންފި ނަމަ ކައުންސިލް އިދާރާގެ އާ އިމާރާތެއްގެ މަސައްކަތާއި، ބޯހިޔާވަހިކަމުގެ މައްސަލަ އަށް ހައްލު ހޯދާދިނުމާއި ސިއްހީ މަރުކަޒުގެ މަސައްކަތް 24 ގަޑި އިރަށް ބަދަލުކުރައްވާނެ ކަމަށް ރައީސް ވިދާޅުވިއެވެ. މީގެ އިތުރުން އެ ރަށުގެ ކުނި ކޮށި ޤާއިމް ކުރުމާއި ޒަމާނީ ފެންވަރަށް މަގު ތަރައްޤީކުރުމާއި ރޯހައުސް ޤާއިމްކުރުމަށް ވެސް ރައީސް ވައުދުވެވަޑައިގަތެވެ. މީގެ އިތުރުން ނިމިދިޔަ ދައުރުގައި އެ ރަށަށް މުހިންމު މަސައްކަތްތަކެއްކޮށްދެވުނު ކަމަށާއި އެކަމުގެ ހިތްހަމަޖެހުން އޮތް ކަމަށް ރައީސް ވަނީ ވިދާޅުވެފައެވެ.
އިތުރަށް ވާހަކަދައްކަވަމުން، ޅައިމަގުގެ ރައްޔިތުން އެމަނިކުފާނަށް ދެންނެވި ހޫނު މަރުޚަބާ އަށްޓަކާ ރައީސް ވަނީ ޝުކުރު އަދާކުރައްވާފައެވެ. އަދި މިހާރު ތައްޔާރުވާންވީ އަންނަ ރިޔާސީ އިންތިޚާބުގައި ވޯޓުލާން ކަމަށް ވެސް ރައީސް ވަނީ ވިދާޅުވެފައެވެ. ރައީސް ވިދާޅުވީ ޅައިމަގުގެ ރައްޔިތުން އެމަނިކުފާނަށް ބޮޑުތަނުން އާއެކޭ ބުނާނެ ކަމަށް ޤަބޫލުކުރައްވާ ކަމަށެވެ. ޅައިމަގަށް ކޮށްދެއްވަން ވީ ވައުދުތައް ފެށި، ނިމެމުންދާ ކަމަކީ އުފާކުރައްވާ ކަމެއް ކަަމަށް ވެސް ރައީސް ވަނީ ވިދާޅުވެފައެވެ.
