އަމްރަބަތު ގަތުމަށް ބައެއް ކުޅުންތެރިން ވިއްކާލަނީ

ފިއޮރެންޓީނާ އަށް ކުޅޭ މޮރޮކޯގެ ސޮފްޔާން އަމްރަބަތު ގެނައުމުގެ ކުރިން މެންޗެސްޓާ ޔުނައިޓެޑުން ބައެއް ކުޅުންތެރިން ވިއްކާލަން މަޖުބޫރުވެއްޖެ އެވެ.

ޔުނައިޓެޑުން ވިއްކާލަން މަސައްކަތް ކުރަމުންދާ ދެ މިޑްފީލްޑަރުންނަކީ ފްރެޑް އަދި ޑޮނީ ވެންޑަބީކެވެ. މި ދެ ކުޅުންތެރިން ވިއްކާނުލައި އަމްރަބަތު ގެނައުމަށް ގިނަ ދަތިތަކެއް އެބަހުއްޓެވެ.

އިޓަލީގެ ނޫސްތަކުން ބުނާ ގޮތުގައި މިދިޔަ ޖެނުއަރީ މަހު ވެސް ޔުނައިޓެޑަށް ބަދަލުވާން އަމްރަބަތު ބޭނުންވި އެވެ. އެފަހަރު އެކަން ނުވީ ފިއޮރެންޓީނާއިން އެކަމަށް އެއްބަސްނުވުމުންނެވެ. ނަމަވެސް މިފަހަރު 26 މިލިއަނާއި 30 މިލިއަން ޕައުންޑާ ދެމެދުގެ އަގަކަށް އޭނާ ވިއްކާލަން ފިއޮރެންޓީނާއިން ވަނީ އެއްބަސްވެފަ އެވެ.

ޔުނައިޓެޑުން އަމްރަބަތު ގަތުމަށް ފުރަތަމަ ހުށަހެޅީ 21 މިލިއަން ޕައުންޑެވެ. ނަމަވެސް ފިއޮރެންޓީނާއިން ކިޔާ އެންމެ ކުޑަ އަގަކީ ވެސް 26 މިލިއަނެވެ.

އަންނަ ސީޒަނަށް ޔުނައިޓެޑް ވަރުގަދަ ކުރުމަށް އެކުލަބުން ވަނީ މިހާތަނަށް ރަނގަޅު ކުޅުންތެރިންތަކެއް ގަނެފަ އެވެ. މި ފަހަރަކީ ޗެމްޕިއަންސް ލީގުގައި އަލުން ޔުނައިޓެޑް ކުޅޭ ފަހަރު ކަމަށްވުމުން ކޯޗު އެރިކް ޓެންހަގް އަންނަނީ ތައްޓަށް ވާދަކުރެވޭ ފެންވަރުގެ ޓީމެއް ބިނާކުރުމަށް ގަދައަޅަމުންނެވެ.