"ޔޫތް ސުޕާ ސްޓައިލް ބެޓުލް" ގައި ބައިވެރިވުމުގެ ފުރުސަތު ހުޅުވާލައިފި

މިނިސްޓްރީ އޮފް ޔޫތް އެންޑް ސްޕޯޓްސް އިން ރަމަޟާން މަހަށް ހާއްސަކޮށްގެން ހިންގުމަށް ހަމަޖެހިފައިވާ "ޔޫތް ސުޕާ ބެޓުލް 2017" ފްރީ ސްޓައިލް ފުޓްބޯލް ޗެމްޕިއަންޝިޕްގައި ގައި ބައިވެރިވުމުގެ ފުރުސަތު ހުޅުވާލައިފި އެވެ.

ޔޫތް މިނިސްޓްރީން ނެރުނު ބަޔާނެއްގައި ބުނީ ހޯމަ ދުވަހު ފެށިގެން އަންނަ ބުރާސްފަތި ދުވަހުގެ ނިޔަލަށް މި މުބާރާތުގައި ބައިވެރިވުމުގެ ފުރުސަތު ހުޅުވާލާފައިވާނެ ކަމަށެވެ.

މާފަންނު ޒުވާނުންގެ މަރުކަޒުގައި ހިންގުމަށް ހަމަޖެހިފައިވާ މި މުބާރާތުގެ ގްރޫޕް ސްޓޭޖުގެ މެޗުތައް އަންނަ ހުކުރު ދުވަހު ފެށުމަށް ހަމަޖެހިފައިވާއިރު، ގްރޫޕް ސްޓޭޖުގެ މެޗުތައް ނިމޭނީ އަންނަ އާދީއްތަ ދުވަހު އެވެ.

އެހެންނަމަވެސް މި މުބާރާތުގެ ސެމީ ފައިނަލް އަދި ފައިނަލް މެޗު ކުޅުމަށް ހަމަޖެހިފައިވަނީ މި މަހު 16 ވަނަ ދުވަހު ޒުވާނުންގެ މަރުކަޒު ކުރިމައްޗަށްވާ ގޮތަށް މަޖީދީ މަގުގައި ކަމަށްވެސް ޔޫތް މިނިސްޓްރީން ބުނެއެވެ. މުބާރާތުގެ ޗެމްޕިއަން، ރަނަރަޕް އަދި ސެކަންޑް ރަނަރަޕް އަށް ޓްރޮފީ އާއި މެޑަލްގެ އިތުރުން މުބާރާތް ސްޕޮންސާކޮށްފައިވާ ދިރާގުން ހުށަހަޅާ ހާއްސަ އިނާމެއް ލިބޭނެ އެވެ.

މި މުބާރާތުގައި ބައިވެރިވުމުގެ ފުރުސަތު ހުޅުވާލާފައިވާއިރު، މުބާރާތުގައި ބައިވެރިވެވޭނީ 16 އަހަރާއި 35 އަހަރާ ދެމެދުގެ އުމުރުފުރާ މީހުންނަށްކަމަށް ޔޫތް މިނިސްޓްރީން ބުނެއެވެ.

މުބާރާތުގައި ބައިވެރިވުމަށް ނަން ނޯޓްކުރެއްވުމަށް، ބައިވެރިވުމަށް އެދޭ ފަރާތުގެ ފުރިހަމަ ނަމާއި، އައިޑީކާޑް ނަމްބަރު، ގުޅޭ މޯބައިލް ނަމްބަރުގެ އިތުރުން އުމުރު، "ޔޫތް ސުޕާ ސްޓައިލް ބެޓުލް" ގެ އޮފިޝަލް ފޭސްބުކް ޕޭޖަށް އިންބޮކްސް ކުރެއްވުމަށް ޔޫތް މިނިސްޓްރީން ވަނީ އިލްތިމާސްކޮށްފައެވެ. ނުވަތަ 7598268 ފޯން ނަމްބަރަށް މައުލޫމާތު އެސްއެމްއެސް ކުރެއްވުމުންވެސް މުބާރާތުގައި ބައިވެރިވެވޭނެ ކަމަށް ޔޫތް މިނިސްޓްރީން ވަނީބުނެފައެވެ.