މާލެ ސަރަހައްދުގައި މިހާރު ފެތުރެމުންދާ ރޯގާގެ ސަބަބުން އެސްޓީއޯގެ ފާމަސީތަކުން ބޭސްގަންނަ މިންވަރު އިތުރުވެފައިވީ ނަމަވެސް ބޭސް ހުސްނުވެ ލިބެން ހުންނާނެ ކަމުގެ ޔަގީންކަން ދޭ ކަމަށް އެސްޓީއޯ އިން ބުނެފިއެވެ.
އެސްޓީއޯއިން ބުނެފައި ވަނީ އެކުންފުނިން ބޭސް އެތެރެކުރަމުންދަނީ ސިއްހީ ޚިދުމަތްދޭ ފަރާތްތަކާއި ދައުލަތުގެ ކަމާގުޅޭ މުއައްސަސާތަކާ މަޝްވަރާކުރުމަށް ފަހުގައި ކަމަށެވެ. އަދިރާއްޖެއަށް ބޭސް ބޭނުންވާނެ މިންވަރު ދެނެގަނެ، އިސްރާފު ނުވާނެ ގޮތަކަށް ބަލައިގެން ބޭސް އެތެރެކުރަމުންދާ ކަމަށް ވަނީ ބުނެފައެވެ. މީގެ އިތުރުން ބޭހުގެ ފެންވަރާމެދު ސުވާލެއްވެސް ނުއުފުދޭ ގޮތަށް ބޭސް އެތެރެކުރުމަށް އިސްކަން ދޭ ކަމަށް ވަނީ ބުނެފައެވެ.
އެސްޓީއޯ އިން ބުނީ މާލެ ސަރަހައްދުގައި ހަލުވި ކަމާއެކު ރޯގާ ފެތުރެމުންދާ ސަބަބު ދެނެގަތުމުގެ މަސައްކަތް ހެލްތު ޕްރޮޓެކްޝަން އެޖެންސީން ކުރަމުންދާ ކަމަށެވެ. މާލޭގައި ބަލި ފެތުރުމުގެ ސަބަބުން މާލެ ސަރަހައްދުގެ ހޮސްޕިޓަލްތަކުގެ އިމަރޖެންސީ އަށް ދައްކާ މީހުންގެ އަދަދު އިތުރުވެ، ސިއްހީ ޚިދުމަތްދޭ ތަންތަނަށް ވަނީ ބާރު ބޮޑުވެފައެވެ.
