ބްރެޒިލްގެ ވިލިއަން އަލުން ފުލަމްއާ ގުޅި، ލަންޑަން ކުލަބާއެކު އެއް އަހަރު ދުވަހުގެ އައު އެއްބަސްވުމެއްގައި ސޮއިކޮށްފިއެވެ.

އުމުރުން 34 އަހަރުގެ ކުޅުންތެރިޔާ ފުލަމްއާ އެކު ކުރިން ހަދާފައިވާ އެއްބަސްވުމުގެ މުއްދަތު މި އަހަރުގެ ހޫނު މޫސުމުގެ ކުރީކޮޅު ހަމަވެފައިވާއިރު، އޭނާ ވަނީ ނޮޓިންހަމް ފޮރެސްޓަށް ބަދަލުވުމާ ގާތަށްވެސް ޖެހިލާފައެވެ. ނަމަވެސް، އޭނާ ވަނީ ފުލަމްއާއެކު އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.

މިދިޔަ ސީޒަންގައި ޕްރިމިއަރ ލީގު ތާވަލުގެ 10 ވަނައިގައި ފުލަމް ނިންމާލަން އެހީތެރިވެދިން ވިލިއަން ބުނީ އޭނާ ފުލަމްއާއެކު ހުރީ ވަރަށް އުފަލުން ކަމަށެވެ. އަދި އެ ކުލަބަކީ ކުރިޔަށް އޮތް ސީޒަނުގައި އެޔަށްވުރެވެސް ރަނގަޅު ނަތީޖާއެއް ނެރެވޭނެ ކުލަބެއް ކަމަށް ވިލިއަން ބުންޏެވެ.

ޗެލްސީ އާއި އާސެނަލްގެ ކުރީގެ ކުޅުންތެރިޔާ މިދިޔަ އަހަރުގެ އޮގަސްޓު މަހު ފުލަމްއާ ގުޅުނީ، ކޮރިންތިއަންސްއިން ހިލޭ އެއްބަސްވުމެއްގެ ދަށުންނެވެ.

ވިލިއަން ވަނީ މިދިޔަ ސީޒަނުގައި ފުލަމްއަށް 27 މެޗު ކުޅެދީ، ފަސް ލަނޑު ޖަހާ، ހަ ލަނޑު ޖެހުމަށް އެހީތެރިވެދީފައެވެ.