ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ތަރައްގީއަށް ކުރާ ދަތުރުގައި މ. ވޭވަށް ހިމެނިގެންދާނެ ކަމަށް އެމަނިކުފާނު ވިދާޅުވެއްޖެއެވެ.

މ. އަތޮޅަށް ކުރައްވަމުން ގެންދަވާ "އުފާވެރި އަމާންރާއްޖެ" ކެމްޕޭން ދަތުރުގައި އާދީއްތަ ދުވަހުގެ ހެނދުނު މ. ވޭވަށަށް ވަޑައިގެން ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ޞާލިހް ވިދާޅުވީ ތަރައްގީގެ މަސައްކަތް ކުރުމުގައި ކުދި އާބާދީ ހިމެނޭ ރަށްތައް މީގެ ކުރިން އެއްފަރާތްކޮށްފައިވާ ކަމަށެވެ. ނަމަވެސް ޖަޒީރާ ރާއްޖެ މެނިފެސްޓޯގައި އެކުލަވާލި، ވޭވަވަށަށް ބޭނުންވާ ކަންކަން ހިމަނައި، އެ ކަންކަން ވޭވަށުން މިހާރު ފެންނަމުންދާ ކަމަށެވެ. ރައީސް ވިދާޅުވީ މެނިފެސްޓޯ އެކުލަވާލި އިރު، އެއިރު މ އަތޮޅުގެ ވިސްނުން އެނގިވަޑައިގަންނަނާ ކަމަށެވެ.

ނަމަވެސް މި 5 އަހަރު ތެރޭގައި ކުރެވުނު މަސައްކަތާއެކު، މ އަތޮޅުގެ ބޮޑު އަގުލަބިއްޔަތެއް ކޯލިޝަނަށް ލިބިގެންދާނެކަމަށް ގަބޫލުކުރައްވާ ކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ ވޭވަށަކީ ރަށުގައި ރައްޔިތުން ތިބެ މަސައްކަތް ކުރާ އާބާދީއެއް އޮތް ރަށެއް ކަމަށެވެ. ރަށްރަށުން ބާނާ މަސް ބޯޓުތަކަށް ނުކިރޭނަމަ، ވިއްކަން އަންނަނީ ވޭވަށަށް ކަމަށާއި، މަސް ކައްކާ ރިހާކުރު ހަދާ ވިއްކާ އާމްދަނީ ހޯދަމުންދާ ރަށެއް ކަމަށެވެ.

ރައީސް ވިދާޅުވީ ރިޔާސީ އިންތިހާބުގައި ވީ ހަމައެކަނި ވައުދަކީ ބަނދަރު ހެދުން ކަމަށެވެ. އެކަން ނިމިއްޖެ ކަމަށާއި، އޭގެ އިތުރުންވެސް ބައެއް ކަންތައްތައް ފާހަގަކުރެވުނު ކަމަށެވެ. އޭގެ ތެރޭގައި އިންޖީނުގެ، ސްކޫލް އިމާރާތް ކައުންސިލް އިދާރާގެ އިމާރާތް އަދިވެސް ކޯޓުގެ އިމާރާތް އައުކުރަން ޖެހިފައިވާކަން ފާހަގަކުރެވުނު ކަމަށެވެ. އެހެންކަމުން މި ހުރިހާ ކަމެއް ލިސްޓްކޮށް ފަށައިގެން އޭގެ ތެރެއިން ގިނަ ކަމެއް ވަނީ ނިމިފައި ކަމަށް ރައީސް ވިދާާޅުވިއެވެ.

ރައީސް ވިދާޅުވީ ވޭވަށުގައި ބަނދަރު، އައުޓްޑޯ ޖިމް ނިމިފައިވާ ކަމަށާއި، އިންޖީނުގެ، ފެނާ ނަރުދަމާ، މެޖިސްޓްރޭޓް ކޯޓް ކައުންސިލް އިދާރާގެ މަސައްކަތް ދަނީ ހިނގަމުން ކަމަށެވެ. ރަށުގެ ޒުވާނުން ބޭނުންވާ ކަންކަން އެބަހުރި ކަމަށާއި، ރަށުގައި ފުޓްބޯޅަ ދަނޑު ތަރައްގީކުރުމަކީ ޒުވާނުންގެ ރިކުއެސްޓެއް ކަމަށް އަދި އެކަން ކޮށްދެއްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ ރާއްޖޭގެ ކަންކޮޅުތަކުގައި ޒަމާނީ ފުޓްބޯޅަ ދަނޑު ތަރައްގީކުރަމުން ދާއިރު، 141 ފުޓްބޯޓް ދަނޑު ޓާފް އަޅައި ނިމިއްޖެ ކަމަށެވެ. އަދިވެސް އެ އަދަދަަށް ފުޓްބޯޅަ ދަނޑު އެޅެމުންދާ އިރު، މިހާތަނަށް 70 ފުޓްސަލް ދަނޑު، 17 ވޮލީކޯޓް، 54 އައުޓްޑޯ ޖިމް މިހެން ގޮސް ކުޑަރަށެއް ބޮޑު ރަށެއް ތަފާތުކުރުމެއް ނެތި ރައްޔިތުންނަށް އަސާސީ ހިދުމަތް ފޯރުކޮށްމުން ގެންދާ ކަމަށެވެ.

އަދި ރިޔާސީ އިންތިހާބަށްފަހު ލިބޭ 5 އަހަރު ތެރޭގައި ކުރާނެ ކަންކަމަށް ބަލާއިރު، މިހާތަނަށް ފާހަގަަކުރެވުނު އެއްކަމަކީ ރަށްގިރާ ސަރަހައްދުގެ މައްސަލަ ހައްލުކުރެއްވުން ކަމަށާއި، މެނިފެސްޓޯގައި އެކަން ހިމަނުއްވާނެކަމަށް ރައީސް ވިދާޅުވިއެވެ. އަދި ބަނދަރު ހަދާ ނިމުނު އިރުގައި ކުޑަ ކަމެއް ކުރަން އެބަޖެހޭ ކަމަށާއި، އެއީ ތިލަ ބައެއް ސަރަހައްދު ހުރުމުން، އެކަން ހައްލުކޮށްދެއްވުން ކަމަށް ރައީސް ވިދާޅުވިއެވެ. ނިމިގެންދިޔަ ކައުންސިލް އިންތިހާބުގައި މުޅި ކައުންސިލް އެކީގައި އޮތީ އެމްޑީޕީއަށް ކަމަށާއި، މިއީ ތަރައްގީއާއެކު ކުރިއަށްދިއުމަށް ތިބިކަމުގެ އަލިގަދަ ނިޝާނެއް ކަމަށާއި، ތަރައްގީއަށް ކުރާ ދަތުރުގައި ވޭވަށް ހިމެނިގެންދާނެ ކަމަށް ރައީސް ވިދާޅުވިއެވެ.