ދިއްގަރުން ރައީސަށް ހޫނު މަރުހަބާއެއް
މިއީ މ. އަތޮޅުގެ ފަހުރަށް
ރައީސް ދިއްގަރަށް ވަޑައިގެންނެވުމުން މަރުހަބާ ދަންނަވަނީ
އެމްޑީޕީ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް މ. އަތޮޅު ދިއްގަރުން ހޫނު މަރުހަބާއެއް ދަންނަވައިފިއެވެ.
މިހާރު ކުރިޔަށް ގެންދަވާ ކެމްޕެއިން ދަތުރުފުޅުގައި ދިއްގަރަށް އެމަނިކުފާނު ވަޑައިގެންނެވީ އާދީއްތަ ދުވަހުގެ ހަވީރުއެވެ. އެމަނިކުފާނަށް މަރުހަބާ ދެންނެވުމަށް ރަށުގެ ކުދި ބޮޑު ގިނަ އަދަދެއްގެ ބަޔަކު ބަނދަރު ސަރަހައްދަށް އެއްވެފައިވާއިރު، ދިއްގަރުން ތަފާތުކަމެއްގެ ގޮތުގައި ފެނިގެން ދިޔައީ، ރައީސަށް މަރުހަބާ ދެންނެވުމުގެ ގޮތުން މާބޮނޑި އެރުވީ އުމުރުން ދުވަސްވީ މީހެކެވެ. އަދި އެމަނިކުފާނުގެ ކަރުފުޅުގައި މާފަތި އެޅުވީ ކުޑަ ކުއްޖެކެވެ.
ރައީސް އަށް މަރުހަބާ ދެންނެވުމަށް ކައުންސިލް މެންބަރުންނާއި، ރަށުގެ ކުދި ބޮޑު ރައްޔިތުން ބަނދަރު ސަރަހައްދަށް ގޮސްފައިވެއެވެ. އަދި އެމަނިކުފާނު އެއްބުރުން ހޮވާނެކަމަށް ގޮވަމުން އަޑު އުފުލަމުން ޝުއޫރުތައް ފާޅުކުރަމުން ގެންދިޔައެވެ.
ރައީސް މ. އަތޮޅަށް ކުރައްވަމުން ގެންދަވާ ދަތުރުފުޅުގެ ފަހު މަންޒިލެއްގެ ގޮތުގައި ދިއްގަރަށް ވަޑައިގަންނަވާފައިވާއިރު، އެ ރަށުގައި "އުފާވެރި އަމާންރާއްޖެ" ކެމްޕޭންގެ ބޮޑު ޖަލްސާއެއް ބޭއްވުމަށް ވަނީ ހަމަޖެހިފައެވެ.
