ފަތުރުވެރިކަމުގެ ސިނާއަތް ދެމިއޮތީ ރައީސް ސާލިހުގެ ވިސްނުންފުޅުގެ ސަބަބުން: އެމްޑީއޭގެ ރައީސް ސިޔާމް
ކޮވިޑުގެ ހާލަތުގައި ވެސް ބޭރު ޤައުމުތަކުން ވެސް ކުރި ސުވާލަކީ ރާއްޖެއިން ގެންގުޅުނު "ރެސިޕީ" އަކީ ކޮބައިތޯ
ފުވައްމުލަކު ސިޓީގައި އޮތް އުފާވެރި އަމާން ރާއްޖެ ކެމްޕޭން ޖަލްސާގައި ސިޔާމް ވާހަކަފުޅު ދައްކަވަނީ
ފަތުރުވެރިކަމުގެ ސިނާއަތަކީ ރާއްޖޭގެ ލޭނާރު ކަމަށާއި މިއަދު ފަތުރުވެރިކަމުގެ ސިނާއަތް ދެމިއޮތީ ރައީސް ސާލިހުގެ ވިސްނުންފުޅުގެ ސަބަބުން ކަމަށް އެމްޑީއޭގެ ރައީސް އަހްމަދު ސިޔާމް ވިދާޅުވެއްޖެއެވެ.
އާދިއްތަ ދުވަހުގެ ރޭ ފުވައްމުލަކު ސިޓީގައި އޮތް އުފާވެރި އަމާން ރާއްޖެ ކެމްޕޭން ޖަލްސާގައި ވާހަކަފުޅު ދައްކަވަމުން ސިޔާމް ވިދާޅުވީ ކޮވިޑުގެ ހާލަތުގައި ވެސް ބޭރު ޤައުމުތަކުން ވެސް ކުރި ސުވާލަކީ ރާއްޖެއިން ގެންގުޅުނު "ރެސިޕީ" އަކީ ކޮބައިތޯ ކަމަށެވެ.
ސިޔާމް ވިދާޅުވީ ރައީސް ސާލިހަށް ތާއިދުކުރެއްވީ ޓެސްޓުކޮށް، ޓެސްޓުން އެމަނިކުފާނު ފާސްވުމުން ކަމަށެވެ. ރައީސް ސާލިހަށް ދެވަނަ ދައުރެއް ދީފިނަމަ މިހާރު މަޝްރޫއުތައް ކުރިއަށްދާ ސްޕީޑަށްވުރެން، ބާރު ސްޕީޑެއްގައި، މަޝްރޫއުތައް ކުރިއަށްދާނެ ކަމަށް ސިޔާމް ވިދާޅުވިއެވެ.
މިހާރު ކުރަމުންދާ މަސައްކަތަކީ ރައްޔިތުންގެ މަސްތަޤްބަލު އުޖާލާ ކޮށްދިނުމަށްޓަކައި ކުރަމުންދާ މަސައްކަތް ކަމަށެވެ. ކުޑައިރުއްސުރެން އަޑުއަހަމުންދާ ވާހަކައަކީ ތަޖުރިބާގެ އަލީގައި ކަންތައްތައް ނިންމަންޖެހޭނެ ކަން، ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ ކޮވިޑުގެ ހާލަތު ކުރިމަތިވުމުން އިންޑަސްޓްރީގައި ތިބި ފުއްނާބުއުސް ބައެއް ބޭފުޅުންނާ ބައްދަލުކުރެއްވި ކަމަށާއި އޭގެ ތެރޭގައި ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވެސް ހިމެނޭ ކަމަށެވެ. އެބޭފުޅުން އޭރު ވިދާޅުވީ އެމީހުން ހަލާކުވި ކަމަށާއި އެހެންނަމަވެސް އެބޭފުޅުންނާ ބައްދަލުކުރެއްވުމަށްފަހު، ވިޔަފާރީތައް ހަލާކުވެ، މީހުން ބަނޑަށް ޖެހުނަ ނުދޭނެކަމަށް ރައީސް ވިދާޅުވި ކަމަށް ސިޔާމް ވިދާޅުވިއެވެ.
ގާތްގަނޑަކަށް ތިން ބިލިއަން ރުފިޔާ ކޮވިޑުގެ ތެރޭގައި ސަރުކާރުން ރައްޔިތުންނަށް އެކި ގޮތްގޮތުން ފޯރުކޮށްދިން ކަމަށް ސިޔާމް ވިދާޅުވިއެވެ. އެއީ ލޯނުދިންކަމުގައި ވިޔަސް އިންކަމް ސަޕޯޓް އެލަވަންސް ދިނުން ކަމުގައި ވިޔަސް ކަމަށް ވިދާޅުވިއެވެ.
ތަޖުރިބާގެ އަލީގައި މަސައްކަތް ކުރުން މުހިންމު ކަމަށާއި ރާއްޖެ ފިތިގެންދިޔަ ވަގުތުގައި ވެސް ރައީސްގެ ހިތްވަރު ފެނިވަޑައިގެން ކަމަށް ސިޔާމް ވިދާޅުވިއެވެ. އަދި ރައީސް ދެވަނަ ދައުރަކަށް ހޮވަންޖެހޭ ކަމަށް ސިޔާމް ވިދާޅުވިއެވެ.
