ދިއްގަރުގައި ލޯންޗެއް ގޮވައި ދެ މީހަކަށް އަނިޔާވެއްޖެ
މި ހާދިސާ ހިނގާފައިވަނީ އަންގާރަ ދުވަހުގެ ހެނދުނު 9:50 އެހާއިރު
ދިއްގަރުގައި ގޮވި ލޯންޗު
މ. ދިއްގަރުގައި ލޯންޗެއް ގޮވައި ދެ މީހަކަށް އަނިޔާވެއްޖެއެވެ.
އެ ރަށު ކައުންސިލްގެ ރައީސް އަހުމަދު ނިޝާން "ރާއްޖެ އެމްވީ" އަށް ވިދާޅުވީ މި ހާދިސާ ހިނގާފައިވަނީ އަންގާރަ ދުވަހުގެ ހެނދުނު 9:50 އެހާއިރު ކަމަށެވެ. އެގޮތުން، ބަނދަރުގައި އޮތް ލޯންޗުން ބާރުގަދަ އަޑެއް އިވުމަށްފަހު ލޯންޗުގައި ރޯވީ ކަމަށާއި އެވަގުތު ލޯންޗުގައި ދެ މީހަކު ތިބި ކަމަށް އޭނާ ވިދާޅުވިއެވެ.
ނިޝާން ވިދާޅުވި ގޮތުގައި މި ހާދިސާގައި އަނިޔާވެފައިވަނީ އެ ލޯންޗުގެ ކެޕްޓަން އާއި ފަޅުވެރިޔަކަށެވެ. ދެ މީހުން ވެސް ލޯންޗުގައި ރޯވުމުން މޫދަށް ފުންމާލި ކަމަށާއި ދެ މީހުންގެ ވެސް ފައި ވަރަށް ބޮޑަށް ފިހިފައިވާ ކަމަށް އޭނާ ވިދާޅުވިއެވެ. ދެ މީހުންނަށް ވެސް އިތުރު ފަރުވާ ދިނުމަށް މާލެ ގެނެސް އޭޑިކޭގައި އަންނަނީ ފަރުވާ ދެމުންނެވެ.
ނިޝާން ވިދާޅުވީ މި ހާދިސާ ހިނގީ ލޯންޗު މަހަށް ގޮސް ރަށަށް އައުމަށްފަހު ދެވަނަ ފަހަރަށް މަހަށް ދާން އުޅެނިކޮށް ކަމަށެވެ. އެގޮތުން ފުރަތަމަ ފަހަރަށް ސްޓާޓް ކުރަން އުޅުމުން ނުވި ކަމަށާއި ލޯންޗް ގޮވާފައި ވަނީ ދެވަނަ ފަހަރަށް ސްޓާޓް ކުރި ވަގުތު ކަމަށް މައުލޫމާތު ލިބޭ ކަމަށް ވެސް އޭނާ ވިދާޅުވިއެވެ.
މި ހާދިސާގައި ރޯވި ލޯންޗުގެ އަލިފާންގަނޑު 30 މިނެޓު ތެރޭގައި ރަށުގެ ރައްޔިތުންނާއި ފުލުހުންގެ އެހީތެރިކަމާއެކު ވަނީ ނިއްވާލައިފައެވެ. އަދި ލޯންޗު މިހާރު ވަނީ އެމްޓީސީސީގެ އެހީތެރިކަމާއެކު އެއްގަމަށް އަރުވާފައެވެ. މިހާދިސާގައި ލޯންޗުގެ އިންޖީނަށް މާބޮޑު ގެއްލުމެއް ލިބިފައި ނުވާ ކަމަށް ވެސް ނިޝާން ވިދާޅުވިއެވެ.
ނިޝާން ވިދާޅުވީ މި ހާދިސާގައި އަނިޔާވި ދެ މީހުން މޫދަށް ފުންމާލުމުން އެ ދެ މީހުން ސަލާމަތް ކުރުމުގައި ވެސް އެމްޓީސީސީގެ މުވައްޒަފުންގެ އެހީތެރިކަން ލިބުނު ކަމަށެވެ.
