ޑރ. ނިޔާފް ޓްވީޓް ކުރެއްވި ލަވަ އާއްމުންނަށް ދޭހަވީ މިގޮތަށް!
ބެލެނިވެރިންގެ ކަންބޮޑުވުން އިންތިހާއަށް
އޭޑީކޭގެ ޗީފް މެޑިކަލް އޮފިސަރ، ޑރ އަބްދުﷲ ނިޔާފް
ފެތުރެމުންދާ ސްވައިން ފުލޫ އެއްކޮށް ކޮންޓްރޯލް ނުވެ އުޅެނިކޮށް އަންނަ އާދިއްތަ ދުވަހު ސުކޫލްތައް ހުޅުވަން އެޑިއުކޭޝަން މިނިސްޓްރީން ނިންމުމާއި ގުޅިގެން އެތައް ބަޔަކު ވަނީ ސުވާލު އުފައްދާފައެވެ.
ސޯޝަލް މީޑިއާގެ އެކި ވަސީލަތްތަކުގައި ބެލެނިވެރިން ދިޔައީ އެތައް ސުވާލެއް ކުރިމަތިކުރުވަމުންނެވެ. ބެލެނިވެރިންގެ ކަންބޮޑުވުން އިންތިހާއަށް ގޮސް، އޭޑީކޭގެ ޗީފް މެޑިކަލް އޮފިސަރ، ޑރ އަބްދުﷲ ނިޔާފަށް ޓެގްކޮށްވެސް ގިނަ ބެލެނިވެރިންތަކެއް ވަނީ، ދަރިވަރުން ސްކޫލަށް ފޮނުވުން ބުއްދިވެރިތޯ ސުވާލުކޮށްފައެވެ.
ބެލެނި ވެރިން ސުވާލުތައް އޮއްސަމުން ދިޔަ ދަނޑިވަޅުގައި ޑރ. ނިޔާފްގެ ޓްވީޓް ކުރެއްވީ ޖޯލް އެޑަމްސްގެ “ޕްލީސް ޑޯންޓް ގޯ” މި ލަވަ އެވެ.
ސްކޫލްތަކަށް ދަރިވަރުން ފޮނުވުމާއިމެދު، ސިއްހީ ގޮތުން ސުވާލު އުފެދިފައިވާ ދަނޑިވަޅުގައި ޑރ. ނިޔާފް
މިގޮތަށް ލަވައެއް ޓްވީޓްކުރެއްވުމުން ގިނަ ބަޔަކު އެކަން ނެގީ ސީރިއަސްކޮށެވެ.
ޓްވިޓާގައި މި ލަވަ ޝެއާ ކުރުމާއިއެކު މީހުންގެ ކޮމެންޓްތައް އޮއްސާލިއެވެ. އަދި ދަރިވަރުން ސްކޫލަށް ފޮނުވުމާމެދު ޖަވާބު ލިބިއްޖެކަމަށް ވަނީ ބުނެފައެވެ. އެކަކު ބުނެފައިވަނީ ދަރިފުޅު ސުކޫލަށް ފޮނުވުމާއި މެދު ޖަވާބު ވަރަށް ސާފުކަމަށެެވެ.
ރާއްޖޭގެ އެކި ހިސާބުތަކުގައި އެޗް1އެން1 ފެތުރެމުންދާއިރު، މި ބަލި ކޮންޓްރޯލްވެފައިވާކަމަށް އެޗްޕީއޭއިން ހާމަކޮށްފައެއް ނުވެއެވެ. އަދި އާދިއްތަ ދުވަހު ސްކޫލްތައް ހުޅުވޭއިރު، އެޗްޕީއޭއިން ކުރިން ނެރެފައިވާ އެލާޓް ލެވަލް އަށް ވެސް ބަދަލެއެް އައިސްފައެއް ނުވެއެވެ.
އެޗްޕީއޭއިން ބުނެފައިވަނީ މިބަލީގެ ނުރައްކާ އޮތް މިންވަރާއި، ފެތުރެމުންދާ މިންވަރަށް ބަލައި އެލާޓްލެވަލް ހުރީ 3 ގައިކަމަށް ބުނެފައެވެ.
