ކިއުބާއާއި އެމެރިކާގެ ގުޅުން ހީނަރުވަނީ ޓްރަމްޕުގެ ސަބަބުން ކަމަށް ކާސްޓްރޯ ތުހުމަތުކުރައްވައިފި

ކިއުބާއާއި އެމެރިކާއާ ދެމެދު 2015 ވަނަ އަހަރުން ފެށިގެން މަޑުމަޑުން ގުޅުން ރަނގަޅުވަމުން ދިއުމަށްފަހު ކިއުބާއާމެދު ރައީސް ޑޮނަލްޑް ޓްރަމްޕް ގެންގުޅުއްވާ ހަރުކަށި ގޮތްތަކުގެ ސަބަބުން އެ ގުޅުން އަނެއްކާވެސް ގޯސް ވާން ފަށާފައިވާކަމަށް ކިއުބާގެ ރައީސް ރައުލް ކާސްޓްރޯ ވިދާޅުވެއްޖެއެވެ.

ރައީސް ޓްރަމްޕްގެ ކުރިން ވެރިކަމުގައި ހުންނެވި ބަރަކް އޮބާމާގެ ސަރުކާރުން ދެ ގައުމުގެ ގުޅުން ބަދަހިކުރައްވަން ފައްޓަވާފައިވަނިކޮށް ރައީސް ޓްރަމްޕްގެ ވެރިކަމުގައި އެ ކަން ފަހަތަށްދާކަމަށް ވިދާޅުވެ ކާސްޓްރޯ ފާޑު ވިދާޅުވެފައި މި ވަނީ ވޮޝިންގޓަންގައި ހަވާނާ އެމްބަސީ ހުޅުވިތާ ދެ އަހަރު ފުރެން ހަފްތާއެއްހާ ދުވަހަށް ވެފައި ވަނިކޮށެވެ.

ބައިގަރުނެއްހާ ދުވަހަށްފަހު ކިއުބާއާ އެމެރިކާއާއިން ސިޔާސީ ގުޅުން އިއާދަކޮށް އެމެރިކާގައި ކިއުބާގެ އެމްބަސީ ހުޅުވާފައިވަނީ 2015 ވަނަ އަހަރުގެ ޖުލައި މަހުގެ 20 ވަނަ ދުވަހުއެވެ.

"މިހާރުގެ ރައީސް އެ އިއުލާނުކުރެއްވި ކަންކަން ...އޭގެ މާނައަކީ ދެ ގައުމުގެ ގުޅުން ދަނީ ފަހަތަށޭ"ކިއުބާގެ ގާނޫނުހަދާ މަޖިލީހުގެ ފުރަތަމަ ދައުރު ނިންމަވާލެއްވުމަށް ހުކުރު ދުވަހު ދެއްވި ތަގުރީރުގައި ކާސްޓްރޯ ވިދާޅުވިއެވެ.

މިދިޔަ ޖޫން މަހު ރައީސް ޓްރަމްޕް ވަނީ މައާމީގެ ލިޓްލް ހަވާނާގައި ކާސްޓްރޯއާ ދެކޮޅު އެކްޓިވިސްޓުންނާ ބައްދަލުކުރައްވައި އެމެރިކާގެ ރައްޔިތުން ކިއުބާއަށް ދަތުރުކުރުމުގައި ހަރުކަށި އުސޫލުތަކެއް އެކުލަވާލައްވައި، އަސްކަރިއްޔާއިން ހިންގަމުން ގެންދިއަ ޓޫރިސްޓް ފާމް މަނާކޮށް މިހާރުވެސް އަޅާފާއިވާ ވިޔަފާރީގެ ދަތިކުރުމުގެ ފިޔަވަޅުތައް އިތުރަށް ވަރުގަދަކޮށްފައެވެ.

ކިއުބާގެ ރައީސް ވިދާޅުވީ 1962ން ފެށިގެން އެ ގައުމާ ދޭތެރޭ އަޅާފައިވާ ދަތިކުރުމުގެ ފިޔަވަޅު ތައް އިތުރަށް ވަރަގަދަ ކުރުމުން ހަނދާނަށް އަންނަނީ ފިނި ހަނގުރާމައިގެ ދުވަސްވަރު ގެންގުޅުނު ގަދީމީ އުސޫލު ކަމަށެވެ.

ކާސްޓްރޯ ވިދާޅުވީ ކިއުބާއިން ދެ ގައުމުގެ ގުޅުމާ ބެހޭގޮތުން އެމެރިކާއާ މަޝްވަރާ ކުރުމަށް ތައްޔާރަށް ކަމަށެވެ.

އެމެރިކާގެ ރައީސަކު ކިއުބާއަށް ވަޑައިނުގަންނަވާތާ 88 އަހަރު ފަހުން އެމެރިކާގެ ރައީސް ބަރަކް އޮބާމާ ވަނީ ތާރީހީ ދަތުރުފުޅުގައި 2016 ވަނަ އަހަރުގެ މާޗް މަހު ކިއުބާއަށް ވަޑައިގެން ފައެވެ.

އޭގެ ކުރިން އެމެރިކާގެ ރައީސް އެއް އެންމެ ފަހުން ކިއުބާއަށް ވަޑައިގެންނެވީ 1928 ވަނަ އަހަރު އޭރުގެ ރައީސް ހެރީ ޓްރޫމަންއެވެ.