ރާޒުވާއަށް އާ ރޫހެއް ގެނެސްދިނީ އުމުރުން އެންމެ 8 އަހަރުގެ އައިވީ!

ނައިޖީރިއާގެ ވެރިކަން ކުރާ އަބޫޖާގެ ބޭރުގައި އޮންނަ، ރަށްފުށުގެ ހަލަބޮލި އަވަށެއް ކަމަށްވާ ކުބްވާގައި، އެންމެ އިހުގެ ރާޒުވާ ގޮނޑިއެއް ހިފައިގެން އެ އިނީ އުމުރުން އެންމެ 8 އަހަރުގެ އައިވީ އުރިއެޓޯއެވެ. އެ ރާޒުވާ ގޮނޑިއަކީ 'ބަދަލަކަށް' އޭނާ ބޭނުންކުރާ ހަތިޔާރެވެ. ބާރުވެރިކަން ހޯދުމަށް އޭނާ ބޭނުންކުރާ އުކުޅަކީ ރާޒުވާ ކުޅުމުގެ ހުނަރެވެ.

ދޭސީ އަދި އޮންލައިން ޕްލެޓްފޯމްތަކުގައި ކުރިއަށްގެންދާ ރާޒުވާ މުބާރާތްތައް ފަތަހަކުރުމުގައި އައިވީ ދެމިހުރުމުގެ އެންމެ ބޮޑު އެއް ސިއްރަކީ އޭނާއަށް ލިބިފައިވާ އާދަޔާ ޚިލާފު ތޫނުފިލިކަމާއި، ނުގުޑާފަދަ ވަރުގަދަ އަޒުމެވެ. އައިވީ މިހާރު ކުރަމުން ދާ އުއްމީދަކީ، އުމުރުން 15 ފުރޭއިރު ރާޒުވާ ގްރޭންޑްމާސްޓަރ އަކަށް ވުމަށް ކުރަމުންދާ ފޮނި އުއްމީދެވެ.

ނައިޖީރިއާގެ އެތައް މިލިއަން ކުދިންނަކީ ސްކޫލު ވެއްޓާއި ތައުލީމާ ދުރުގައި އުޅެ ބޮޑުވަމުން އަންނަ ބަޔަކަށް ވާއިރު، ރާޒުވާގެ ރޮނގުން އޭނާއަށް ލިބިފައި ހުރި މައުލޫމާތެއް، ނައިޖީރިއާގެ އެހެން ކުދިންނާ ހިއްސާކުރުމަކީ، ޖިނާއީ ކުށުގެ ވެށިން ކުދި ބަޔަކު ސަލާމަތްކޮށްދޭނެ ކަމެއް ކަމަށްވެސް އައިވީ ގަބޫލުކުރެއެވެ.

ރާޒުވާގެ ދުނިޔެއަށް އައިވީ ނެރެދިނީ އޭނާގެ ބައްޕަ، ކްލެމެންޓް އުރިއެޓޯއެވެ. އޭރު އައިވީގެ އުމުރުން ވާނީ އެންމެ 4 އަހަރެވެ. ދެބަފައިންގެ ހިތުގައި ރާޒުވާއަށް އޮތް ލޯބި ވަރުގަދަވަމުން ދިޔަ ވަރަކަށް އެ ދެބަފައިންގެ މެދުގައި އޮތް ލޯބީގެ ބާރުވެސް ދިޔައީ ގަދަވަމުންނެވެ. ގުޅުން ދިޔައީ އިތުރަށް ބަދަހިވަމުންނެވެ.

އައިވީ ހޯދަމުންދާ ކާމިޔާބީތައް ފާހަގަކޮށް، އޭނާއަށް ވަނީ، އެމެރިކާގައި މަރުކަޒު ކޮށްގެން ހިންގާ 'ދަ ގިފްޓް އޮފް ޗެސް' ފައުންޑޭޝަންގެ އެމްބެސެޑަރުކަންވެސް ދީފައެވެ.

ރާޒުވާ ކުރިއެރުވުމަށް އައިވީ ކުރަމުންދާ މަސައްކަތްތަކުގެ ނަތީޖާ މިހާރުވެސް ވަނީ ފެންނަން ފަށާފައެވެ. ނައިޖީރިއާގެ ސަރަހައްދީ ސްކޫލްތަކުގައި ހިންގާ ރާޒުވާ ކުލަބުތަކަށް، އައިވީގެ ސަބަބުން ވަނީ އާ ދިރުމެއް ލިބެން ފަށާފައެވެ. ކުދިންގެ މެދުގައި ރާޒުވާއަށް އޮންނަ ޝައުގުވެރިކަން އިތުރުވެ، އެކަމުގައި ބައިވެރިވާ ކުދިންގެ އަދަދުވެސް ދަނީ އިތުރުވަމުންކަން، ސްކޫލް ޓީޗަރެއް ކަމަށްވާ އުޒޯމަކާ އުޒޯކޫ ވަނީ ފާހަގަކުރައްވާފައެވެ.  

ސްކޫލުގެ މަސައްކަތްތައް ބަރާބަރަށް ފުރިހަމަ ކުރަމުން، ރާޒުވާއަށް ވަގުތު ހުސްކުރުމުގެ ކަންކަން ކުރަނީ ވަރަށްވެސް ހަމަހަމަ އުސޫލަކުން ކަމަށް އައިވީ ބުނެއެވެ. ކިތަންމެ ބުރަ ވިއަސް، އޭނާގެ އަޒުމަކަށް ބަދަލެއް ނާދެއެވެ. އައިވީ ދަނީ ދިމާވާ ކޮންމެ ގޮންޖެހުމެއް، ސާބިތުކަމާއެކު ހުރަސްކުރަމުންނެވެ.

އައިވީއަކީ ހަމައެކަނި އޭނާފަދަ ކުދިންނަށް ހުރި މިސާލެއް ނޫނެވެ. އައިވީގެ ސަބަބުން، ޒުވާން މައިންބަފައިންނަށް ވެސް ހިތްވަރު ލިބެއެވެ. އެމީހުންގެ ދަރިންގެ ކިބައިގައި ހުރި އާދަޔާޚިލާފު ހުނަރުތައް ދެނެގަނެ، އެ ރޮނގުތަކުން ދަރިން ކުރިއަށް ނެރުމަށް މައިންބަފައިންނަށް ލިބޭ ހިތްވަރަކަށް އައިވީ މިއަދު ވަނީ ވެފައެވެ.

ބައިނަލްއަގުވާމީ ރާޒުވާ ފެޑަރޭޝަންގެ ރޭޓިންގއަށް ބަލާއިރު، މުޅި ދުނިޔޭގެ ނިސްބަތުން ނައިޖީރިއާ އޮތީ 88  ވަނާގައެވެ.