ރިޔާސީ އިންތިޚާބުގައި ނަޝީދަކީ ޗެލެންޖެއް ނޫން، ޗެލެންޖަކަށް ވާނީ ޕީޕީއެމް: ރައީސް
17 ޖުލައި 2023 | ހޯމަ 14:172018 ވަނަ އަހަރު އޮތް ކޯލިޝަނާއި މިހާރު އޮތް ކޯލިޝަން ތަފާތުކަމަށާއި ސިޔާސަތުތަކާއި އަމާޒުތަކާއި ކަންކަން ކުރާ ގޮތާއި ވައްޓަފާޅިއަށްވެސް ބަދަލުތަކެއް އައިސްފައިވާކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް
ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކުރީގެރައީސް، ކުރީގެރައީސް މުހައްމަދު ނަޝީދަކީ ޗެލެންޖެއް ނޫންކަމަށާއި ޗެލެންކަޖަށްވާނީ ޕީޕީއެމް ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިޚާބުގެ ކެމްޕެއިނަށް ވ އަދި މ އަތޮޅަށް ކުރެއްވި ދަތުރުފުޅު ނިންމަވާލައްވަމުން ނޫސްވެރިން ކުރި ސުވާލުތަކަށް ޖަވާބު ދެއްވަމުން ރައީސް ވިދާޅުވީ އެއްވެސް މީހަކު ޕާޓީއާ ދުރުވުމަކީ އޭގެން ނަތީޖާއަށް އަސަރުކުރާނެކަމެއްކަމަށެވެ. އެއީ ޕާޓީއަށް ގެއްލޭނެ ވޯޓެއްކަމަށް ރައީސް ވިދާޅުވިއެވެ.
ނަމަވެސް މަސައްކަތްކުރަމުންދަނީ ގެއްލޭ ވޯޓުތައް އެހެން ގޮތްގޮތުން ހޯދުމަށްކަމަށާއި އެވޯޓުތައް ލިބޭތަންވެސް ފެނިވަޑައިގަންނަވާކަމަށް ރައީސް ވިދާޅުވިއެވެ. 2018 ވަނަ އަހަރު އޮތް ކޯލިޝަނާއި މިހާރު އޮތް ކޯލިޝަން ތަފާތުކަމަށާއި ސިޔާސަތުތަކާއި އަމާޒުތަކާއި ކަންކަން ކުރާ ގޮތާއި ވައްޓަފާޅިއަށްވެސް ބަދަލުތަކެއް އައިސްފައިވާކަމަށް ރައީސް ވިދާޅުވިއެވެ.
އެއާއެކު ކުރީގައި ތާއީދުނުކުރާ ބައެއް ފަރާތްތަކުގެ ތާއީދު ލިބެމުންދާކަމަށް ރައީސް ވިދާޅުވިއެވެ.
އެމްޑީޕީގެ ރައީސްގެ ގޮތުގައި ކުރިން ހުންނެވި ރައީސް ނަޝީދު އެމްޑީޕީން ވަކިވެ ޑިމޮކްރެޓްސް ނަމުގައި އައު ޕާޓީއެއް އުފައްދަވައިގެން މަސައްކަތްކުރައްވާއިރު ކުރިޔަށް އޮތް އިންތިޚާބުގައި ނަޝީދު ޗެލެންކަޖަށް ވެދާނެތޯ "ރާއްޖެޓީވީ"ން ކުރި ސުވާލަށް ޖަވާބު ދެއްވަމުން ރައީސް ވިދާޅުވީ ޕާޓީގެ އެތެރޭގެ އިންތިޚާބުތަކުގެ ނަތީޖާ އޮތީ ފެންނަން ކަމަށެވެ.
ރައީސް ވިދާޅުވީ ކެމްޕެއިންގެ މަސައްކަތްތައް ދަނީ ރަނގަޅު މިސްރާބަކަށް ކަމަށާއި ކުރިޔާ އަޅާބަލާއިރު މ އަތޮޅުންވެސް ތާއީދު އޮތްތަން ފެނިވަޑައިގެންނެވިކަމަށެވެ.
