ވޯޓަށް ބަލާއިރު، ސިޔާސީ މީހުން ދެކޭގޮތުގައި ނާލާފުށީ މީހުން މުހިންމެއް ނޫން، ނަމަވެސް އަޅުގަނޑުގެ ވިސްނުން ތަފާތު: ރައީސް
15 ޖުލައި 2023 | ހޮނިހިރު 11:43ވޭތުވެދިޔަ ތަނުގައި ކުދި ރަށްތަކަށް ތަރައްގީ ނައިސް އޮތީ، އޭރު ހުންނަވާ ވެރިޔަކު ސިޔާސީ ވިސްނުންފުޅު އިސްކުރައްވާތީ
މ. ނާލާފުށީގައި ބޭއްވި ކެމްޕޭން ޖަލްސާގައި ރައީސް ވާހަކަފުޅުދައްކަވަނީ
ވޯޓަށް ބަލާއިރު, ސިޔާސީ މީހުން ދެކޭގޮތުގައި ނާލާފުށީގެ މީހުން މުހިންމު ނޫންކަމަށާއި، ނަމަވެސް އެމަނިކުފާނުގެ ވިސްނުންފުޅު ތަފާތު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ހޮނިހިރު ދުވަހު މ. ނާލާފުށީގައި ބޭއްވި ކެމްޕޭން ޖަލްސާގައި ރައީސް ވިދާޅުވީ، ވޭތުވެދިޔަ ތަނުގައި ކުދި ރަށްތަކަށް ތަރައްގީ ނައިސް އޮތީ އޭރު ހުންނަވާ ވެރިޔަކު ސިޔާސީ ވިސްނުންފުޅު އިސްކުރައްވާތީ ކަމަށެވެ. އަބަދުވެސް އެ ވެރިޔަކަށް ފެނިވަޑައިގަންނަވާނީ ފަސް އަހަރުގެ ތެރޭގައި ބާއްވާ އިންތިޚާބު ކަމަށާއި، އެހެންވުމުން އަމާޒު ހިއްޕަވަނީ ވޯޓް ލިބޭ އާބާދީ ބޮޑެތި ރަށްތަކަށް އެކަނި ކަމަށެވެ.
ނާލާފުށީގައި ދިރިއުޅޭ 384 މީހުންނަކީ، ވޯޓަށް ބަލާއިރު ސިޔާސީ މީހުންނަށް މާ މުހިންމު ބައެއް ނޫން ކަމަށާއި، އަދި އާބާދީ ބޮޑެތި ރަށްތަކަށް އަމާޒުކޮށްގެން މަޝްރޫއު ހިންގާތީ އާބާދީ ކުޑަރަށްތަކަށް ތަރައްގީ ނައިސް ވާކަމަށް ރައީސް ވިދާޅުވިއެވެ.
އެހެންނަމަވެސް ސަރުކާރުގެ ވިސްނުމަކީ އެއީ ނޫންކަމަށާއި، ރައްޔިތުންނަށް ބޭނުންވާ އަސާސީ ޚިދުމަތްތައް އެއްވެސް ރަށެއް ތަފާތުކުރުމެއް ނެތި ފޯރުކޮށްދެނީ ރައްޔިތުންގެ ދިރިއުޅުން ތަރައްގީކުރުމަށް ކަމަށް ރައީސް ވިދާޅުވިއެވެ.
ނާލާފުއްޓަކީ އާބާދީ ކުޑަރަށެއްކަން ފާހަގަކުރައްވައި ރައީސް ވިދާޅުވީ، އެމަނިކުފާނާއި ކޯލިޝަން ޕާޓުނަރުންވެސް ގަބޫލުކުރައްވާ ގޮތުގައި، ރާއްޖޭގެ ރައްޔިތުންނަށް ފޯރުކޮށްދޭންޖެހޭ އަސާސީ ޚިދުމަތްތައް ފޯރުކޮށްދޭންޖެހޭނީ ވަކިރަށެއް ތަފާތުކުރުމެއް ނެތި ކަމަށެވެ. އެ ރައްޔިތަކު ހުރިތަނެއްގައި އެ ރައްޔިތަކަށް ބޭނުންވާ އަސާސީ ޚިދުމަތްތައް ފޯރުކޮށްދޭންޖެހޭނެ ކަމަށާއި، އަމާޒަކީ އަދި މަސައްކަތް ކުރައްވަމުންދަނީ އެ މަގަށް ކަމަށް ވިދާޅުވިއެވެ. އެގޮތުން ނާލާފުއްޓާ މިފަދައިން ހުރި ކުދި އެތައް ރަށެއްގައި މަޝްރޫއުތައް ހިނގަމުންދާ ކަމަށް ރައީސް ވިދާޅުވިއެވެ.
ނާލާފުށީގައިވެސް ފެނާއި ނަރުދަމާ ނިޒާމަކީ ރައްޔިތުން ވަރަށް ބޮޑަށް ބޭނުންވެފައި އޮތް ކަމެއް ކަމަށާއި، ރަށުގެ ފެނާއި ނަރުދަމާ ނިޒާމް ތަރައްގީކުރުމަށް ބަޔަކާ ހަވާލުކުރެވުނުކަން ރައީސް ފާހަގަކުރެއްވިއެވެ. އެހެންނަމަވެސް ބައެއް ކުންފުނިތަކުން މަސައްކަތް ކުރުމުގައި ފަސްޖެހޭ ކަމަށާއި، ރަށުގެ މި މަޝްރޫއުވެސް ދާންވީ ސްޕީޑުގައި ނުގޮސް ވަނީ މަޑުޖެހިފައިވާ ކަމަށް ވިދާޅުވިއެވެ. އަދި އެކަމަށް ހައްލެއް ހޯއްދަވައިދެއްވާނީ އެމަނިކުފާނު ކަމަށް ރައީސް ވިދާޅުވިއެވެ. ރާއްޖޭގައި މިހާރު ފަށާފައި އޮތް 141 ރަށުގައި ފެނާއި ނަރުދަމާގެ މަސައްކަތް އިރާދަކުރެއްވިއްޔާ މިއަހަރު ތެރޭގައި ނިންމައި ޚިދުމަތް ފޯރުކޮށްދޭނެ ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ ރަށުގެ ކަރަންޓުގެ ޚިދުމަތް މުޅިން އައު އިންޖީނުގެއަކާއި އޮފީހެއް ގާއިމްކުރެވި ހުޅުވިގެންދާނެ ކަމަށާއި، މިއީ ރާއްޖޭގެ އެކި ރަށްރަށުގައި ކުރިއަށް ގެންދެވޭ މަޝްރޫއުތަކުގެ ތެރެއިން އެއް މަޝްރޫއު ކަމަށެވެ.
150ށް ރަށެއްގައި އިންޖީނު ބަދަލުކުރެވި، ކަރަންޓުގެ ވިއުގަ ބަދަލުކުރުމުގެ ބައެއް މަޝްރޫއުތައް މިހާރު ނިމިފައިވާކަމަށާއި، މި މަޝްރުއޫތަކަކީ ކުރިއަތް އޮތް 50 އަހަރަށް ހިންގާ މަޝްރޫއުތަކެއް ކަމަށް ރައީސް ވިދާޅުވިއެވެ.
ނާލާފުށީގައި ބޮޑު ބަނދަރެއް ތަރައްގީކުރުމުގެ މަޝްރޫއު ކުރިއަށް އޮތް ރިޔާސީ އިންތިޚާބުގެ މެނިފެސްޓޯގައި ހިމަނާފައިކަން ފާހަގަކުރައްވައި ރައީސް ވިދާޅުވީ، ބަނދަރުގެ މަސައްކަތްވެސް އަވަހަށް ފެށިގެންދާނެ ކަމަށެވެ. ކުރިއަށް އޮތް އަހަރު ނިމޭއިރު، ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ގާއިމުކޮށްދެއްވާނެ ކަމަށް ވެސް ވިދާޅުވިއެވެ.
