ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުހައްމަދު ސާލިހު، ސިފައިންގެ އެންމެ އިސް 4 ޖެނެރަލުންނަށް މަގާމުގެ ކުރިއެރުން ދެއްވައިފިއެވެ.

އަންގާރަ ދުވަހު މަގާމުގެ ކުރިއެރުން ލިބިވަޑައިގަތް އެންމެ ޚާއްސަ ބޭފުޅުންނަކީ މޭޖަރ ޖެނެރަލްގެ މަގާމުން ލެފްޓިނެންޓް ޖެނެރަލްގެ މަގާމަށް ކުރިއެރުން ދެއްވި، ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް އަބްދުﷲ ޝަމާލާއި، ބްރިގޭޑިއަރ ޖެނެރަލްގެ މަގާމުން މޭޖަރ ޖެނެރަލްގެ މަގާމަށް ކުރިއެރުން ދެއްވި ވައިސް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުއްރަހީމް އަބްދުއްލަތީފެވެ.

މީގެ އިތުރުން މޭޖަރ ޖެނެރަލްގެ މަގާމަށް ކުރިއެރުން ދެއްވި ދެބޭފުޅުންނަކީ އެމްއެންޑީއެފް މެރިން ކޯގެ ކޮމަޑާންޓް، މޭޖަރ ޖެނެރަލް ވައިސް ވަހީދާއި، އެމްއެންޑީއެފް ސަރވިސް ކޯގެ ކޮމަޑާންޓް މޭޖަރ ޖެނެރަލް ހާމިދު ޝަފީގެވެ.

އަންގާރަ ދުވަހު ބަންޑާރަކޮށީގައި ބޭއްވި ޚާއްސަ ރަސްމިއްޔާތުގައި މިބޭފުޅުންނަށް މަގާމުގެ ރޭންކު ހަވާލުކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ސާލިހެވެ. އަދި މަގާމުގެ ލިޔުން ހަވާލުކޮށްދެއްވީ ޑިފެންސް މިނިސްޓަރު މާރިޔާ އަހުމަދު ދީދީއެވެ.

މަގާމުގެ ކުރިއެރުން ލިބިވަޑައިގަތް ލެފްޓިނެންޓް ޖެނެރަލް އަބްދުﷲ ޝަމާލަކީ، އަސްކަރީ ތާރީޚުގައި ލެފްޓިނެންޓް ޖެނެރަލްގެ ރޭންކާ ހަމައަަށް ވަޑައިގެންނެވި ދެވަނަ ބޭފުޅާއެވެ. މީގެކުރިން އެ ރޭންކު ލިބިވަޑައިގަތް ހަމައެކަނި ބޭފުޅަކީ ލެފްޓިނެންޓް ޖެނެރަލް (ރިޓަޔާޑް) އަންބަރީ އަބްދުއްސައްތާރެވެ.