"ހުދު ފޮނު" ބޮޑީބޯޑިން ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި
މިއީ 16 އަހަރުން ދަށުގެ ކުދިންނަށް ޚާއްސަކޮށްފައިވާ ޕްރޮގްރާމެއް
ޕްރޮގްރާމް ކުރިޔަށް ގެންގޮސްދޭ އެތުލީޓުން
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މުޅިން އަލަށް ބާއްވާ "ހުދު ފޮނު" ބޮޑީބޯޑިން ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފިއެވެ.
16 އަހަރުން ދަށުގެ ކުދިންނަށް ޚާއްސަކޮށްފައިވާ މި ޕްރޮގްރާމް ކުރިޔަށް ގެންދިޔުމަށް ހަމަޖެހިފައިވަނީ ވިޒިޓް މޯލްޑިވްސް ޕްރޯ 2023 ގެ ތެރެއިންނެވެ. މި ޕްރޮގްރާމް ކުރިޔަށް ގެންދާނީ އޮގަސްޓު މަހުގެ އެއްވަނަ ދުވަހާއި 12 ވަނަ ދުވަހާ ދެމެދު، މޯލްޑިވްސް ޕްރޯގެ ހީޓުތައް ކުރިޔަށް ނުދާ ދުވަހެއްގައެވެ. އަދި މި ޕްރޮގްރާމްގައި ބައިވެރިވުމަށް އެދޭ ފޯމް، އެމްބީބީއޭގެ ފޭސްބުކް ޕޭޖުން ލިބޭނެކަމަށް އެސޯސިއޭޝަނުން މައުލޫމާތު ދިނެވެ.
ފިރިހެން ކުދިންނަށް މި ޕްރޮގްރާމް ކުރިޔަށް ގެންގޮސްދޭނީ ފްރާންސްގެ އަމައުރީ ލަވާންހޭއެވެ. އޭނާ އަކީ ދެފަހަރު ދުނިޔޭގެ ޗެމްޕިއަންކަން ހޯދާފައިވާ އެތުލީޓެކެވެ. މީގެއިތުރުން، އަމައުރީ ވަނީ މިދިޔަ އަހަރުގެ މުބާރާތުގެ ފައިނަލުގައިވެސް ވާދަކޮށްފައެވެ.
އަންހެން ކުދިންގެ ސެޝަން ނަގައިދޭނީ ބްރެޒިލްގެ ތަޖުރިބާކާރު ބޮޑީބޯޑަރު، ނޭމަރާ ކަވާލިއޯއެވެ. އޭނާ އަކީ ފަސް ފަހަރު ދުނިޔޭގެ ޗެމްޕިއަންކަން ހޯދާފައިވާ އެތުލީޓެކެވެ. އަދި އޭނާ އަކީ މިވަގުތު ދުނިޔޭގެ ރޭންކިންގެ ދެވަނަ އަންހެން ބޮޑީބޯޑަރެވެ.
އެމްބީބީއޭ އިން ވަނީ މިދިޔަ އަހަރުގެ މުބާރާތް ތެރެއިންވެސް ޚާއްސަ ޑިވެލޮޕްމެންޓް ޕްރޮގްރާމެއް ކުރިޔަށް ގެންގޮސްފައެވެ. މިދިޔަ އަހަރުގެ ޕްރޮގްރާމްވެސް ކުރިޔަށް ގެންގޮސްދިނީ އަމައުރީ އާއި ނޭމަރާއެވެ.
