ޕީއެސްޖީއާ މައްސަލަ ޖެހިފައިވާ ފްރާންސްގެ ކެޕްޓަން ކީލިއަން އެމްބާޕޭ ގެނައުމަށް ލިވަޕޫލުން ހުށަހަޅައިފި އެވެ.
ލިވަޕޫލުން ބޭނުންވަނީ އެއް އަހަރު ދުވަހުގެ ލޯނު އެއްބަސްވުމަކަށް އެމްބާޕޭ ގެނައުމަށެވެ. ސަބަބަކީ ކުރިއަށް އޮތް ސީޒަނަށް ފަހު ސްޕޭނުގެ ރެއާލް މެޑްރިޑަށް ކުޅުމަށް އެމްބާޕޭ ބޭނުންވާތީ އެވެ.
ޕީއެސްޖީ އާއި އެމްބާޕޭ މައްސަލަ ޖެހިގެން އުޅެނީ ވެސް މި ސަބަބާހެދި އެވެ. ޕީއެސްޖީން ގަބޫލުކުރަނީ ރެއާލް މެޑްރިޑަށް ބަދަލުވުމަށް އެމްބާޕޭ ސިއްރު އެއްބަސްވުމެއް ހަދާފައިވާ ކަމަށެވެ. މިކަން ނުކުރާކަން ކަށަވަރުކުރުމަށް އެކުލަބުން ބޭނުންވަނީ އެމްބާޕޭ ލައްވައި އައު ކޮންޓްރެކްޓެއްގައި ސޮއިކުރާށެވެ. ނަމަވެސް އޭނާ މިކަން ކުރަން އިންކާރުކުރެ އެވެ.
ޕީއެސްޖީ އާއި އެމްބާޕޭ ހަދާފައިވާ ކޮންޓްރެކްޓްގައި އަދި ބާކީ ދެ އަހަރު އެބައޮތެވެ. ނަމަވެސް ފަހު އަހަރަކީ އެމްބާޕޭ ބޭނުންވާނަމަ އެކްޓިވޭޓް ކުރެވޭ ގޮތަށް އޮތް ވަކި މާއްދާއަކުން ބާރު ދީފައިވާ ކަމެކެވެ. މި މައްސަލާގައި އެމްބާޕޭ އައު ކޮންޓްރެކްޓެއްގައި ސޮއިނުކުރާނަމަ ކުރިއަށް އޮތް ސީޒަނުގައި އޭނާ ލައްވައި ނުކުޅުވައި ބަހައްޓަން ވެސް ޕީއެސްޖީ ތައްޔާރަށެވެ. އަދި މިވަގުތު ފްރާންސްގެ ފޯވަޑް ހުރީ ޕީއެސްޖީގެ ފުރަތަމަ ޓީމާ އެކަހެރިކޮށްފަ އެވެ. އޭނާ ފަރިތަކުރަނީ ޔޫތު ޓީމާއެކުގަ އެވެ.
އިނގިރޭސި ނޫސްތަކުން ބުނަނީ ލިވަޕޫލުގެ ހުށަހެޅުމަކީ މިވަގުތަށް އެމްބާޕޭ އާއި ޕީއެސްޖީ އަށް ވެސް ފައިދާހުރި ހުށަހެޅުމެއް ކަމަށެވެ. ސަބަބަކީ އެމްބާޕޭ ފްރީކޮށް ދިޔަނުދިނުމަށް ޕީއެސްޖީން ކުރާ މަސައްކަތުގައި ލިވަޕޫލްގެ ފަރާތުން ފީއެއް ލިބޭނެތީ އެވެ.
އެމްބާޕޭ ވަނީ ސައޫދީ ލީގުން އެއް އަހަރު ދުވަހަށް އޭނާ ގަތުމަށް ހުށަހެޅި ދުނިޔޭގެ ރެކޯޑް ފީގެ ހުށަހެޅުން ގަބޫލުނުކޮށްފަ އެވެ.
