އަލް ނަސްރަށް މާނޭ ދޫކޮށްލަން ބަޔާނުން އެއްބަސްވެއްޖެ

ޖަރުމަނު ލީގުގެ ބަޔާން މިއުނިކަށް ކުޅެމުން އަންނަ ސެނެގާލްގެ ސަޑިއޯ މާނޭ އަލް ނަސްރަށް ދޫކޮށްލުމަށް އެ ކުލަބުން އެއްބަސްވެއްޖެ އެވެ.

ލިވަޕޫލް ދޫކޮށްލުމަށްފަހު މާނޭ ބަޔާނަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ބަޔާންގައި ލެރޯއީ ސާނޭއާ ދެމެދު ހިނގައިދިޔަ ހަމަނުޖެހުމަށް ފަހު އެ ކުލަބުން ވަނީ މާނޭ ޖޫރިމަނާކޮށް، ސަސްޕެންޑުކޮށްފަ އެވެ. އޭގެ ފަހުން އެ ކުލަބުން މާނޭ ދޫކޮށްލަން އުޅޭ ކަމުގެ އަޑުތައް ވެސް ވަނީ ފެތުރިފަ އެވެ. މާނޭ ހޯދުމަށް އަލް ނަސްރުން ބަޔާނާއެކު ކުރި މަޝްވަރާތަކުގައި، އަލް ނަސްރުގެ ހުށަހެޅުމަށް މިހާރު އެ ކުލަބުން ވަނީ އެއްބަސްވެފައި ކަމަށް ރިޕޯޓުތައް ބުނެ އެވެ. އެހެންކަމުން ކުރިއަށް އޮތް ދުވަސްތަކުގެ ތެރޭގައި ރަސްމީ ގޮތުން ލިޔެކިޔުންތަކުގައި ސޮއި ކުރުން ކުރިއަށް ދާނެ އެވެ.

މާނޭ ވަނީ ބަޔާނަށް ކުޅެދިން 38 މެޗުގައި 12 ލަނޑު ޖަހައިފަ އެވެ. އަލް ނަސްރުން ވަނީ މިހާތަނަށް މާނޭގެ އިތުރުން އިތުރު އެހެން ތިން ކުޅުންތެރިން މިހާތަނަށް ހޯދައިފަ އެވެ. ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ސޮއި އަލް ނަސްރުން ހޯދި ފަހުން، ސައުދީ ލީގުގެ އެހެން ކުލަބުތަކުން ވެސް އަންނަނީ ޔޫރަޕުގައި ކުޅެމުން އަންނަ މަޝްހޫރު ކުޅުންތެރިން ހޯދަމުންނެވެ.