ނާލާފުށި ކައުންސިލުން "ދުރު ރާސްތާ 7" ދޯނި ކުއްޔަށް ދިނީ ބިޑް އިވެލުއޭޓް ނުކޮށް، ގެއްލުން 4 ލައްކަ ރުފިޔާއަށް އަރާ
2020 ވަނަ އަހަރު ދޯނި ކުއްޔަށް ދިނުމުގައި ބިޑް އިވެލުއޭޓް ކުރުމުގެ މިންގަނޑު ނެތުމުން 5 އަހަރަށް 405،000 ރުފިޔާ ގެއްލިފައިވޭ
ދުރު ރާސްތާ 7 ދޯނި
މުލަކަތޮޅު ނާލާފުށީ ކައުންސިލުން ރައްޔިތުންގެ "ދުރު ރާސްތާ 7" މަސްދޯނި ކުއްޔަށް ދިނުމުގައި ބިޑް އިވެލުއޭޓް ކުރުމުގެ އުސޫލުތަކާ ޚިލާފަށް ޢަމަލުކޮށް، ކައުންސިލަށް 4 ލައްކަ ރުފިޔާއަށްވުރެ ގިނަ ރުފިޔާގެ ގެއްލުން ވެފައިވާކަން އޮޑިޓަރ ޖެނެރަލްގެ އޮފީހުން ކުރި އޮޑިޓަކުން ހާމަވެއްޖެއެވެ.
85 ފޫޓުގެ އިންޖީނު އެޅި މި ދޯންޏަކީ ކައުންސިލްގެ އިދާރާއަށް އެންމެ ބޮޑު އާމްދަނީއެއް ލިބެމުންދާ އެސެޓް ކަމުގައިވީ ނަމަވެސް، ދޯނި ކުއްޔަށް ދޫކޮށްގެން ލިބެންޖެހޭ ގިނަ އަދަދެއްގެ ފައިސާ ލިބިފައިނުވާކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.
ދޯނި ފުރަތަމަ ކުއްޔަށް ދީފައިވަނީ 2011 ވަނަ އަހަރު އޮކްޓޯބަރު 4 ގައި، މަހަކު 27,000 ރުފިޔާގެ ކުއްޔަށް، 5 އަހަރު ދުވަހުގެ މުއްދަތަށެވެ. ނަމަވެސް ކުލި ނުދެއްކުމުގެ މައްސަލައިގައި 2019 ގައި ކޯޓުން ޙުކުމް ކުރިއިރު، 550,200 ރުފިޔާ ދެއްކުމަށް އަންގާފައިވާއިރު، ކައުންސިލުން ވަނީ ކުލި ދައްކަންޖެހޭ މިންވަރު މަހަކު 1,000 ރުފިޔާއަށް ކުޑަކޮށްދީފައެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، 2020 ވަނަ އަހަރު ދޯނި އަލުން ކުއްޔަށް ދިނުމަށް ކުރި އިޢުލާނާ ގުޅިގެން ބިޑް އިވެލުއޭޓް ކުރުމުގައި މާލީ އަދި ފަންނީ ޤާބިލްކަން ވަޒަންކުރާނެ މިންގަނޑުތައް ކަނޑައަޅާފައި ނުވެއެވެ. މީގެ ސަބަބުން އެންމެ މަތީ އަގު ހުށަހެޅި ފަރާތަށް ބިޑް ނުލިބި، ކައުންސިލަށް 5 އަހަރު ދުވަހުގެ ތެރޭގައި ލިބެންޖެހޭ 405,000 ރުފިޔާ ގެއްލިފައިވާކަމަށް އޮޑިޓަރުން ވަނީ ފާހަގަކޮށްފައެވެ.
މީގެއިތުރުން، އެއްބަސްވުމުގައިވާ ގޮތުން ކޮންމެ އަހަރެއްގެ ނޮވެމްބަރު މަހު ދޯނީގެ އިންސްޕެކްޝަން ހަދަންޖެހޭއިރު، މިހާތަނަށް އެއްވެސް އިންސްޕެކްޝަނެއް ހަދާފައިނުވާކަންވެސް އޮޑިޓުން ވަނީ ފާހަގަކޮށްފައެވެ.
އޮޑިޓަރ ޖެނެރަލްގެ އޮފީހުން ވަނީ މި މައްސަލައިގައި ޒިންމާވާ ފަރާތްތަކާމެދު ފިޔަވަޅު އެޅުމަށާއި، ކުރިއަށް އޮތްތަނުގައި ބިޑް އިވެލުއޭޝަން ކްރައިޓީރިއާ ރަނގަޅަށް ކަނޑައެޅުމަށާއި، އެއްބަސްވުމުގައިވާ ގޮތަށް އިންސްޕެކްޝަންތައް ބެލެހެއްޓުމަށް ލަފާދީފައެވެ.
އިސްލާހު ކުރުމަށް އަންގާފައިވަނީ ކޯޓުން މަދުވެގެން ވަކި އަދަދެއް ދެއްކުމަށް ކޮށްފައިވާ ޙުކުމަކީ އިންޞާފުވެރި އަދަދެއްކަމަށް ބަލަންޖެހޭއިރު، އެ ޙުކުމާ ޚިލާފަށް، ކައުންސިލްގުެއިދާރާއަށް ގެއްލުންވާގޮތަށް، އެކަށީގެންވާ ވަރަށްވުރެ ދިގު މުއްދަތަކުން ފައިސާ ދެއްކުމަށް ހަމަޖެއްސުމާއި އަދި ބިޑް އިވޭލުއޭޝަންގައި ފަންނީ ޤާބިލުކަން ސާބިތުކޮށްދިނުމަށް އެއްވައްތަރެއްގެ ލިޔުން ދެފަރާތުން ހުށަހަޅާފައި ވީނަމަވެސް، ބިޑް ހުށައަޅާފައިވާ އެއްފަރާތަށް އެބަޔަށް ޕޮއިންޓު ދީފައިނުވުމުން ވަކި ފަރާތްތަކެއްގެ މަސްލަޙަތައް ބެލިފައިވާ ކަމަށާއ،ި މިފަދަ ކަންކަމަކީ ދައުލަތުގެ މާލިއްޔަތު ގަވާއިދުގެ 17.01 ވަނަ މާއްދާގައި ބަޔާންކޮށްފައިވާ ހުއްދަ ނޫން ޢަމަލުތަކެއް ކަމުގައިވާތީ، މިކަމުގައި ޒިންމާވާ ފަރާތްތަކާއި މެދު އެގަވާއިދު 17.03 ވަނަ މާއްދާއާ އެއްގޮތަށް އިދާރާގައި މައްސަލަ ބެލުމަށް މިނިސްޓަރު ކަނޑައަޅާފައިވާ އިންތިޒާމުގެ ތެރެއިން މައްސަލަ ބެލުމަށްފަހު އެއްވެސް ފަރާތަކާއި މެދު ފިޔަވަޅު އަޅަންޖެހިއްޖެނަމަ ފިޔަވަޅު އެޅުމަށް ވަނީ ދަންނަވާފައެވެ.
