އިތުބާރުހުރި ވައުދުތައް ފުއްދަވާ ވެރިޔަކީ ރައީސް ސާލިހު، ދެވަނަ ދައުރަކަށް ހޮވަންޖެހޭ: އިކްރާމް
ދެވަނަ ދައުރަކަށް ރައީސް ހޮވަން ނުޖެހޭ ސަބަބެއް ނެތް
މ. މުލީގައި އޮތް ކެމްޕޭން ޖަލްސާގައި އިކްރާމް ވާހަކަފުޅުދައްކަވަނީ
އިތުބާރުހުރި، ވައުދުތައް ފުއްދަވާ ވެރިޔަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ކަމަށް، ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު އިކްރާމް ހަސަން ވިދާޅުވެއްޖެއެވެ.
މ. މުލީގައި އޮތް ކެމްޕޭން ޖަލްސާގައި ވާހަކަފުޅުދައްކަވަމުން އިކްރާމް ވިދާޅުވީ، ދެވަނަ ދައުރަކަށް ރައީސް ހޮވަން ނުޖެހޭ ސަބަބެއް ނެތްކަމަށެވެ. ރައީސް ވެވަޑައިގެންނެވި ގިނަ ވައުދުތައް ފުއްދަވައިދެއްވި ކަމަށާއި، އަދި އަނެއް ބައި ވައުދުތަކުގެ ބޮޑުބައެއް ފުއްދައިދެއްވަމުންދާ ކަމަށް ވިދާޅުވިއެވެ.
އިކްރާމް ވިދާޅުވީ އިތުބާރުހުރި، ވެވަޑައިގަންނަވާ ވައުދުފުޅާ އެއްގޮތަށް މަސައްކަތްތައް ކުރިއަށް ގެންދަވާ ވެރިއަކަށް ވޯޓްދޭނަމަ، ވޯޓް ދޭން ޖެހެނީ ރައީސަށް ކަމަށް ވިދާޅުވިއެވެ.
އިކްރާމް ވިދާޅުވީ އެ ރަށުގެ ހޮސްޕިޓަލަށް ތިން ދާއިރާއަކުން ސްޕެޝަލައިޒްޑް ޑޮކްޓަރުން ސަރުކާރުން ގެނައިކަމަށެވެ. އިކްރާމް ވިދާޅުވީ ރަށުގެ ރައްޔިތުން، ރައީސަށް ވޯޓްދޭން ޖެހޭ ސަބަބެއް އެބައޮތް ކަމަށެވެ. އެގޮތުން ގިނަ މަޝްރޫއުތައް މި ސަރުކާރުން ކުރިއަށް ގެންގޮސްފައިވާ ކަމަށާއި އެ ސަބަބަށްޓަކައި ވެސް ރައްޔިތުން ރައީސަށް ވޯޓް ދޭން ޖެހޭނެ ކަމަށެވެ.
މުޅި އަތޮޅުގެ ހުރިހާ ރައްޔިތުންވެސް ކުރަމުން އައި އުންމިދަކީ މުލީ އެއަރޕޯޓުގެ މަސައްކަތް ކަމަށާއި އެ މަޝްރޫއުގެ 70 އިންސައްތަ ނިމިފައިވާކަމަށް ވިދާޅުވިއެވެ. އަދި އެއަރޕޯޓްގެ މަސައްކަތް ނިމުމުން ރައްޔިތުންނަށް ދަތުރުފަތުރުގެ ފަސޭހަކަން އިހުސާސްވެގެންދާނެ ކަމަށް އިކްރާމް ވިދާޅުވިއެވެ.
