އެމްއެލްއެސް އަށް ވުރެ ސައޫދީ ޕްރޯ ލީގު ރަނގަޅު، ޔޫރަޕަކަށް ނުދާނަން: ރޮނާލްޑޯ

އެމްއެލްއެސް އަށް ވުރެ ސައުދީ ޕްރޯ ލީގު ރަނގަޅު ކަމަށާއި އެމެރިކާ ނުވަތަ ޔޫރަޕުގެ ޓީމަކަށް އެނބުރި ދިއުމުގެ ވިސްނުމެއް ނެތް ކަމަށް ކްރިސްޓިއާނޯ ރޮނާލްޑޯ ބުނެފިއެވެ.

ރޮނާލްޑޯ މިހެން ބުނީ އޭނާގެ އުފަން ޕޯޗުގަލްގައި ސްޕެނިޝް ލީގުގެ ސެލްޓަ ވީގޯ އަތުން 5-0 އިން އަލް ނަސްރު ބަލިވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. ރޮނާލްޑޯ ވަނީ މެޗުގެ ފުރަތަމަ ހާފުގައި ކުޅެފައެވެ.

މެސީ އެމްއެލްއެސްގެ އިންޓަ މިއާމީ އާ ގުޅުމުން، އެ ލީގަށް ބަދަލުވުމުގެ އެއްވެސް ވިސްނުމެއް ހުރިތޯ ސުވާލުކުރުމުން، ރޮނާލްޑޯ ބުނީ ސައުދީ ޕްރޯ ލީގު މާ ރަނގަޅު ކަމަށެވެ. ރޮނާލްޑޯ އިތުރަށް ބުނީ ސައުދީ ލީގަށް އޭނާ މަގު ހުޅުވާލަދިން ފަހުން ގިނަ ކުޅުންތެރިންތަކެއް އެ ލީގާ ގުޅެން ފަށައިފިކަމަށެވެ.

މެންޗެސްޓަރ ޔުނައިޓެޑުގައި ދެވަނަ ފަހަރަށް ކުޅުމަށްފަހު މިދިޔަ ޖެނުއަރީ މަހު އަލް ނަސްރާ ގުޅުނު ފަހުން އުމުރުން 38 އަހަރުގެ ރޮނާލްޑޯ އަންނަނީ އެ ޓީމާއެކު ފުރަތަމަ ފުލް ސީޒަނަށް ނުކުންނަން ތައްޔާރުވަމުންނެވެ.

މި ހޫނުމޫސުމުގައި މިހާރުވެސް ގިނަ އަދަދެއްގެ ކުޅުންތެރިން ވަނީ ސައުދީ ޕްރޯ ލީގުގެ ކުލަބުތަކާ ގުޅިފައެވެ. އޭގެތެރޭގައި ކަރީމް ބެންޒީމާ، މާސެލޯ ބްރޮޒޮވިޗް، އެންގޯލޯ ކާންޓޭ، ރޮބާޓޯ ފިރްމީނޯ، ކަލިދޫ ކުލިބާލީ، އެޑުއާޑް މެންޑީ އަދި ރުބެން ނެވޭސް ފަދަ ކުޅުންތެރިން ފާހަގަކޮށްލެވެއެވެ. އިންޓަ މިލާންގެ ކުރީގެ ކުޅުންތެރިޔާ، ބްރޮޒޮވިޗް ވަނީ ހޯމަ ދުވަހު ރޮނާލްޑޯ އާއެކު ސެލްޓަ ވީގޯ އާ ދެކޮޅަށް ކުޅެފައެވެ.

ރޮނާލްޑޯ އިތުރަށް ބުނީ ޔޫރަޕްގައި ކުޅުމުގެ ދުވަސްތައް މިހާރު ނިމިފައިވާ ކަމަށާއި ފާއިތުވި އަހަރުތަކުގައި ޔޫރަޕުގެ ކުޅުމުގެ ފެންވަރު ދަށަށް ގޮސްފައިވާ ކަމަށް ގަބޫލުކުރާ ކަމަށެވެ. މިވަގުތު ރަނގަޅު ފެންވަރެއްގައި އޮތީ ހަމައެކަނި ޕްރިމިއަރ ލީގު ކަމަށް އޭނާ ބުންޏެވެ.

ޕޯޗުގަލްގައި ކުރިޔަށްދާ ޕްރީ ސީޒަންގެ ދެވަނަ މެޗުގައި ބުރާސްފަތި ދުވަހު އަލް ނަސްރު ނިކުންނާނީ ޗެމްޕިއަން ބެންފީކާ އާ ދެކޮޅަށެވެ.