މަސް ގަންނަ އަގު 20ރ އަށް ބޮޑުކުރުމުގެ މަސައްކަތް ކުރައްވަމުން ގެންދަވާ ކަމަށް ރައީސް ވިދާޅުވެއްޖެ
މަސް ގަންނަ އަގު 20 ރުފިޔާއަށް ހަމަޖެއްސުމުގެ މަސައްކަތް އަންނަނީ ކުރަމުން
ރައީސް ޑރ މުހައްމަދު މުއިއްޒު ދިއްގަރު ރައްޔިތުންނާއި ބައްދަލުކުރައްވައި ވާހަދައްކަވަނީ: މަސް ގަންނަ އަގު 20ރ އަށް ބޮޑުކުރުމުގެ މަސައްކަތް ކުރައްވަމުން ގެންދަވާ ކަމަށް ރައީސް ވިދާޅުވި
މަސް ގަންނަ އަގު 20 ރުފިޔާއަށްވުރެ ކުޑަ ނުކުރާނެ ކަމަށް ރިޔާސީ ކެމްޕޭނުގައި ވެވަޑައިގެންނެވި ވައުދު ފުއްދުމަށް މަސައްކަތް ކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރާއްޖޭގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ހޯމަ ދުވަހު މ. ދިއްގަރަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން މުއިއްޒު ވިދާޅުވީ، ބައެއް ވައުދުތަކަކީ ވެރިކަމުގެ ފުރަތަމަ ދުވަހު ފުއްދޭނެ ވައުދުތަކެއް ނޫން ކަމަށެވެ.
ރައީސް މުއިއްޒު ވިދާޅުވީ ނަމެއްގައި މާދަމާއިން ފެށިގެން މަސް ގަންނަ އަގަކީ 20ރ އޭ ބުނުމަކުން އެކަން އެގޮތަކަށް ނުވާނޭ ކަމަށެވެ. އަދި އެކަން ވެސް ހާސިލް ކުރުމަށް ވަގުތު ނަގާނޭ ކަމަށާއި އެކަން ހާސިލް ކުރުމަށްޓަކައި ކަމާ ގުޅުންހުރި ފަރާތްތަކާއި ގުޅިގެން މިހާރު ވެސް ވަރަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށް ރައީސް ވިދަޅުވި އެވެ.
ހަމަ ނަމެއްގައި މާދަމާއިން ފެށިގެން 20 ރުފިޔާއޭ ބުނީމާ އަދި އެކަމެއް ނުވޭ. އެހެންވީމާ އެކަން ވެސް ހާސިލުކުރުމަށްޓަކައި މިދަނީ ވަރަށް ގިނަ މަސައްކަތްތަކެއް އިންޑަސްޓްރީ ތެރެއިން މިނިސްޓްރީއާއި މިފްކޯއާއި އަދި ކަމާ ގުޅޭ ހުރިހާ ފަރާތްތަކާ އެކީގައި ސަރުކާރުން ކުރަމުންރައީސް މުއިއްޒު
ރައީސް މުއިއްޒު ވިދާޅުވީ ކަންކަމުގެ ތަފުސީލަށް ދިޔައީމާ އެކަން އޮންނަ ގޮތް ސާފުވެގެންދާ ކަމަށާއި އެހެންކަމުން ވެރިކަމުގެ ފުރަތަމަ ދުވަހުން ފެށިގެން ވެވަޑައިގެންނެވި ވައުދާ އެއްގޮތަށް ކަންކަން ނުދިޔުމަކީ ވައުދު ނުފުއްދުން ނޫން ކަމަށެވެ.
މީގެ އިތުރުން އެމަނިކުފާނު ވިދާޅުވީ 48 ގަޑިއިރު ތެރޭގައި މަސްވެރިންނަށް ފައިސާ ދޭން ވެވަޑައިގެންނެވި ވައުދު ވެސް ފުއްދަން އަހަރުދުވަސް ނެގި ކަމަށާއި އެހެންކަމުން މަސް ގަންނަން ލިބޭ އަގު 20ރ. އަށްވުރެ ދަށް ނުކުރުމުގެ ވައުދު ވެސް ފުއްދުމަށްޓަކައި ކުރަންޖެހޭ ކަންކަން ކުރަމުންދާ ކަމަށެވެ.
މުއިއްޒު ވެރިކަމާ ހަވާލުވެވަޑައިގެންނެވި އިރު މަހުގެ އަގު ހުރީ 25 ރުފިޔާގައެވެ. ނަމަވެސް ޖޫން 2024 ގައި ސަރުކާރުން ވަނީ މަހުގެ އަގުން 36 ޕަސެންޓު ކަނޑާލައިފައެވެ.
ސަރުކާރުގެ މަސް ކުންފުނި، މިފްކޯއަށް މިހާރު މަސް ގަންނަނީ ބޭރުގެ ބާޒާރުގައި މަހުގެ އަގު ހުރި މިންވަރަށާއި މަސް ގަނެ، އެކްސްޕޯޓު ކުރުމަށް ހިނގާނެ ހަރަދަށް ބެލުމަށް ފަހު އެވެ. އެގޮތުން އެ ބަދަލުތަކަށް ބަލާ ކޮންމެ ހަފްތާއަކު ވެސް މަސް ގަންނަ އަގަށް ބަދަލު ގެނެ އެވެ. މިހާރު އާންމުކޮށް އުޅެނީ ކިލޯއެއް 16.ރ އަށެވެ.
މަސް ކިލޯއްގެ އަގު 20ރ.އަށް ހެދުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
