ރައީސް އިދިކޮޅަށް: ވާދަވެރި ކެމްޕޭނަކަށް ނުކުމެވަޑައިގެން ވާދަކުރައްވާ!!

ކުރިއަށް އޮތް ރިޔާސީ އިންތިހާބުގައި އިދިކޮޅު ފަރާތްތަކުން ވާދަވެރި ކެމްޕޭނަކަށް ނުކުމެވަޑައިގަތުމަށް ރައީސް ގޮވާލައްވައިފިއެވެ.

ރައީސް މިފަދައިން ވިދާޅުވީ"އުފާވެރި އަމާންރާއްޖެ" ކެމްޕޭން ޖަލްސާގައި އާދީއްތަ ދުވަހުގެ ރޭ ދިއްގަރުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ކެމްޕޭނަށް ނުކުމެ ވަޑައިގެން ވާދަކުރެއްވުމަށެވެ. އެމަނިކުފާނު ވިދާޅުވީ އެ ހުންނެވީ އެކަމަށް ތައްޔާރުވެގެން ކަމަށެވެ.

ރައީސް މިފަދައިން ވިދާޅުވެފައިވަނީ، މ. އަތޮޅުގެ ކެމްޕޭންގެ ތެރެއިން، ކުރީގެ ރައީސް މުހައްމަދު ނަޝީދަށް ތާއިދުކުރައްވާ ފަރާތެއް މުލަކުގައި ހަޑިހުތުރުބަހުން ވާހަކަ ދައްކާ އަޑުގަދަކޮށްފައިވަނިކޮށް އެކަމަށް އިޝާރާތްކުރައްވައެވެ.

ޖަލްސާގައި ވާހަކަފުޅުއްދަކަވަމުން ރައީސް ވިދާޅުވީ ތަޅާފޮޅާ ހަމަޖެހުމާއި ސުލްހަ ގެއްލުވާލަން ކުރާ ކަންތައްތަކަށް މި ސަރުކާރުން ޖާގައެއް ނުދެއްވާނެކަމަށެވެ. ރައީސް ވިދާޅުވީ ރާއްޖޭގެ އަމަންއަމާންކަން ފުލުހުންނާއި ސިފައިން ބަލަހައްޓަވާނެކަމަށެވެ.