ސަން ކުންފުނީގެ ވަކީލުގެ އެހެން އަޑުއެހުންތަކެއް އޮތުމުން، ފުއްގިރި މައްސަލަ ކެންސަލް
މި މައްސަލައިގައި އެންމެ ފަހުން އަޑުއެހުމެއް ކުރިއަށް ގެންދިޔައީ 20 ޖުލައިގައި
ކްރިމިނަލް ކޯޓު
ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށްގެން ރިޝްވަތު ނެގި މައްސަލައިގެ އަޑުއެހުން ކެންސަލްވެއްޖެއެވެ.
މި އަޑުއެހުން ކެންސަލްވެފައިވަނީ މައްސަލައިގައި ދައުވާލިބޭ ސަން ކޮންސްޓްރަކްޝަން އެންޑް އިންޖިނިޔަރިންގގެ ވަކީލުގެ އެހެން ބައްދަލުވުންތަކެއް ކުރިން ތާވަލު ކުރެވިފައި ހުރުމުންނެވެ.
މި މައްސަލައިގައި އެންމެ ފަހުން އަޑުއެހުމެއް ކުރިއަށް ގެންދިޔައީ 20 ޖުލައިގައެވެ. އެ ދުވަހު ލަންކާގައި ހުންނަ ރާއްޖޭގެ ހައިކޮމިޝަން މެދުވެރިކޮށް ލަންކާ ރައްޔިތެއްކަމަށްވާ ސިރިތާ ކުމާރުގެ ހެކިބަސް ނެގުން ކުރިއަށް ގެންގޮސްފައެވެ.
މި އަޑުއެހުމުގައި ކަނެކްޝަންގެ މައްސަލަ ތަކުރާރުކޮށް ދިމާވާތީ އެގޮތަށް ހެކިބަސް ކުރިއަށް ގެންދަން ޝަރީއަތަށްވެސް ދަތިކަން ފާހަގަ ކުރައްވައި ގާޒީ ވަނީ އެ ހެކިވެރިޔާ ޝަރީއަތުގެ މަޖިލީހަށް ހާޒިރު ކުރެވޭނެތޯ ސުވާލު ކުރައްވާފައެވެ.
ދައުލަތުން އެ ދުވަހު ވަނީ އާދިއްތަ ދުވަހު އޭނާ ހާޒިރު ކުރުމަށް މަސައްކަތް ކުރައްވާނެކަމަށް ވިދާޅުވެފައެވެ. ވުމާއެކު، އެ ދުވަހުގެ އަޑުއެހުން ވަނީ ކުރުކޮށްލާފައެވެ.
