މި.ދިއްގަރުގައި ރަސްމީކޮށް ހުޅުވައި އަދި ވޮލީ ކުޅުމަށް ބޭނުން ކުރަމުން ދިޔަ ވޮލީ ކޯޓެއްގެ މަސައްކަތް ނިންމާނެ ކަމަށް ވިދާޅުވެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އިތުރުފުޅު ހައްދަވައިފި އެވެ.

ރައީސް މުޢިއްޒު އެ ފަދައިން ވާހަކަ ދައްކަވާފައި ވަނީ، މ އަތޮޅުގެ ރަށްތަކަށް ކުރެއްވި ދަތުރުފުޅުގައި ދިއްގަރު ރައްޔިތުންނާ ބައްދަލު ކުރައްވައި ވާހަކަ ދައްކަވަމުންނެވެ. .

އެގޮތުން ރައީސް މުޢިއްޒު ވިދާޅުވީ، ދިއްގަރުގައި ފުޓުބޯޅަ ދަނޑެއް ޤާއިމު ކުރުމުގެ މަސައްކަތާއި، އިތުރު ބައެއް އެހެން މަސައްކަތްތައް ކުރިއަށް ގެންދަވާނެ ކަމަށެވެ. މިހާރު ހިނގަމުން ގޮސް މަސައްކަތް ހުއްޓިފައި އޮތް ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތް ކުރުމަށާއި، އަދިވެސް އެ ފަދަ ބައެއް ކަންކަން ކުރިއަށް ދާ ކަމަށް ރައީސް ވިދާޅުވި އެވެ.

އެކަން ފާހަގަ ކުރައްވައި ރައީސް މުޢިއްޒު ވިދާޅުވީ ވޮލީ ކޯޓުގެ މަސައްކަތް ވެސް ކުރިއަށް ގެންދާނެ ކަމަށެވެ. އަދި ޖުމުލަ ގޮތެއްގައި ހުރިހާ ދާއިރާ އަކުން ވެސް، ދިއްގަރުގެ ތަރައްޤީ އަށް ކުރިއަށް އޮތް ހަފުތާ ތަކާއި، މަސް ތަކުގެ ތެރޭގައި އަމަލީ މަސައްކަތް ކުރިއަށް ގޮސް، އަދި ނިންމަމުން ދާ ތަން ފެންނާނެ ކަމުގައި ވެސް ރައީސް ވިދާޅުވި އެވެ.

ރައީސް މުޢިއްޒު މިހެން ވިދާޅުވެފައިވާއިރު، ދިއްގަރު ވޮލީ ކޯޓަކީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ނިންމައި، ރަސްމީކޮށް ހުޅުވާފައިވާ ވޮލީ ކޯޓެކެވެ. ދިއްގަރަށް ވަޑައިގެން، ރައީސް ޞާލިޙު ވަނީ 2022 ވަނަ އަހަރުގެ އޮގަސްޓު މަހުގެ 27 ވަނަ ދުވަހު އެ ވޮލީ ކޯޓު ރަސްމީކޮށް ހުޅުވައި ދެއްވައިފަ އެވެ.

އަދި އެއަށް ފަހު ވަނީ އެ ކޯޓުގައި ވޮލީ މެޗެއް ވެސް ކުޅުއްވައިފަ އެވެ. އެ މެޗުގައި ރައީސް ޞާލިޙުގެ އިތުރުން ސަރުކާރުގެ އިސްވެރިންނާއި، ވޮލީ ބޯޅައިގެ ލެޖެންޑުން އަދި ދިއްގަރުގެ ރައްޔިތުން ވެސް ވަނީ ބައިވެރިވެފަ އެވެ.

އެކަމާ ގުޅޭ ގޮތުން ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ދިއްގަރު ކައުންސިލްގެ މެމްބަރު ޢަބްދުﷲ އާރިފް ވިދާޅުވެފައި ވަނީ، އެ ވޮލީ ކޯޓަކީ ކުރީގެ ސަރުކާރުން ހުޅުވާފައި އޮތް ވޮލީ ކޯޓެއް ކަަމަށާއި، ވޮލީ ކޯޓު ހުޅުވުމަށް ފަހު ރައީސް ޞާލިޙު ސޮއި ކުރެއްވި ވޮލީ ބޯޅަ އަދި ވެސް އޮތް ކަމަށެވެ.

އެއީ ރައީސް ޞާލިޙުގެ ވައުދެއް ކަމަށާއި، ރައީސް ޞާލިޙުގެ ވެރި ކަމުގެ ތެރޭގައި އެ މަސައްކަތް ނިންމައި، ރަސްމީކޮށް ހުޅުވައި ބޭނުން ކުރަމުން އަންނަ ކަމަށެވެ. އަދި ރައީސް މުޢިއްޒު އެ ވިދާޅުވާ ވޮލީ ކޯޓަކީ ކޮން ތަނެއްގައި އަޅާ ވޮލީ ކޯޓެއް ކަމެއް ނޭނގޭ ކަމަށް ވެސް އާރިފް ވަނީ ވިދާޅުވެފަ އެވެ.

އާރިފް ވިދާޅުވީ ރައީސް މުޢިއްޒުގެ ދަތުރުފުޅުގެ ކުރިން އެ ރަށަށް ވަޑައިގެންނެވި ފިނޭންސް މިނިސްޓްރީގެ ބޭފުޅުންނަށް ވެސް އެ ވޮލީ ކޯޓު ދައްކާފައިވާނެ ކަމަށާއި، އެކަން ކުރިއަށް ދިޔަ ގޮތް ވެސް ހިއްސާ ކޮށްފައިވާނެ ކަަމަށެވެ. އެ ބޭފުޅުން ވޮލީ ކޯޓުގެ ފޮޓޯ ވެސް ނެގި ކަމަށާއި، އެއަށްފަހު ފުރައިގެން ދިޔައީ ކަމަށެވެ. ނަމަވެސް، އޭގެ ފަހުން ރައީސް މުޢިއްޒު ވަޑައިގެން އެ ވޮލީ ކޯޓުގެ ވާހަކަ ދެއްކެވުމުން ހައިރާންވާ ކަމަށް އާރިފް ވިދާޅުވި އެވެ.

އެކަން ފާހަގަ ކުރައްވައި އާރިފް ވިދާޅުވީ އެއް ގޮތަކީ ރައީސް މުޢިއްޒުގެ ދަތުރުފުޅުގެ ކުރިން ވަޑައިގެންނެވި ބޭފުޅުން ރައީސް އަށް އޮޅުވާލެއްވީ ކަމަށެވެ. ނޫން ނަމަ، މައިކެއް އަތުގައި ޖެހުމުން ރައީސް އަށް ދެއްކެވޭ ވާހަކަ އޮޅިވަޑައިގެން ގޮސް، ދެއްކެވުނު ވާހަކައެއް ކަމަށް އާރިފް ވިދާޅުވެފައިވެ އެވެ.