ދިއްދޫގައި އޮންނާނީ އެމްޑީޕީ، ރޫޅައެއްނުލެވޭނެ: ރައީސް
21 ޖުލައި 2023 | ހުކުރު 02:15ރައީސް ވިދާޅުވީ ދިއްދޫ ރައްޔިތުން ބޭނުންވާ ހުރިހާ ކަމެއްގައި އަމަލީ ސިފަ ޖައްސައިދޭނެކަމަށް
ރައީސް ހއ ދިއްދޫ އަށް ވަޑައިގެން ރައްޔިތުންނާ ބައްދަލުކުރައްވަނީ
ހއ ދިއްދޫގައި އޮންނާނީ އެމްޑީޕީ ކަމަށާއި ރޫޅާނުލެވޭނެކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ހއ އަތޮޅަށް ރައީސް ކުރެއްވި ކެމްޕެއިން ޖަލްސާ ނިންމަވާލައްވަމުން ފަހު މަންޒިލެއްގެ ގޮތުގައި ދިއްދު އަށް ވަޑައިގެން އެރަށުގައި ބުރާސްފަތި ދުވަހުގެ ރޭ ވަނީ ޖަލްސާ ބާއްވަވާފައެވެ. އެޖަލްސާގައި ވާހަކަފުޅު ނިންމަވާލައްވަމުން ރައީސް ވިދާޅުވީ އެމަނިކުފާނު ބޭނުންފުޅުވަނީ ކުރިއެކޭ އެއްގޮތަށް ދިއްދޫގެ ރައްޔިތުން ކުރިޔަށް އޮތް ރިޔާސީ އިންތިޚާބުގައި، 9 ސެޕްޓެމްބަރުގައި ނުކުމެ ފުރިހަމަ އަގްލަބިއްޔަތަކުން ކޯލިޝަނަށް ތާއީދުކޮށްދެއްވުންކަމަށެވެ. ދިއްދޫ ރައްޔިތުން ބޭނުންވި ގިނަ ކަންތައްތަކެއް ފުރިހަމަކޮށްދެވިއްޖެކަމަށް ރައީސް ވިދާޅުވެ އެކަމުގެ ތަފްސީލުތައް ދެއްވިއިރު ކޮށްދެއްވާނެކަމަށް ވިދާޅުވެ ނުކުރެވި ހުރި ކަންކަންގޮސްފައިވާ ހިސާބުވެސް ރައީސް ވަނީ ސާފުކޮށްދެއްވާފައެވެ. އަދި ކުރިޔަށް އޮތް ތަނުގައި ކޮށްދެއްވާނެކަންކަންވެސް ވަނީ އިއުލާންކުރައްވާފައެވެ.
ރައީސް ވިދާޅުވީ ދިއްދޫ ރައްޔިތުން ބޭނުންވާ ހުރިހާ ކަމެއްގައި އަމަލީ ސިފަ ޖައްސައިދެއްވާނެކަމަށެވެ.
ރައީސް މިހެން ވިދާޅުވެ ވާހަކަފުޅުދައްކަވާފައި މިވަނީ ރައީސް މުހައްމަދު ނަޝީދުގެ ދަ ޑިމޮކްރެޓްސްގެ ހަރަކާތްތައް ދިއްދޫގައި ފުޅާކުރަމުންދާ ދަނޑިވަޅެއްގައެވެ. ހއ. އަތޮޅުގައި ޑިމޮކްރެޓްސްގެ ހަރަކާތްތައް ދިއްދޫގައި އަންނަނީ ވަރަށް ވަރުގަދައަށް ހިންގަމުންނެވެ. އެ ރަށު ކައުންސިލާއި ހއ. އަތޮޅު ކައުންސިލްގައި ވެސް ޑިމޮކްރެޓްސްގެ މެންބަރުން ތިއްބަވައެވެ.
