ފުޅަނދުތައް އާއްމުންނަށް ދައްކާލުން މިރޭ ސެންޓްރަލް ޕާކުގައި
ހޯމް މިނިސްޓްރީ ބުނީ މިރޭ މިނިވަންއުފާ ކާނިވާ ވެސް ހުޅުވުމަށް ހަމަޖެހިފައިވާ ކަމަށް
ފުޅަނދުބުރު
މިނިވަންދުވަހުގެ ހަރަކާތްތަކުގެ ތެރޭގައި ހިމެނޭ ފުޅަނދުތައް އާންމުންނަށް ދައްކާލުމަށް މިހާރު ހަމަޖެހިފައިވަނީ މިރޭ 8:30 އިން ފެށިގެން ހުޅުމާލެ ސެންޓްރަލް ޕާކުގައި ކަމަށް ހޯމް މިނިސްޓްރީން ބުނެފިއެވެ.
މިނިވަންދުވަހުގެ ހާއްސަ ހަރަކާތްތަކުގެ ތެރޭގައި ހިމެނޭ ފުޅަނދުބުރު މާލޭގައި ރޭ ބާއްވާފައިވާއިރު ކުރިން ހަމަޖެހިފައި އޮތީ މިއަދު ހަވީރު ފުޅަނދުތައް އާއްމުންނަށް މާލޭގައި ދައްކާގޮތަށެވެ. މިނިވަން ދުވަސް ފާހަގަކުރުމަށް މި އަހަރު ބާއްވަމުންދާ ހަރަކާތްތަކަށް ބޮޑު ތަރުހީބެއް ވަނީ ލިބިފައެވެ. އެގޮތުން ރޭ ބޭއްވި ފުޅަނދު ބުރު ބަލާލުމަށްޓަކައި ގިނަ އަދަދެއްގެ ބަޔަކު ވަނީ މަގުތަކަށް ނުކުމެފައެވެ.
މިއަހަރު ސަރުކާރުގެ މުއައްސަސާތަކާއި ކުންފުނިތައް ހިމެނޭހެން 8 އިދާރާއަކުން ހުށަހަޅައިދިން ޖުމްލަ 15 ފުޅަނދު ވަނީ ބައިވެރިވެފައެވެ. މީގެ އިތުރުން ހޯމް މިނިސްޓްރީ ބުނީ މިރޭ މިނިވަންއުފާ ކާނިވާ ވެސް ހުޅުވުމަށް ހަމަޖެހިފައިވާ ކަމަށެވެ. 8:30 ގައި އެ ކާނިވާ ހުޅުވާދެއްވާނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއެވެ.
