އިދިކޮޅުގެ މެނިފެސްޓޯއިން އެންމެ ގިނައިން އިވޭ ވައުދަކީ ވައްޓާލުމާއި ރޫޅާލުން: އިހްސާން
އެއްބުރުން ރައީސް ސާލިހަށް ވޯޓުދީ އިންތިޚާބު ކުރަންޖެހޭ
އެމްޑީޕީގެ ދިއްގަރު ދާއިރާގެ ރައީސް މުހައްމަދު އިހްސާން ވާހަކަފުޅުދައްކަވަނީ
އިދިކޮޅު ފަރާތްތަކުގެ މެނިފެސްޓޯއިން އެންމެ ގިނައިން އިވޭ ވައުދަކީ ވައްޓާލުމާއި ރުޅާލުން ކަމަށާއި، އެކަން ރައްޔިތުން ބޭނުންނުވާކަމަށް, އެމްޑީޕީގެ ދިއްގަރު ދާއިރާގެ ރައީސް މުހައްމަދު އިހްސާން ވިދާޅުވެއްޖެއެވެ.
އާދިއްތަ ދުވަހުގެ ރޭ މ. ދިއްގަރުގައި ކުރިއަށްދާ އެމްޑީޕީގެ ޖަލްސާގައި އިހްސާން ވިދާޅުވީ, އިދިކޮޅު ފަރާތްތަކުގެ މެނިފެސްޓޯއިން އެންމެނަށް އެންމެ ގިނައިން އިވޭ ވައުދަަކީ ވައްޓާލުމާއި ރޫޅާލުމުގެ ވައުދު ކަމަށާއި، މިދެ ލަފްޒުން ސިފަވަނީ ނާމާންކަމާއި، ބިރުވެރިކަން ކަމަށެވެ. ރައްޔިތުންނަށް ލިބޭ ނިކަމެތިކަމާއި ލިބިދާނެ ހަލާކާމެދު ފިކުރު ކުރުން ނޫން ގޮތެއް ނެތް ކަމަށެވެ.
އެހެންކަމުން މިއަހަރުގެ ރިޔާސީ އިންތިޚާބުގައި އެއްބުރުން ރައީސް އިބްރާހީމް މުހައްމަދު ސާލިހަށް ވޯޓުދީ އިންތިޚާބު ކުރަންޖެހޭ ކަމަށް އިހްސާން ވިދާޅުވިއެވެ.
އިހްސާން ވިދާޅުވީ ދުނިޔެ ހިނގަނީ ބަދަލާއި ތަފާތުން ކަމަށާއި، ކޮންމެ ދުވަހަކީވެސް ތަފާތު ދުވަހެއް ކަމަށެވެ. އަދި ހާލަތުވެސް ބަދަލުވާކަން އިހުސާން ފާހަގަކުރެއްވިއެވެ. އިހްސާން ވިދާޅުވީ ރައްޔިތުން އެދޭ ގޮތަށް ތަފާތު ދައްކައި، ބަދަލު ގެެންނެވީ ރައީސް ސާލިހު ކަމަށެވެ. އެމަނިކުފާނަކީ ކެތްތެރިކަމާއި ފުދުންތެރިކަމާއި ވިސްނުންތެރިކަމާއި ކުޅަދާނަ ނިންމެވުންތައް ނިންމަވާ ވެރިއެއް ކަމަށާއި، ކަންކަން ފުއްދަމުން ރައްޔިތުންނަށް ތަޖުރިބާތައް ދައްކަމުންދާ ވެރިއެއް ކަމަށެވެ.
ދިއްގަރުގެ ހާލަތަށް އިޝާރާތް ކުރައްވައި އިހްސާން ވިދާޅުވީ، ސުނާމީ ކާރިސާއާއި ކޮވިޑް-19ގައި ކަންކަން ހިނގާދިޔަ ގޮތް ރައްޔިތުން ހަނދާން ނުނެތޭ ކަމަށެވެ. ސުނާމީ ކާރިސާގައި ރަށް ހިމާޔަތް ކުރުމަށް ކާބަފައިން އަރާމެއް ހިތްހަމަޖެހުމެއް ނެތި ބުރަ މަސައްކަތްތައް ކުރި ކަމަށް އޭނާ ވިދާޅުވިއެވެ. ނަމަވެސް ކޮވިޑް-19ގައި އޯގާތެރި ވެރިއަކު ހުންނެވުމުން ރައްޔިތުންނަށް އެދުވަހުވެސް ހިތްހަމަޖެހުމާއި އުފާވެރިކަން ލިބިގެން ދިޔަކަމަށް އިހްސާން ވިދާޅުވިއެވެ.
މީގެ އިތުރުން އިހްސާން ވިދާޅުވީ ކޮންމެ އިރުވައި މޫސުމެއްގައި ގެއަށް ވަންނަ ލޮނުން ހިމާޔަތް ވެދާނެ ކަމަށް ރައްޔިތުން އުންމީދު ނުކުރި ނަމަވެސް އެ ހިތްދަތިކަމުން މިސަރުކާރުން ރައްޔިތުން ހިމާޔަތްކޮށްދީފައިވާ ކަމަށެވެ. އަދި ވިދާޅުވީ ރައީސް ސާލިހަކީ ރައްޔިތުންނަށް އުފާވެރިކަން ގެނެސްދޭ ވެރިއެއް ކަމަށާއި، މިފަހަރުގެ ރިޔާސީ އިންތިޚާބުގައި ވެސް މ އަތޮޅުން، ތަފާތު ދައްކާ ރައީސް އިންތިޚާބު ކުރާނެ ކަމަށެވެ.
