ކިމް މިން-ޖޭ ބަޔާންއަށް ސޮއިކޮށްފި

ނަޕޯލީއަށް ކުޅެމުން އަންނަ ދެކުނު ކޮރެއާގެ ސެންޓަ ބެކް، ކިމް މިން-ޖޭ ފަސް އަހަރުގެ އެއްބަސްވުމަކަށް ބަޔާން މިއުނިކަށް ސޮއިކޮށްފިއެވެ.

އުމުރުން 26 އަހަރުގެ ކިމް އަކީ މިދިޔަ ސީޒަނުގައި އިޓާލިއަން ލީގު ތަށި ހޯދުމަށް 33 އަހަރު ވަންދެން ކުރި އިންތިޒާރު ނިމުމަކަށް ގެނައި ނަޕޯލީގެ ސްކޮޑުގައި ހިމެނުނު މުހިންމު ކުޅުންތެރިއެކެވެ. ލީގުގައި 35 މެޗު ކުޅެ، އިޓާލިއަން ލީގުގެ އެންމެ މޮޅު ޑިފެންޑަރުގެ އެވޯޑް ލިބުނީ ކިމް އަށެވެ. މިދިޔަ ސީޒަނަކީ އޭނާ ނަޕޯލީއަށް ކުޅުނު ފުރަތަމަ ސީޒަނެވެ.

ދެކުނު ކޮރެއާއަށް 49 މެޗު ކުޅެދިން ކިމް ބުނީ، ބަޔާންއަށް ކުޅުމަކީ ކޮންމެ ފުޓުބޯޅަ ކުޅުންތެރިއެއްވެސް ދެކޭނެ ހުވަފެނެއް ކަމަށެވެ. އޭނާ އިތުރަށް ބުނީ، މިއީ އޭނާއަށް އައު ފެށުމެއް ކަމަށާއި، އޭނާގެ ކުރިއެރުމަށް މަސައްކަތް ކުރާނެކަމަށެވެ. ރިޕޯޓުތައް ބުނާގޮތުން ބަޔާން އިންވަނީ ކިމްގެ ރިލީޒް ކްލޯޒް ކަމަށްވާ 50 މިލިއަން ޔޫރޯ ދައްކާފައެވެ.

ތޯމަސް ޓުޗެލްގެ ބަޔާން މިޔުނިކް މިދިޔަ ސީޒަނުގެ ޖަރުމަނު ލީގު ކާމިޔާބުކުރީ ފައިދާ ގޯލުގެ ތަފާތުންނެވެ. ދެވަނައިގައި ނިމުނީ ޑޯޓްމަންޑެވެ. ޑޯޓްމަންޑަށް ލީގު ގެއްލުނީ ސީޒަނުގެ ފަހު މެޗުގައެވެ.

ބަޔާން އިން ޓީމު ވަރުގަދަކުރުމަށް އިތުރަށް މަސައްކަތް ކުރާއިރު، ޓޮޓެންހަމްގެ ހެރީ ކޭން ގެނައުމަށްވެސް ވަނީ މަސައްކަތް ފަށާފައެވެ.

ދެކުނު ކޮރެއާގެ ފުޓްބޯޅައިގެ ތިން ވަނަ ދަރަޖައިން ކެރިއަރު ފަށައި، ފުރަތަމަ ޑިވިޑަނަށް އެރުމަށްފަހު ޔޫރަޕަށް ބަދަލުވުމުގެ ކުރިން ޗައިނީސް ސުޕަ ލީގުގައި ވެސް ކިމް ވަނީ ކުޅެފައެވެ.

ކިމް ނަޕޯލީއާ ގުޅުނީ 2022 ވަނަ އަހަރުގެ ހޫނު މޫސުމުގައި ތުރުކީގެ ފެނަބާޗޭ އިންނެވެ.