މުޖުތަމައެއް ކުރިއަށްދާނީ ރައްޔިތުންގެ މެދުގައި އޮންނަ އެކުވެރިކަމާއި އެއްބައިވަންތަކަން ވަރުގަދަކޮށްގެން: މެންބަރު ހިސާން
މުޖުތަމައުއަށް ބަދަލުތައް އަންނައިރު ތަފާތު އެކި އުދަނގޫ ދަތި ވަގުތުކޮޅުތަކާއި ކުރިމަތިލާންޖެހޭ
ތުޅާދޫ ދާއިރާގެ މެންބަރު ހިސާން ހުސައިން
މުޖުތަމައުއެއް ކުރިއަށްދާނީ ރައްޔިތުންގެ މެދުގައި އޮންނަ އެކުވެރިކަމާއި އެއްބައިވަންތަކަން ވަރުގަދަކޮށްގެން ކަމަށް ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.
ހޯމަ ދުވަހު ތުޅާދޫ ހޮސްޕިޓަލް އިމާރާތް ކުރުމުގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ހިސާން ވިދާޅުވީ އެންމެން އެއް އަމާޒަކަށް ދަތުރުގެ މިސްރާބު ޖަހާގެން މެނުވީ ރަށަށް ގެންނަން ބޭނުންވާ ބަދަލާއި ތަރައްގީ ނުގެނެވޭނެ ކަމަށާއި، ގައުމެއް ކުރިއަށްދާއިރު އަދި ރަށެއް ކުރިއަށް އަރާއިރާއި މުޖުތަމައުއަށް ބަދަލުތައް އަންނައިރު ތަފާތު އެކި އުދަނގޫ ދަތި ވަގުތުކޮޅުތަކާއި ކުރިމަތިލާންޖެހޭ ކަމަށެވެ. ތަފާތު އެކި އުދަނގޫ ނިންމުންތައް ނިންމަންޖެހޭ ވަގުތުތަކުގައި އިސްކުރަންޖެހޭނީ ތިމާ އެންމެ ހިތް އެދޭގޮތް އެކަނި ނޫން ކަމަށާއި، ރައްޔިތުންނާއި ގައުމުގެ މަސްލަހަތު އިސްކުރަންޖެހޭ ކަމަށެވެ.
ހިސާން ވިދާޅުވީ އެއް މުޖުތަމައުއެއްގައި ދިރިއުޅުމުންދާއިރު އެކަކު އަނެކަށް ދޭންޖެހޭ ތާއީދާއި އެއްބާރުލުންދޭން ޖެހޭ ކަމަށާއި، އެކުގައި ކުރިއަށް ދިއުން އެއީ އުޒުމުކަމުގައި ހަދަންޖެހޭ ކަމަށެވެ. އެއްމާހައުލެއްގައި އުޅޭ އެނަކާއަކީ މިތުރުންގެ ގޮތުގައި ނުދެކި އެކުގައި ކުރިއަށް ދެވޭނެ އެއްގޮތް ވެސް ނޯންނާނެ ކަމަށާއި، އަނެކާއަށް ލިބޭ ކުރިއެރުމަކީ އުފަލެއްކަމަށް ބަލައިގެން ނޫނީ ކުރިއަށް ނުދެވޭނެ ކަމަށް މެންބަރު ހިސާން ވިދާޅުވިއެވެ.
މިއީ މިއަދު ވިސްނާލަން ޖެހޭ ކަމެއްކަން ފާހަގަކުރައްވައި ހިސާން ވިދާޅުވީ މުޖުތަމައެއް ކުރިއަށްދާނީ ރައްޔިތުންގެ މެދުގައި އޮންނަ އެކުވެރިކަމާއި އެއްބައިވަންތަކަން ވަރުގަދަކޮށްގެން ކަމަށާއި، އިޖްތިމާއީ ގުޅުން ވަރުގަދަކޮށްގެން ކަމަށެވެ. އަދި އެއް އަމާޒަކަށް ވާސިލްވާން މަސައްކަތްކޮށްގެން ކަމަށް ހިސާން ވިދާޅުވިއެވެ. އަދި ތުޅާދޫއަށް އިޝާރާތް ކުރައްވައި ހިސާން ވިދާޅުވީ އެރަށުގެ ރައްޔިތުންނަކީ އެ އަމާޒަށް މަސައްކަތް ކުރާނެ ރައްޔިތުންތަކެއް ދިރިއުޅޭ ރަށެއް ކަމަށާއި، އެކަމުގައި އެއްވެސް ވަރަކަށް ޝައްކުނުކުރާ ކަމަށެވެ.
ހިސާން ވިދާޅުވީ މިއަދުގެ ސަރުކާރުގެ ސިޔާސަތުތައް ރައްޔިތުން ބަލައިގަންނަ ކަމަށާއި، އެކުގައި މަސައްކަތް ކުރަންޖެހޭ ކަމަށެވެ. އަދި މި ސިޔާސަތުތަކާއެކު ތަރައްގީ އަންނަމުންދާކަން ހިސާން ފާހަގަކުރެއްވިއެވެ.
